Lukat

Kahubitan: Ang bili nga gibayad aron lukaton o pagawason gikan sa pipila ka obligasyon o sa dili maayong kahimtang. Ang labing hinungdanong bili sa lukat mao iya sa giulang dugo ni Jesu-Kristo. Pinaagi sa pagbayad sa bili sa maong lukat didto sa langit, si Jesus  nagbukas sa dalan alang sa mga anak ni Adan nga maluwas gikan sa sala ug kamatayon nga kitang tanan nakapanunod niana tungod sa sala sa atong katigulangan nga si Adan.

Sa unsang paagi ang kamatayon ni Jesu-Kristo lahi sa uban nga nahimong mga martir?

Si Jesus usa ka hingpit nga tawo. Nahimugso siya nga walay bisan unsang lama sa sala ug gihuptan niya kanunay ang maong kahingpitan sa tibuok niyang kinabuhi. “Siya wala makasala.” Siya “putli, nahilain gikan sa mga makasasala.”—1 Ped. 2:22; Heb. 7:26.

Siya ang talagsaong Anak sa Diyos. Ang Diyos mismo nagpamatuod niini nga nadungog gikan sa mga langit. (Mat. 3:17; 17:5) Kining maong Anak nagkinabuhi na kanhi didto sa langit; pinaagi kaniya ang Diyos mipatungha sa tanang ubang mga personang linalang ug mga butang sa tibuok nga uniberso. Aron sa pagtuman sa Iyang kabubut-on, ang Diyos sa milagrosong paagi mibalhin sa kinabuhi niining maong Anak ngadto sa tagoangkan sa usa ka ulay nga babaye aron siya ikahimugso ingong tawo. Aron ipasiugda nga siya gayod nahimong usa ka tawo, si Jesus mipunting sa iyang kaugalingon ingong Anak sa tawo.—Col. 1:15-20; Juan 1:14; Luc. 5:24.

Dili siya kay walay gahom atubangan sa iyang mga berdugo. Siya miingon: “Ako magahalad sa akong kinabuhi . . . Walay tawo nga makakuha niini gikan kanako, kondili ginahalad ko kini sa akong kaugalingong pagbuot.” (Juan 10:17, 18) Midumili siya nga hangyoon ang manulondaanong mga puwersa aron makiglabot alang kaniya. (Mat. 26:53, 54) Bisan tuod ang daotang mga tawo gitugotan sa pagtuman sa ilang mga laraw sa pagpatay kaniya, ang iyang kamatayon tinuod nga haladnon.

Ang iyang giulang dugo adunay bili sa pagtaganag kaluwasan alang sa uban. “Ang Anak sa tawo mianhi, dili aron pagaalagaron, kondili sa pag-alagad ug paghatag sa iyang kalag nga lukat ilis sa daghan.” (Mar. 10:45) Busa ang iyang kamatayon mas labaw kay sa pagkasinakit lamang tungod sa pagdumiling makigkompromiso sa iyang mga pagtulon-an.

Tan-awa usab ang mga panid 257, 258, ubos sa ulohang “Memoryal.”

Nganong gikinahanglang itagana ang lukat sa paagi nga pareho kanhi aron kita makabaton ug kinabuhing dayon?

Roma 5:12: “Pinaagi sa usa ka tawo [si Adan] ang sala misulod sa kalibotan, ug busa ang kamatayon mikaylap sa tanang tawo  sanglit ang tanan nanagpakasala.” (Bisan unsaon nato sa pagkinabuhi nga matarong, kitang tanan pulos mga makasasala gikan sa pagkahimugso. [Sal. 51:5] Walay paagi nga mahimong atong ingnong hinagoan ang katungod sa pagkabuhi sa walay kataposan.)

Roma 6:23: “Ang bayad sa sala mao ang kamatayon.”

