Kalibotan

Kahubitan: Sa dihang hubaron gikan sa Gregong pulong koʹsmos, ang “kalibotan” mahimong magkahulogang (1) katawhan sa katibuk-an, nga nahimulag gikan sa ilang moral nga kahimtang o dalan sa kinabuhi, (2) ang gambalay sa tawhanong mga kahimtang nga nganha niana ang usa ka tawo nahimugso ug niana siya nagakinabuhi, o (3) ang masa (kinabag-an) sa katawhan nga nahimulag gikan sa inuyonang mga alagad ni Jehova. Ang pipila sa mga taghubad sa Bibliya mipasabot ug dili hustong mga impresyon pinaagig paggamit usab sa “kalibotan” ingong katumbas sa Gregong mga termino nga nagkahulogang “yuta,” “pinuy-anang yuta,” ug “sistema sa mga butang.” Ang mosunod nga panaghisgot mopunting sa lintunganayng pagtagad sa ikatulo sa ginumerohang mga kahulogan sa “kalibotan” ingon sa gibutyag sa itaas.

Ang kalibotan ba pagalaglagon pinaagig kalayo?

2 Ped. 3:7: “Pinaagi sa samang pulong [sa Diyos] ang mga langit ug ang yuta nga karon nagalungtad gitagana alang sa kalayo ug ginatipigan alang sa adlaw sa paghukom ug sa kalaglagan sa mga tawong dili diyosnon.” (Matikdi nga ang “mga tawong dili diyosnon,” dili ang katawhan sa katibuk-an, ang pagalaglagon. Sa susama, ang 2Pe 3 bersikulo 6 nagapunting sa kalaglagan sa “kalibotan” sa adlaw ni Noe. Ang daotang mga tawo gipanglaglag, apan ang yuta ingon man ang mahadlokon-Diyos nga Noe ug iyang panimalay nagpabilin. Ang “kalayo” ba sa umaabot nga adlaw sa paghukom maoy literal, o kana ba simboliko sa kompletong kalaglagan? Unsang epekto ang mahimo sa literal nga kalayo sa maong literal langitnong mga planeta ingon nga kini mainit na kaayong adlaw ug mga bituon? Alang sa dugang pagtagad niining tekstoha, tan-awang mga panid 434-437, ubos sa “Yuta.”)

Prov. 2:21, 22: “Ang mga matul-id mao ang magapuyo sa yuta, ug ang mga maputli mao ang magapabilin diha niana. Mahitungod sa mga daotan, sila pagaputlon gikan gayod sa yuta; ug sa mga mabudhion, sila pagalukahon gikan niana.”

Kinsa ang nagamando niining kalibotana—Diyos o si Satanas?

Dan. 4:35: “[Ang Labing Hataas nga Diyos, si Jehova,] nagabuhat sumala sa iyang kaugalingong kabubut-on taliwala sa mga panon sa kalangitan ug sa mga pumoluyo sa yuta. Ug walay makapugong sa iyang kamot o makasulti kaniya, ‘Unsay imong ginabuhat?’” (Diha sa susamang punto, ang Jeremias 10:6, 7 nagapunting kang Jehova ingong “Hari sa kanasoran” tungod kay siya ang  Labaw-kaayong Hari, ang usa nga makabarog ug makahimong patubagon ang mga hari ug mga nasod maylabot sa ilang pagmando. Ingon nga mao ang Maglalalang sa yuta, si Jehova mao ang angay nga Magmamando; siya sa bisan unsang panahon wala mobiya sa maong katungdanan.)

Juan 14:30: “[Si Jesus miingon:] Ang magmamando sa kalibotan moabot na. Ug siya walay labot kanako.” (Dayag nga kining magmamandoa dili si Jehova nga Diyos, kansang kabubut-on maunongong gituman ni Jesus kanunay. Kining “magmamando sa kalibotan” kinahanglang mao “ang daotan,” si Satanas nga Yawa, kansang gahom “ang tibuok kalibotan anaa,” ingon sa gihisgotan sa 1 Juan 5:19. Bisan tuod ang katawhan nagapuyo sa planeta nga iya sa Diyos, ang kalibotan nga gilangkoban sa mga tawo kinsa dili masinundanong mga alagad ni Jehova maoy ubos sa pagmando ni Satanas tungod kay ang maong mga tawo nagasunod man kaniya. Sila nga kinasingkasing nagapasakop sa pagmando ni Jehova dili bahin nianang kalibotana. Itanding 2 Corinto 4:4.)

Pin. 13:2: “Ang dragon [Satanas nga Yawa] mihatag ngadto sa mananap sa iyang gahom ug sa iyang trono ug dakong pagbulot-an.” (Ang pagtandi sa kahubitan niining “mananapa” uban sa Daniel 7 magbutyag nga kini nagarepresentar sa tawhanong gobyerno, dili lang sa usa sa maong gobyerno kondili ang tibuok-kalibotang sistema sa politikal nga pagmando. Nga si Satanas mao ang magmamando niini nagauyon sa Lucas 4:5-7, ingon man sa Pinadayag 16:14, 16, nga nagahulagway sa demonyohanong mga pulong nga nagatultol sa mga magmamando sa tibuok yuta ngadto sa gubat batok sa Diyos sa Armageddon. Ang pagmando ni Satanas sa kalibotan ginatugotan lamang sa Diyos hangtod ang Iyang tinudlong panahon moabot sa pagsulbad sa gumonhap sa unibersohanong pagkamagmamando.)

