Gingharian

Kahubitan: Ang Gingharian sa Diyos mao ang kapadayganan sa unibersohanong pagkamagmamando ni Jehova ngadto sa iyang mga linalang, o ang paagi nga iyang gigamit sa pagpadayag nianang maong pagkasoberano. Kining terminoha ilabinang gigamit sa pagpaila sa kapadayganan sa pagkamagmamando sa Diyos pinaagig harianong kagamhanan nga gipangulohan sa iyang Anak, si Jesu-Kristo. Ang “Gingharian” mahimong magtumong sa pagmando sa  usa nga gidihogan ingong Hari o ngadto sa yutan-ong gingharian nga gimandoan sa maong langitnong kagamhanan.

Ang Gingharian sa Diyos tinuod ba nga kagamhanan?

O kana ba, hinuon, usa ka kahimtang diha sa mga kasingkasing sa mga tawo?

Luc. 17:21, KJ: “Ni sila magaingon, Ania dinhi! o, atua didto! kay, tan-awa, ang gingharian sa Diyos anaa sa sulod kaninyo [usab TEV, Dy; apan “sa taliwala kaninyo,” KJ margin, NE, JB; “diha sa taliwala kaninyo,” RS; “sa inyong taliwala,” NW].” (Matikdi nga, ingon sa gipakita sa Luc 17 bersikulo 20, si Jesus nagsulti ngadto sa mga Pariseo, kinsa iyang giyagyag usab ingong mga salingkapaw, mao nga wala niya ipasabot nga ang Gingharian diha sa ilang mga kasingkasing. Apan ang Gingharian nga girepresentahan ni Kristo diha sa ilang taliwala. Busa ang The Emphatic Diaglott mabasa: “Ang harianong pagkahalangdon sa Diyos anaa sa inyong taliwala.”)

Ang Bibliya ba sa aktuwal nagahisgot sa Gingharian sa Diyos ingon nga usa ka kagamhanan?

Isa. 9:6, 7, RS: “Alang kanato ang usa ka bata natawo, alang kanato ang usa ka anak nga lalaki gihatag; ug ang kagamhanan [usab KJ, AT, Dy; “dominyo,” JB, NE; “prinsipenhong pagmando,” NW] igatungtong sa iyang abaga, ug ang iyang ngalan pagatawgong ‘Kahibulongang Magtatambag, Gamhanang Diyos, Walay Kataposang Amahan, Prinsipe sa Pakigdait.’ Sa kauswagan sa iyang kagamhanan ug sa pakigdait walay kataposan.”

Kinsa ang mga magmamando sa Gingharian?

Pin. 15:3: “Dako ug kahibulongan ang imong mga buhat, Jehova nga Diyos, ang Labing Gamhanan. Matarong ug matuod ang imong mga paagi, Hari sa walay kataposan.”

Dan. 7:13, 14: “Uban sa mga panganod sa kalangitan adunay usa nga sama sa anak sa tawo [Jesu-Kristo; tan-awang Marcos 14:61, 62] miabot; ug ngadto sa Tigulang sa mga Adlaw [Jehova nga Diyos] siya miduol, ug ilang gidala siya nga haduol gayod sa atubangan nianang Usa. Ug ngadto kaniya [kang Jesu-Kristo] gihatag ang pagbulot-an ug himaya ug gingharian, aron ang mga katawhan, nasodnong mga grupo ug mga pinulongan ang tanan kinahanglang mag-alagad kaniya.”

Pin. 5:9, 10: “Ikaw [Jesu-Kristo] ang gipatay ug pinaagi sa imong dugo gilukat mo ang mga tawo alang sa Diyos nga gikan sa tanang kabanayan ug pinulongan ug katawhan ug kanasoran,  ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” (Sa Pinadayag 14:1-3 kini sila nga “gipalit gikan sa yuta” nga mahimong mga magmamando uban sa Kordero didto sa langitnong Bukid Sion gikaingon nga adunay gidaghanong 144,000.)

Adunay unsang epekto kining Ginghariana ibabaw sa tawhanong mga gobyerno?