Sal. 49:6-9: “Silang mga nanagsalig sa ilang katigayonan, ug padayong nangandak sa ilang kaugalingon sa kadaghan sa ilang mga bahandi, walay bisan kinsa kanila ang makahimo sa pagluwas bisan sa igsoon, ni makahatag sa Diyos ug usa ka lukat alang kaniya; (ug ang bili sa pagtubos sa ilang kalag maoy bililhon uyamot nga kana wala magpulos sa panahong walay katinoan) nga siya gayod magkinabuhi sa kanunay ug dili makakita sa gahong.” (Walay dili hingpit nga tawo ang makataganag paagi sa pagluwas kang bisan kinsa gikan sa sala ug kamatayon. Ang iyang salapi dili makapalit sa kinabuhing dayon, ug ang iyang kalag ipahiluna sa kamatayon, ingong bayad nga modangat kaniya tungod sa sala, mahimong walay bili sa pagluwas kang bisan kinsa.)

Ngano ang Diyos wala na lang maghimog lagda nga, bisan tuod si Adan ug Eva kinahanglang mamatay tungod sa ilang pag-alsa, ang tanan sa ilang mga anak nga magmasinugtanon sa Diyos mahimong mabuhi sa walay kataposan?

Tungod kay si Jehova maoy “mahigugmaon sa pagkamatarong ug hustisya.” (Sal. 33:5; Deut. 32:4; Jer. 9:24) Busa, ang iyang paagi sa pagdumala sa situwasyon nagbayaw sa iyang pagkamatarong, nakakab-ot sa panginahanglan sa absolutong hustisya, ug, sa samang panahon, nagpadako sa iyang gugma ug kaluoy. Sa unsang paagi nga naingon niana?

(1) Si Adan ug Eva wala makapatunghag mga anak sa wala pa sila makasala, busa walay nahimugso nga hingpit. Ang tanang mga anak ni Adan gipanganak sa sala, ug ang sala mohatod sa kamatayon. Kon kini wala lang panumbalinga ni Jehova, kadto mao untay pagsalikway sa iyang kaugalingong matarong nga mga suntoan. Dili kana mahimo sa Diyos ug sa ingon mahimong kauban sa pagkadaotan. Wala niya isalindot ang mga kinahanglanon sa absolutong hustisya; busa walay intelihenteng linalang nga sa bisan unsang panahon makakaplag gayod ug kasaypanan niining bahina.—Roma 3:21-26.

(2) Nga wala magsalikway sa mga kinahanglanon sa hustisya, sa unsang paagi ang tagana mahimo sa pagluwas kanilang mga anak ni Adan kinsa magpasundayag ug mahigugmaong pagkamasinundanon kang Jehova? Kon ang usa ka hingpit nga tawo magpakamatay man sa haladnong paagi, ang hustisya magpatugot sa maong hingpit nga kinabuhi sa pagtaganag lukat alang sa mga  sala niadtong pinaagi sa pagtuo modawat sa maong tagana. Tungod kay ang sala sa usa ka tawo (nga iya ni Adan) maoy nakaingon sa pagpakasala sa tibuok tawhanong banay, ang giulang dugo sa laing hingpit nga tawo (kon maohon, iya sa ikaduhang Adan), ingon nga katumbas nga bili, makabalanse sa mga timbangan sa hustisya. Sanglit kay si Adan usa man ka makasasala nga tinuyo, siya dili makabenepisyo; apan kay ang balayranan nga ang tanang katawhan magabayad alang sa sala pagabayran man niining paagiha sa laing tawo, ang mga anak ni Adan mahimo mang maluwas. Pero walay hingpit nga tawo sa maong matang. Ang katawhan dili gayod makakab-ot sa mga kinahanglanon sa absolutong hustisya. Busa, ingong pasundayag sa kahibudngang gugma ug dakong personal nga bili, si Jehova mismo mihimo sa maong tagana. (1 Cor. 15:45; 1 Tim. 2:5, 6; Juan 3:16; Roma 5:8) Ang bugtong Anak sa Diyos nahinangop sa pagbuhat sa iyang bahin. Nga mapainubsanong mibiya sa iyang langitnong himaya ug nahimong hingpit nga tawo, si Jesus nagpakamatay alang sa katawhan.—Filip. 2:7, 8.

