Pag-ampo

Kahubitan: Masimbahong pagbungat, sa madungog man o sa hilom sa mga hunahuna sa usa, ngadto sa matuod nga Diyos o ngadto sa bakak nga mga diyos.

Nagabati ka ba, sama sa daghan, nga ikaw wala tubaga sa imong mga pag-ampo?

Kinsang mga pag-ampo nga mahinangop ang Diyos sa pagpatalinghog?

Sal. 65:2; Buh. 10:34, 35: “O Tigpatalinghog sa pag-ampo, nganha gayod kanimo manuol ang katawhan sa tanang unod.” “Ang Diyos wala ing pinalabi, apan sa tagsatagsa ka nasod ang tawo nga mahadlok kaniya ug magbuhat sa pagkamatarong iyang gikahimut-an.” (Ang nasyonalidad sa usa, ang iyang kolor sa panit, o iyang ekonomikanhong mga kahimtang dili hinungdanon niining bahina. Apan ang panukbil sa iyang kasingkasing ug iyang paagi sa pagkinabuhi hinungdanon.)

Luc. 11:2: “Sa dihang kamo mag-ampo, mag-ingon, ‘Amahan, pagabalaanon unta ang imong ngalan.’” (Ang imo bang mga pag-ampo gitumong ngadto sa Amahan, siya kansang ngalan giingon sa Bibliya nga Jehova? O, hinuon, ang imong mga pag-ampo ginatumong ba sa “mga santos”?)

Juan 14:6, 14: “Si Jesus miingon kaniya: ‘Ako mao ang dalan ug ang kamatuoran ug ang kinabuhi. Walay makaabot sa Amahan kondili pinaagi kanako. Kon mangayo kamo sa bisan unsang butang diha sa akong ngalan, kini akong buhaton.’” (Nagaampo ka ba diha sa ngalan ni Jesu-Kristo, nga nagaila ingong makasasalang tawo ikaw nagakinahanglan sa iyang pagpataliwala alang sa imong kaayohan?)

 1 Juan 5:14: “Mao kini ang pagsalig nga atong nabatonan kaniya, nga, bisan unsa ang atong pangayoon sumala sa iyang kabubut-on, siya magapatalinghog kanato.” (Aron makabaton sa maong pagsalig, bisan pa niana, kinahanglan unang mahibalo ka sa kabubut-on sa Diyos. Unya paneguroa nga ang imong mga hangyo mahauyon niana.)

1 Ped. 3:12: “Ang mga mata ni Jehova nagasud-ong sa mga matarong, ug ang iyang mga dalunggan gipaabong sa ilang pangamuyo; apan ang nawong ni Jehova batok sa mga nagabuhat ug daotan.” (Naggahin ka ba ug panahon sa pagkat-on kon unsa ang ginaingon ni Jehova pinaagi sa iyang Pulong kon unsay matarong ug kon unsay daotan?)

1 Juan 3:22: “Bisan unsa ang atong pangayoon kita magadawat gikan kaniya, kay kita nagabantay man sa iyang mga sugo ug nagabuhat sa mga butang nga makapahimuot sa iyang mga mata.” (Mao ba gayoy imong tinguha sa pagpahimuot sa Diyos, ug ikaw ba maikagong nagapanlimbasog sa pagtuman sa iyang mga sugo nga imo nang nasayran?)

Isa. 55:6, 7: “Pangitaa si Jehova, kamong katawhan, samtang siya hikaplagan pa. Sangpita siya samtang anaa pa siya sa duol. Pabiyai sa tawong daotan ang iyang dalan, ug sa tawong dili matarong ang iyang mga hunahuna; ug pabalika siya kang Jehova, kinsa maluoy kaniya, ug ngadto sa atong Diyos, kay siya mopasaylo sa madagayaon gayod.” (Nga maluloy-on, si Jehova nagadapit gani sa mga tawong nanagbuhat sa daotang mga butang sa pagtawag kaniya diha sa pag-ampo. Apan, aron maka­hupot sa pag-uyon sa Diyos, sila kinahanglang tim-os nga maghinulsol sa ilang daotang mga paagi ug mga hunahuna ug magbag-o sa ilang dalan.)