Dan. 2:44: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian dili igapasa ngadto sa laing katawhan. Kini magadugmok ug magaut-ot sa tanan niining mga ginghariana, ug kana mismo mao ang magpabilin sa mga panahong walay katinoan.”

Sal. 2:8, 9: “Kanako mangayo ka, aron igahatag ko ang mga nasod ingong imong panulondon ug ang mga kinatumyan sa yuta ingong imong kaugalingong kabtangan. Pagadugmokon mo sila pinaagig sungkod nga puthaw, ingon sa banga sa magkukolon sila imong pagapulpogon.”

Unsa man ang malampos sa Gingharian sa Diyos?

Magbalaan sa ngalan ni Jehova ug magbayaw sa iyang pagkasoberano

Mat. 6:9, 10: “Nan, kamo gayod mag-ampo niining paagiha: ‘Amahan namo nga anaa sa mga langit, pagadayegon unta ang imong ngalan. Moabot unta ang imong gingharian.’” (Dinhi ang pagbalaan sa ngalan sa Diyos nalambigit gayod sa pag-abot sa iyang Gingharian.)

Ezek. 38:23: “Ako magapadako gayod sa akong kaugalingon ug magabalaan sa akong kaugalingon ug magapaila sa akong kaugalingon atubangan sa mga mata sa daghang kanasoran; ug sila makaila gayod nga ako mao si Jehova.” (Ang ngalan sa Diyos pagahinloan sa tanang pasipala; pagatagdon kana ingong balaan ug takos sa pagtahod, ug ang tanan nga mabuhi maoy mga tawo kinsa mahinangpon sa pagbayaw sa pagkamagmamando ni Jehova, nga nagakalipay sa pagbuhat sa iyang kabubut-on. Sa maong kabayawan sa ngalan ni Jehova nga magadepende ang kalinaw ug kaayohan sa tibuok nga uniberso.)

Taposon ang gitugotang pagmando ni Satanas ibabaw sa kalibotan

Pin. 20:2, 3: “Siya [ang langitnong Hari, si Jesu-Kristo] midakop sa dragon, ang orihinal nga serpente, nga mao ang Yawa ug  Satanas, ug gigapos siya alang sa usa ka libo ka tuig. Ug iyang gitambog siya ngadto sa bung-aw ug gisirhan kini ug gitimrihan kini sa ibabaw niya, aron siya dili na makapahisalaag sa kanasoran hangtod matapos ang usa ka libo ka tuig. Human niining mga butanga siya kinahanglang buhian sa makadiyot.” (Busa ang katawhan makalingkawas gikan sa satanasnong impluwensiya nga nagapalisod kaayo sa kinabuhi alang sa katawhan kinsa buot sa pagbuhat kon unsa ang matarong. Mahanaw na ang yawan-ong impluwensiya nga nagpahinabo sa mga buhat nga sobrang pagkapintas ug ang demonyohanong impluwensiya nga naglimin sa mga kinabuhi sa daghan uban ang kahadlok.)

Magpahiusa sa tanang linalang sa pagsimba sa bugtong matuod nga Diyos

Pin. 5:13; 15:3, 4: “Ug ang tanang binuhat nga atua sa langit ug sa ibabaw sa yuta ug sa ilalom sa yuta ug anaa sa dagat, nadungog ko nga nag-ingon: ‘Ngadto sa Usa nga naglingkod sa trono [Jehova nga Diyos] ug ngadto sa Kordero [Jesu-Kristo] ang pagbulahan ug ang kadungganan ug ang himaya ug ang gahom hangtod sa kahangtoran.’” “Dako ug kahibulongan ang imong mga buhat, Jehova nga Diyos, ang Labing Gamhanan. Matarong ug matuod ang imong mga paagi, Hari sa walay kataposan. Kinsa man gayoy dili mahadlok kanimo, Jehova, ug maghimaya sa imong ngalan, tungod kay ikaw lamang ang maunongon? Kay ang tanang kanasoran mangabot ug magasimba sa imong atubangan, kay gikapadayag na man ang imong matarong nga mga hukom.”