Ilustrasyon: Ang ulo sa pamilya hayan mahimong kriminal ug hukman sa kamatayon. Ang iyang mga anak mahimong makaluluoy, nga nalubong sa utang. Tingali ang ilang malulotong apohan makiglabot sa ilang kaayohan, nga maghimog tagana pinaagi sa usa ka anak nga lalaki nga nagapuyo uban kaniya aron sa pagbayad sa ilang mga utang ug sa pagbukas alang kanila sa posibilidad sa usa ka bag-ong kinabuhi. Siyempre, aron makabenepisyo, ang mga anak kinahanglang modawat sa maong kahikayan, ug ang apohan hayan sa makataronganong paagi mopatuman sa pipila ka butang ingong pasalig nga ang maong mga anak dili mosundog sa dalan sa ilang amahan.

Ngadto kang kinsa nga unang gipadapat ang merito sa halad ni Jesus, ug uban sa unsang tumong?

Roma 1:16: “Ang maayong balita [mahitungod kang Jesu-Kristo ug sa iyang papel sa katuyoan ni Jehova] . . . maoy, sa pagkamatuod, ang gahom sa Diyos alang sa kaluwasan sa matag usa nga may pagtuo, ngadto sa mga Hudiyo una ug usab ngadto sa mga Grego.” (Ang imbitasyon aron makabenepisyo gikan sa tagana alang sa kaluwasan pinaagi ni Kristo gipaabot una ngadto sa mga Hudiyo, dayon ngadto sa mga dili Hudiyo.)

Efe. 1:11-14: “Nga nahiusa uban [kang Kristo] kita [mga Hudiyo, apil ang apostol nga si Pablo] natudlo usab ingong mga manununod [mga Manununod sa unsa? Sa langitnong Gingharian] . . . aron kita magaalagad gayod alang sa pagdayeg sa iyang himaya, kita nga unang nanaglaom diha kang Kristo. Apan kamo usab [mga Kristohanon nga gikuha sa Hentil nga mga nasod, sama sa daghan didto sa Efeso] naglaom diha kaniya human kamo makadungog  sa pulong sa kamatuoran, sa maayong balita bahin sa inyong kaluwasan. Pinaagi kaniya usab, human kamo motuo, kamo gitimrihan pinaagi sa gisaad nga balaang espiritu, nga mao ang patinga sa atong panulondon, alang sa katuyoan sa pagluwas pinaagig usa ka lukat nga kaugalingong kabtangan sa Diyos, alang sa iyang mahimayaong pagdayeg.” (Ang maong panulondon, ingon sa gipakita sa 1 Pedro 1:4, gireserba didto sa mga langit. Ang Pinadayag 14:1-4 nagapakita nga kadtong makaambit niana may gidaghanong 144,000. Uban ni Kristo, kini sila mag-alagad ingong mga hari ug mga saserdote ibabaw sa katawhan alang sa 1,000 ka tuig, nga sulod sa maong panahon mamatuman ang katuyoan sa Diyos alang sa yuta nga mahimong usa ka paraiso nga pagapun-on sa hingpit nga mga anak sa unang tawhanong paris.)

Kinsa pa sa atong mga adlaw ang makatagamtam sa mga kaayohan gikan sa halad ni Jesus?

1 Juan 2:2: “Siya [si Jesu-Kristo] mao ang halad-pasig-uli alang sa atong mga sala [nga iya ni apostol Juan ug sa ubang dinihogan-espiritu nga mga Kristohanon], apan dili lamang sa atong mga sala kondili usab alang sa tibuok kalibotan [ang uban sa katawhan, kanilang ang paglaom sa kinabuhing dayon ibabaw sa yuta mahimong posible pinaagi niana].”