Unsay magpahimo sa mga pag-ampo sa usa ka tawo nga dili madawat sa Diyos?

Mat. 6:5: “Sa mag-ampo kamo, ayaw kamo panig-ingon sa mga salingkapaw; kay sila mahigugma sa pag-ampo nga magatindog diha sa mga sinagoga ug sa mga likoanan sa haluag nga mga dalan aron makita sa mga tawo. Sa pagkamatuod nagaingon ako kaninyo, Sila nakadawat na gayod sa ilang balos.” (Usab ang Lucas 18:9-14)

Mat. 6:7: “Sa pag-ampo, ayaw kamo pagyamyam sa mao rang mga pulong, ingon gayod sa ginahimo sa mga tawo sa kanasoran, kay sila nagadahom nga pagadunggon tungod sa ilang paggamit sa daghang mga pulong.”

Prov. 28:9: “Siya nga nagapalingoglingog sa iyang igdulungog gikan sa pagpamati sa kasugoan [sa Diyos]—bisan ang iyang pag-ampo maoy dulumtanan.”

Miq. 3:4: “Sa maong panahon sila managtuaw kang Jehova  alang sa panabang, apan siya dili motubag kanila. Ug siya motago sa iyang nawong gikan kanila nianang panahona, sumala sa daotan nga ilang gihimo sa ilang mga pakiglabot.”

Sant. 4:3: “Kamo nagapangayo, apan wala managpakadawat, kay kamo nagapangayo alang sa daotang katuyoan, aron inyong gastohon kini sa pagtagbaw sa inyong mga pangibog.”

Isa. 42:8, Dy; Mat. 4:10, JB: “Ako, ang Ginoo [“Yahweh,” JB; “Jehovah,” NW]: kini mao ang akong ngalan. Dili ko ihatag ang akong himaya sa uban, ni ang akong pagdayeg sa linilok nga mga butang.” “Kinahanglang simbahon mo ang Ginoo nga imong Diyos [“Jehova nga imong Diyos,” NW], ug siya lamang ang alagaron.” (Usab ang Salmo 115:4-8, o 113:4-8 ikaduhang hugpong sa mga numero diha sa Dy) (Ang pag-ampo usa ka porma sa pagsimba. Kon ikaw mag-ampo atubangan sa linilok nga mga butang, o mga larawan, kana ba magapahimuot sa Diyos?)

Isa. 8:19: “Sa diha nga sila manag-ingon kaninyo: ‘Mangadto kamo niadtong mga espiritista ug mga salamangkero nga managpiyak ug managyagubyob,’ dili ba unta mangadto ang katawhan sa pagpangita sa ilang Diyos? Tungod sa mga buhi pangitaon ba nila ang mga patay?”

Sant. 1:6, 7: “Papadayona siya sa pagpangayo diha sa pagtuo, nga dili gayod magduhaduha, kay siya nga nagaduhaduha sama sa balod sa dagat nga ginahandos ug ginakusokuso sa hangin. Sa pagkamatuod, ayaw ipadahom sa maong tawo nga siya adunay madawat gikan kang Jehova.”

Unsa ang hustong mga butang nga bahin niana igaampo?

Mat. 6:9-13: “Nan, kamo gayod mag-ampo niining paagiha: ‘[1] Amahan namo nga anaa sa mga langit, pagadayegon unta ang imong ngalan. [2] Moabot unta ang imong gingharian. [3] Mamatuman unta ang imong kabubut-on, ingon didto sa langit, mao man usab sa yuta. [4] Ihatag kanamo ang among tinapay alang niining adlawa; ug [5] pasayloa kami sa among mga utang, maingon nga kami usab nakapasaylo sa mga nakautang kanamo. Ug [6] ayaw kamig dad-a sa tentasyon, kondili luwasa kami gikan sa daotang usa.’” (Matikdi nga ang ngalan sa Diyos ug katuyoan kinahanglang pagaunahon.)