Pagpasig-uli sa katawhan ngadto sa mausahong relasyon uban sa Diyos

Roma 8:19-21: “Ang kabuhatan [katawhan] mahinamong nagapaabot sa pagkapadayag sa mga anak sa Diyos [ang pamatuod nga silang gibanhaw ngadto sa langitnong kinabuhi uban ni Kristo Jesus milihok na ingong mga magmamando]. Kay ang kabuhatan nailalom sa kakawangan, dili tungod sa kaugalingong pagbuot niini kondili tungod kaniya nga nagpailalom niana, pinasukad sa paglaom nga ang kabuhatan mismo [katawhan sa kasagaran] mahigawas usab gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”

Pagluwas sa katawhan gikan sa tanang hulga sa gubat

Sal. 46:8, 9: “Umari, kamong katawhan, tan-awa ang mga buhat ni Jehova, kon giunsa niya sa paghimo ang makapatingalang mga hitabo ibabaw sa yuta. Siya nagapahunong sa mga gubat hangtod sa kinatumyan sa yuta.”

 Isa. 2:4: “Ila gayong pagasalsalon ang ilang mga espada ngadto sa mga punta sa daro. Ang nasod dili na mobakyaw ug espada batok sa nasod, ni sila makakat-on pa sa gubat.”

Paghinlo sa yuta sa daotang mga magmamando ug pagdaugdaog

Sal. 110:5: “Si Jehova mismo sa imong tuong kamot magadugmok gayod sa mga hari sa adlaw sa iyang kasuko.”

Sal. 72:12-14: “Siya [kang Jehova nga Mesiyanikong Hari] magaluwas sa timawa nga nagatuaw sa panabang, sa kabos usab ug kang bisan kinsa nga walay magtatabang. Siya maluoy sa alaot ug timawa, ug ang mga kalag sa mga timawa iyang pagaluwason. Pagaluwason niya ang ilang kalag gikan sa pagdaugdaog ug panlupig, ug ang ilang dugo hamili sa iyang panan-aw.”

Pagtagana ug dagayang pagkaon alang sa tanang katawhan

Sal. 72:16: “Aduna unyay daghang trigo ibabaw sa yuta; sa ibabaw sa kabukiran adunay pag-awas.”

Isa. 25:6: “Si Jehova sa mga panon magahimo gayod alang sa tanang mga katawhan, niining bukira [sa langitnong Bukid Sion, ang kaulohan sa Gingharian sa Diyos, ginahimo ang tagana alang sa yutan-ong mga ginsakpan niana], ug usa ka kombira sa matambok nga mga pagkaon, usa ka kombira sa bino nga pinalugdang, sa matambok nga mga pagkaon nga puno sa utok sa bukog, sa bino nga pinalugdang, maayong pagkaitos.”

Pagwagtang sa sakit ug pagkabaldado sa tanang matang

Luc. 7:22; 9:11: “Lakaw kamo, suginli si Juan sa inyong nakita ug nadungog: ang mga buta makakita na, ang mga bakol makalakaw na, ang mga sanlahon nangahinlo na ug ang mga bungol makadungog na, ang mga patay gipamanhaw, ang mga kabos gisuginlan sa maayong balita.” “Siya [Jesu-Kristo] midawat kanilang maluloton ug misugod sa pagsugilon kanila bahin sa gingharian sa Diyos, ug iyang gipang-ayo silang mga ayohonon.” (Busa gipasundayag ni Jesus kon unsa ang iyang mahimo ingong langitnong Hari alang sa katawhan.)

Pagtaganag angayng mga puloy-anan alang sa matag usa

Isa. 65:21, 22: “Sila gayod magatukod ug mga balay ug magapuyo niini; ug sila gayod magatanom ug mga kaparasan ug makakaon sa bunga niini. Sila dili magatukod ug unya lain ang magapuyo; sila dili magatanom ug unya lain ang magakaon.”