Juan 10:16: “Ako adunay ubang mga karnero, nga dili sakop niining torila; kinahanglang pagadad-on ko usab sila, ug sila magapatalinghog sa akong tingog, ug sila mahimong usa ka panon, usa ka magbalantay.” (Kining “ubang mga karnero” mapailalom sa mahigugmaong pag-atiman ni Jesu-Kristo samtang ang nanghibilin sa “gamayng panon” sa mga manununod sa Gingharian ania pa gihapon sa yuta; busa ang “ubang mga karnero” ikaanib sa mga manununod sa Gingharian ingong bahin sa “usa ka panon.” Silang tanan magapahimulos sa daghan samang mga benepisyo gikan sa halad ni Jesus, bisan tuod dili gayod pareho, tungod kay aduna man sila ing magkalain nga mga dulnganan.)

Pin. 7:9, 14: “Human niining mga butanga mitan-aw ko, ug, ania karon! ang usa ka dakong panon, nga walay tawo nga arang makaihap, gikan sa tanang kanasoran ug kabanayan ug mga katawhan ug mga pinulongan . . . ‘Mao kini sila ang nanagpakalabang sa dakong kasakitan, ug ilang gilabhan ang ilang tag-as nga mga besti ug gipaputi sa dugo sa Kordero.’” (Busa, ang mga membro niining dakong panon maoy mga buhi sa dihang mosugod ang dakong kasakitan, ug sila adunay mahinlong pagbarog atubangan sa Diyos sanglit kay sila adunay pagtuo sa lukat. Ang pagkamatarong nga isipon alang kanila ingong resulta niini maoy igo alang kanila nga makalabang buhi ibabaw sa yuta latas sa dakong kasakitan.)

 Unsang umaabot nga mga panalangin nga mapahimuslan ingong resulta sa lukat?

Pin. 5:9, 10: “Sila nanag-awit ug usa ka bag-ong awit, nga nag-ingon: ‘Ikaw [ang Kordero, si Jesu-Kristo] takos sa pagkuha sa linukot nga basahon ug sa pag-abli sa mga temri niini, tungod kay ikaw gipatay ug pinaagi sa imong dugo gilukat mo ang mga tawo alang sa Diyos nga gikan sa tanang kabanayan ug pinulongan ug katawhan ug kanasoran, ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.’” (Ang lukat usa ka hinungdanong bahin sa pagbukas sa dalan ngadto sa langitnong kinabuhi alang niadtong magamando uban ni Kristo. Sa dili na madugay ang tanang magmamando sa bag-ong kagamhanan sa yuta mahaadto na sa ilang langitnong mga trono.)

Pin. 7:9, 10: “Ania karon! ang usa ka dakong panon, nga walay tawo nga arang makaihap, gikan sa tanang kanasoran ug kabanayan ug mga katawhan ug mga pinulongan, nga nanagtindog atubangan sa trono ug atubangan sa Kordero [si Jesu-Kristo, kinsa namatay nga maorag korderong gihalad], nanagsul-ob sa tag-as maputi nga mga besti; ug dihay mga palwa sa palmera sa ilang mga kamot. Ug padayon silang nanagsinggit sa makusog nga tingog, nga nag-ingon: ‘Ang kaluwasan gikan sa atong Diyos, kinsa naglingkod sa trono, ug sa Kordero.’” (Ang pagtuo sa halad ni Kristo usa ka hinungdanon kaayong bahin sa kaluwasan niining dakong panon latas sa dakong kasakitan.)