Sal. 25:4, 5: “Ipakita mo kanako ang imo mismong mga dalan, O Jehova; tudloi ako sa imo mismong mga alagianan. Tultoli ako sa imong kamatuoran ug tudloi ako, kay ikaw mao ang akong Diyos sa kaluwasan.”

Luc. 11:13: “Kon kamo, bisan daotan, mahibalo sa paghatag ug maayong mga gasa ngadto sa inyong mga anak, unsa ka labaw pa  gayod sa Amahan sa langit sa paghatag sa balaang espiritu ngadto kanila nga nagapangayo kaniya!”

1 Tes. 5:17, 18: “Pag-ampo kamo sa walay hunong. Magmapasalamaton kamo may kalabotan sa tanang butang.”

Mat. 14:19, 20: “[Si Jesus] mikuhag lima ka tinapay ug duha ka isda, ug, sa miyahat sa langit, siya nagpasalamat ug, ug human gipikaspikas ang mga tinapay, iyang gihatag kini ngadto sa mga tinun-an, ug ang mga tinun-an usab mihatag ngadto sa mga panon sa katawhan. Busa ang tanan nangaon ug nangabusog.”

Sant. 5:16: “Mag-ampo alang sa usag usa.”

Mat. 26:41: “Pagtukaw kamo ug mag-ampo nga mapadayonon, aron dili kamo mahasulod sa tentasyon.”

Filip. 4:6: “Ayaw kamo pagkabalaka mahitungod sa bisan unsang butang, apan sa tanang butang pinaagig pag-ampo ug pangamuyo uban ang pagpasalamat ipahibalo ninyo sa Diyos ang inyong mga hangyo.”

Kon Adunay Moingon—

‘Moampo ka una uban kanako, dayon hatagi ko sa imong mensahe’

Mahimong tubagon mo: ‘Nalipay ko sa pagkasayod nga ikaw tawo nga nagapabili sa kahinungdanon sa pag-ampo. Kanunay usab nagaampo ang mga Saksi ni Jehova. Apan adunay gisulti si Jesus kon kanus-a ug kon sa unsang paagi mag-ampo nga mahimong bag-o kanimo. Nasayod ka ba nga iyang gisultihan ang iyang mga tinun-an sa dili paghimog publikong mga pag-ampo uban sa panghunahuna nga makita sa uban nga sila mga debotado, maampoong mga tawo? . . . (Mat. 6:5)’ Dayon tingali modugang: ‘Matikdi kon unsa ang iyang gipadayon sa pagsulti nga maoy unang kabalak-an kanato ug kon unsa gayod ang atong unahon sa atong mga pag-ampo. Mao kana ang akong gianhi nga ipaambit kanimo. (Mat. 6:9, 10)’

O ikaw makaingon: ‘Ako nahibalo nga ang mga hawas gikan sa pipila ka relihiyosong grupo nagabuhat niana. Apan ang mga Saksi ni Jehova nagadumili, tungod kay gisugo ni Jesus ang iyang mga tinun-an sa pagtuman sa ilang buluhaton sa pagsangyaw diha sa laing paagi. Inay kay sa pag-ingon, “Sa mosulod kamo sa balay, mag-ampo una,” matikdi kon unsa ang iyang gisulti, ingon sa makita dinhi sa Mateo 10:12, 13. . . . Ug tan-awa dinhi sa Mat 10 bersikulo 7 kon unsa ang ilang pagahisgotan. . . . Sa unsang paagi kanang Ginghariana makatabang sa mga tawo sama kanimo ug kanako? (Pin. 21:4)’