Pin. 11:15: “Sa langit dihay makusog nga mga tingog, nga nag-ingon: ‘Ang gingharian sa kalibotan nahimo gayong gingharian sa atong Ginoo [si Jehova] ug sa iyang Kristo.’” (Nahitabo kini sa 1914, ang pagsugod sa “kataposang mga adlaw” alang sa karong daotang sistema. Ang usa ka bag-ong kapahayagan sa pagkamagmamando ni Jehova mitungha, sa maong panahon pinaagi sa iyang kaugalingong Anak ingong Mesiyanikong Magmamando. Sa dili madugay ang daotang kalibotan pagalaglagon, ug si Satanas, nga daotang espiritung magmamando niini, igatambog sa bung-aw, nga dili na makaimpluwensiya sa katawhan.)

Unsa ang tinamdan sa matuod nga mga Kristohanon ngadto sa kalibotan ug sa mga tawo nga bahin sa maong kalibotan?

Juan 15:19: “Kamo [mga sumusunod ni Jesus] dili man bahin  sa kalibotan, apan gipili ko kamo gikan sa kalibotan.” (Busa ang matuod nga mga Kristohanon dili bahin sa masa o kadaghanan sa tawhanong katilingban nga nahilayo sa Diyos. Sila nagaatiman sa naandang tawhanong mga buluhaton, apan sila nagalikay sa mga tinamdan, sinultihan, ug pamatasan nga nagapaila sa kalibotan ug nga kana nahasupak sa matarong mga paagi ni Jehova.) (Tan-awang mga panid 269-275, usab ang 177-180.)

Sant. 4:4: “Mga mananapaw, wala ba kamo masayod nga ang pagpakighigala sa kalibotan maoy pakig-away batok sa Diyos? Busa, bisan kinsa nga buot mahigala sa kalibotan nagahimo sa iyang kaugalingon nga kaaway sa Diyos.” (Sanglit kay ang mga Kristohanon dili hingpit, sila usahay mabulingan pinaagig mga kontak sa kalibotan. Apan sa dihang tambagan gikan sa Pulong sa Diyos, sila nagahinulsol ug nagatul-id sa ilang mga paagi. Apan, kon ang pipila, pinaagig tinuyo nga pagpili, makig-anib sa ilang kaugalingon sa kalibotan o mosundog sa espiritu niana, sila nagapakita nga dili na sila matuod nga mga Kristohanon kondili mahimong bahin sa kalibotan nga kaaway sa Diyos.)

Roma 13:1: “Tugoting ang tanang kalag magpasakop sa superyor nga mga awtoridad, kay walay laing awtoridad gawas sa Diyos; ang nagalungtad nga mga awtoridad nahimutang diha sa ilang relatibong mga kahimtang pinaagi sa Diyos.” (Kadtong nagasunod niining tambaga dili mga rebelde, nga nagapanlimbasog sa pagpukan sa mga gobyerno sa kalibotan. Sila nagapasakop sa ilang kaugalingon sa awtoridad sa politikanhong mga magmamando, nagasunod kanila basta ang mga ginapatuman sa maong mga magmamando dili supak sa mga tulomanon sa Diyos. Ang maong mga gobyerno nakita nang daan ug gitagna na sa Diyos. Sila nagamando, dili tungod kay siya ang naghatag ug gahom kanila, kondili pinaagi sa iyang pagtugot. Sa iyang gitakdang panahon siya usab magawagtang kanila.)

Gal. 6:10: “Sa mabatonan ta ang kahigayonan alang niana, buhaton ta ang maayo ngadto sa tanan, apan ilabina kanila nga may kalabotan kanato sa pagtuo.” (Busa, ang matuod nga mga Kristohanon dili mohikaw sa pagbuhat ug maayo ngadto sa ilang mga isigkatawo. Sila nagasundog sa Diyos, kinsa nagapasubang sa adlaw ibabaw sa mga tawong daotan ug maayo.—Mat. 5:43-48.)

Mat. 5:14-16: “Kamo mao ang kahayag sa kalibotan. . . . Pasigaa ang inyong kahayag atubangan sa mga tawo, aron makita nila ang inyong maayong mga buhat ug dayegon nila ang inyong Amahan nga atua sa mga langit.” (Para ang uban makadayeg sa Diyos tungod sa ginabuhat sa mga Kristohanon, maoy dayag nga silang mga Kristohanon kinahanglang mahimong aktibong mga saksi ngadto sa kalibotan maylabot sa ngalan ug katuyoan sa Diyos.  Maoy alang niining buluhatona nga ang matuod nga mga Kristohanon nagahatag ug unang pasiugda.)

Unsa ang kahulogan sa presenteng mga kahimtang sa kalibotan?

Tan-awa ang lintunganayng ulohang “Kataposang mga Adlaw.”