Pin. 22:1, 2: “Ug iyang gipakita kanako ang suba sa tubig sa kinabuhi, nga matin-aw maorag kristal, nga nagaagay gikan sa trono sa Diyos ug sa Kordero latas sa taliwala sa dakong dalan niini. Ug sa matag daplin sa maong suba dihay mga kahoy sa kinabuhi nga adunay napulog duha ka matang sa mga bunga, nagapamunga kini sa matag bulan. Ug ang mga dahon sa maong mga kahoy alang sa pag-ayo sa kanasoran.” (Busa, ang pagpadapat sa bili sa halad sa Kordero sa Diyos, si Jesu-Kristo, usa ka hinungdanong bahin sa tagana nga gihimo sa Diyos aron sa pag-ayo sa katawhan sa tanang epekto sa sala ug magpaarang kanila sa pagpahimulos sa kinabuhing dayon.)

Roma 8:21: “Ang kabuhatan mismo [katawhan] mahigawas usab gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”

Unsa ang gikinahanglan kanato aron dumalayong makabenepisyo gikan sa hingpit nga halad ni Jesus?

Juan 3:36: “Siya nga nagahupot ug pagtuo sa Anak may kinabuhing  walay kataposan; apan ang mosupil sa Anak dili makabaton ug kinabuhi, kondili ang kapungot sa Diyos magapabilin diha kaniya.”

Heb. 5:9: “Human siya [Jesu-Kristo] nahimong hingpit siya ang may kaakohan alang sa walay kataposang kaluwasan niadtong tanan nga magasugot kaniya.”

Unsa ang gibutyag sa tagana sa lukat maylabot sa pagbati ni Jehova sa katawhan?

1 Juan 4:9, 10: “Ang gugma sa Diyos gipadayag sa atong kahimtang pinaagi niini, tungod kay gipadala sa Diyos ang iyang bugtong Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili siya mao ang nahigugma kanato ug nagpadala sa iyang Anak nga halad-pasig-uli alang sa atong mga sala.”

Roma 5:7, 8: “Talagsa ra nga adunay magpakamatay alang sa tawong matarong; sa pagkamatuod, alang sa maayong tawo, tingali, aduna kahay mangako sa pagpakamatay. Apan ang Diyos nagarekomendar sa iyang kaugalingong gugma nganhi kanato mao nga, samtang kita mga makasasala pa, si Kristo nagpakamatay alang kanato.”

Unsang epekto ang mahimo gayod niining taganaha sa paagi sa atong paggamit sa atong mga kinabuhi?

1 Ped. 2:24: “Siya mismo ang midala sa atong mga sala diha sa iyang kaugalingong lawas ngadto sa kahoy, aron kita mamatay ngadto sa mga sala ug mabuhi ngadto sa pagkamatarong.” (Tungod sa tanang nahimo ni Jehova ug sa iyang Anak sa paghinlo kanato gikan sa sala, kita gayod manlimbasog nga makugihon sa pagbuntog sa atong masalaypong mga hilig. Sa bug-os gayod dili masabtan alang kanato kon sa tinuyo buhaton ta kanang atong nahibaloan nga sala!)

Tito 2:13, 14: “Si Kristo Jesus . . . mihatag sa iyang kaugalingon alang kanato aron kita iyang maluwas gikan sa tanang matang sa pagkadaotan ug sa pagputli alang sa iyang kaugalingon sa usa ka katawhan nga iya gayod, nga masiboton sa maayo kaayong mga buhat.” (Ang pagpabili niining maayong tagana kinahanglang magpalihok kanato sa madasigong pagpakig-ambit sa maong mga buluhaton nga gipabuhat ni Kristo sa iyang matuod nga mga sumusunod.)

2 Cor. 5:14, 15: “Ang gugma nga iya ni Kristo nagapatukmod kanato, kay kini mao ang among nahukman, nga may usa ka tawong  nagpakamatay alang sa tanan; mao, diay, ang tanan nangamatay; ug siya namatay alang sa tanan aron sila nga mga buhi magkinabuhi dili na alang sa ilang kaugalingon, kondili alang kaniya kinsa namatay alang kanila ug nabanhaw.”