 Pagseguro sa makatagbaw nga trabaho alang sa tanan

Isa. 65:23: “Sila dili magabuhat nga walay kapuslanan, ni manganak sila sa kagul-anan; tungod kay sila mao ang kaliwatan sa mga gipanalanginan ni Jehova, ug ang ilang kaliwatan magauban kanila.”

Paggarantiya ug kasegurohan, kagawasan gikan sa kapeligrohan sa pagkatawo sa usa o propyedad

Miq. 4:4: “Sila magalingkod gayod, ang tagsatagsa ilalom sa iyang paras ug ilalom sa iyang kahoyng igos, ug walay magahadlok kanila; kay ang baba gayod ni Jehova sa mga panon ang nagsulti niini.”

Sal. 37:10, 11: “Sa dili na gayod madugay, ang daotan mawala na, ug tino nga susihon mo ang iyang dapit, ug siya mawagtang na. Apan ang mga maaghop sa ilang kaugalingon magapanunod sa yuta, ug sila gayod makakaplag sa ilang bug-os nga kalipay diha sa kadagaya sa pakigdait.”

Magpahinabo sa pagkamatarong ug hustisya nga mangibabaw

2 Ped. 3:13: “Adunay bag-ong mga langit ug usa ka bag-ong yuta nga kita nagapaabot sumala sa iyang saad, ug diha niini ang pagkamatarong magapabilin.”

Isa. 11:3-5: “Siya [ang Mesiyanikong Hari] dili magahukom sumala sa panan-aw lamang sa iyang mga mata, ni mobadlong sumala sa mabati lamang sa iyang mga igdulungog. Ug uban sa pagkamatarong siya gayod magahukom sa mga kabos, ug uban sa katul-id siya gayod magabadlong alang sa mga maaghop sa yuta. . . . Ug ang pagkamatarong mapamatud-an gayod nga mao ang bakos sa iyang hawak, ug ang pagkamatinumanon mao ang bakos sa iyang lawas.”

Magpanalipod sa katawhan gikan sa bisan unsang kadaot tungod sa mga puwersa sa kinaiyahan

Mar. 4:37-41: “Ug unya miabot ang makusog nga unos, ug ang mga balod mitabontabon sa sakayan, nga tungod niana ang sakayan nagkapuno na sa tubig. . . . Mao nga siya [Jesus] mimata mismo ug gibadlong ang hangin ug miingon sa dagat: ‘Hilom! Hunong!’ Ug ang hangin milurang, ug miabot ang dakong kalinaw. . . . Apan sila gibatig dakong kahadlok, ug nag-ingon sa usag usa: ‘Kinsa ba gayod kini siya, kay bisan ang hangin ug ang dagat mopatuo man kaniya?’” (Busa gipasundayag ni Kristo ang gahom nga siya ingong langitnong Hari magbuot ibabaw sa maong mga butang sa kinaiyahan.)

 Pagbanhaw sa mga patay

Juan 5:28, 29: “Ayawng kahibulong niini, kay ang takna moabot nga silang tanan nga anaa sa handomanang mga lubnganan makadungog sa iyang tingog [ang tingog ni Kristo nga Hari] ug manggula.”

Pin. 20:12: “Nakita ko ang mga patay, mga dagko ug mga gagmay, nga nanagtindog sa atubangan sa trono, ug dihay linukot nga mga basahon nga gibuklad. Pero dihay laing linukot nga basahon nga gibuklad; mao ang linukot nga basahon sa kinabuhi. Ug ang mga patay gipanghukman pinasukad sa mga butang nga nahisulat diha sa linukot nga basahon sumala sa ilang mga binuhatan [binuhatan human sa ilang pagkabanhaw; itandi ang Roma 6:7].”

Pagwagtang sa tanang kamatayon gumikan sa napanunod nga sala ni Adan

Isa. 25:8: “Iyang lamoyon ang kamatayon sa walay kataposan, ug ang Soberanong Ginoong Jehova mopahid gayod sa mga luha gikan sa tanang nawong.”

Pin. 21:4: “Iyang pagapahiran ang tanang luha gikan sa ilang mga mata, ug ang kamatayon mawala na, wala na ing pagbalata ni paghilak ni kasakit pa man. Ang unang mga butang nangagi na.”

Pagtaganag usa ka kalibotan nga ang mga tawo sa tiunay maghigugmaay sa usag usa

Juan 13:35: “Pinaagi niini ang tanan makaila nga kamo akong mga tinun-an [busa, mahalaray sa pagkahimong mga kaubanan ni Jesus sa langitnong Gingharian o yutan-ong ginsakpan sa maong Gingharian], kon kamo adunay gugma sa inyong taliwala.”

Pagpatungha ug mauyonong relasyon sa usag usa sa mga mananap ug mga tawo

Isa. 11:6-9: “Ang lubo mopuyo gayod uban sa laking nating karnero, ug ang leopardo mohigda uban sa nating kanding, ug ang nating baka ug ang anad nating leyon ug ang linaming nga mananap manag-ipon; ug ang usa ka gamayng bata lamang maoy magamando kanila. Ug ang baka ug ang oso sa ilang kaugalingon managsibsib; ang ilang mga nati manag-ipon sa paglubog. Ug bisan ang leyon mosibsib sa kompay sama sa turong baka. Ang masuso nga bata magadula gayod sa lungag sa sawa; ug ang bata nga linutas sa aktuwal mokuot sa langob sa halas nga bahion. Dili nila pagadaoton ni pagagun-obon ang tibuok ko nga bukid nga balaan.” (Usab ang Isaias 65:25)

Os. 2:18: “Nianang adlawa himoon ko ang usa ka tugon uban  sa mabangis nga mananap sa kapatagan ug sa nagalupad nga linalang sa kalangitan ug sa nagakamang nga butang sa yuta, . . . ug pahigdaon ko sila sa kasegurohan.”

Paghimo sa yuta nga usa ka paraiso

Luc. 23:43: “Sa pagkamatuod ako nagaingon kanimo karon, Ikaw mahauban kanako sa Paraiso.”

Sal. 98:7-9: “Padaguoka ang dagat ug ang pagkapuno niana, ang mabungahong yuta ug ang nanagpuyo niini. Papagakpaka ang mga tubig mismo sa ilang mga kamot; sa tingob ang kabukiran mismo papag-awita sa kalipay atubangan ni Jehova, kay siya mianhi sa paghukom sa yuta. Sa pagkamatarong siya magahukom sa mabungahong yuta ug sa mga katawhan uban ang katul-id.”

Itandi ang Genesis 1:28; 2:15; Isaias 55:11.

Kanus-a nagsugod sa pagmando ang Gingharian sa Diyos?

Nagsugod ba kana sa pagmando sa unang siglo?

Col. 1:1, 2, 13: “Si Pablo, apostol ni Kristo Jesus pinaagi sa kabubut-on sa Diyos, ug si Timoteo nga atong igsoon nganha sa mga balaan [sila nga mga manununod sa langitnong Gingharian] . . . Siya [Diyos] mao ang nagluwas kanato gikan sa kagahom sa kangitngit ug naglalin kanato [ang mga balaan, mga membro sa Kristohanong kongregasyon] ngadto sa gingharian sa Anak sa iyang gugma.” (Busa si Kristo, diay, nagsugod sa pagmando ibabaw sa Kristohanong kongregasyon sa unang siglo, sa wala pa kini masulat, apan ang pagkatukod sa Gingharian aron sa pagmando ibabaw sa tibuok nga yuta sa umaabot pa.)

1 Cor. 4:8: “Kamong mga tawhana nangatagbaw na, mao ba? Kamo nangadato na, tinuod ba? Kamo nagsugod na sa pagmando ingong mga hari nga wala kami, dili ba? Ug buot ko gayod nga kamo unta nagsugod na sa pagmando ingong mga hari, aron usab kami magamando ingong mga hari uban kaninyo.” (Maoy dayag nga si apostol Pablo nagbadlong kanila tungod sa paghupot sa sayop nga panghunahuna.)

Pin. 12:10, 12: “Karon miabot na ang kaluwasan ug ang gahom ug ang gingharian sa atong Diyos ug ang pagbulot-an sa iyang Kristo, kay gikatambog na ang magsusumbong sa atong kaigsoonan, kinsa nagasumbong kanila sa adlaw ug gabii atubangan sa atong Diyos! Tungod niini managkalipay, kamo nga kalangitan ug kamo nga nagapuyo niini! Alaot ang yuta ug ang dagat, kay diha kaninyo ang Yawa nahilusad, nga adunay dakong  kasuko, sanglit nasayod nga hamubo na ang iyang panahon.” (Ang pagkatukod sa Gingharian sa Diyos gilambigit dinhi sa pagtambog kang Satanas gikan sa langit. Kini wala mahitabo sa panahon sa pag-alsa didto sa Eden, ingon sa gipakita sa Job kapitulo 1, 2. Girekord ang Pinadayag sa 96 K.P., ug ang Pinadayag 1:1 nagapakita nga kini nagahisgot sa mga hitabo nga sa maong panahon umaabot pa.)

Kinahanglan ba nga ang pagsugod sa pagmando sa Gingharian sa Diyos maghulat sa pagkakabig sa kalibotan?

Sal. 110:1, 2: “Ang pulong ni Jehova ngadto sa akong Ginoo [Jesu-Kristo] mao: ‘Lumingkod ka sa akong tuong kamot hangtod ikabutang ko ang imong mga kaaway ingong tumbanan sa imong mga tiil.’ Ang baras sa kalig-on igapadala ni Jehova gikan sa Sion, nga nag-ingon: ‘Maghari ka sa taliwala sa imong mga kaaway.’” (Busa aduna siya ing mga kaaway nga pagamandoan; dili ang tanan magpasakop sa iyang pagmando.)

Mat. 25:31-46: “Sa dihang moabot na ang Anak sa tawo [Jesu-Kristo] diha sa iyang himaya, ug ang tanang manulonda uban kaniya, unya siya molingkod diha sa iyang mahimayaong trono. Ug sa iyang atubangan pagatigomon ang tanang kanasoran, ug iyang pagalainon ang mga tawo gikan sa usag usa, sama gayod sa usa ka magbalantay nga magalain sa mga karnero gikan sa mga kanding. . . . Ug kini sila [kinsa nagpakitag walay gugma sa iyang dinihogang mga igsoon] mamahawa ngadto sa walay kataposang pagkawagtang, apan ang mga matarong ngadto sa walay kataposang kinabuhi.” (Maoy dayag, dili ang tanang katawhan mangakabig antes si Kristo molingkod sa iyang trono; dili ang tanan magpamatuod nga mga matarong.)

Nagabutyag ba ang Bibliya sa panahong ang Gingharian mosugod sa pagmando niini?

Tan-awang mga panid 333-336, ubos sa lintunganayng ulohang “Mga Petsa,” ug mga panid 121-126, ubos sa “Kataposang mga Adlaw.”

Kon Adunay Moingon—

‘Dili kana mahitabo sa akong tibuok kinabuhi’

Mahimong tubagon mo: ‘Apan mahitabo kana sa tibuok kinabuhi sa laing tawo, di ba no? . . . Aduna bay makaarang sa pagkasayod nga kining kaliwatana mao ang makakita niana?  Ang mga apostol mismo ni Jesus buot masayod niana, ug ang tubag nga iyang gihatag kanila hinungdanon kaayo alang kanato karon. (Mat. 24:3-14; Luc. 21:29-32)’

O ikaw makaingon: ‘Kanang panghunahunaa sagad kaayo. Apan ang mga Saksi ni Jehova malig-ong nagatuo, pinasukad sa Bibliya, nga ang Gingharian sa Diyos nagamando na sa kalangitan ug busa anaa ra kanato karon sa pagpakita kon kita ba gustong magpadayon sa pagkabuhi [pagpuyo] ibabaw sa yuta ubos sa matarong nga kagamhanan sa Diyos o dili gusto. Maoy hinungdan nga ako mianhi sa imong pultahan karon. Matikdi ang giingon dinhi sa Mateo 25:31-33.’