Pag-ayog mga Sakit

Kahubitan: Pagpahinabo sa usa ka tawo nga masakiton sa lawas, sa pangisip, o sa espirituwal nga makabaton ug kahimsog. Ang pipila sa antes-Kristohanon Hebreohanong mga propeta maingon man kang Jesu-Kristo ug pipila sa mga membro sa unang Kristohanong kongregasyon pinaagig espiritu sa Diyos nakaarang sa paghimog milagrosong pag-ayog mga sakit.

Ang milagroso bang pag-ayog mga sakit sa atong adlaw gihimo pinaagig espiritu sa Diyos?

Mahimo ba nga ang katakos sa paghimog mga milagro magagikan sa laing tinubdan inay kay sa matuod nga Diyos?

Sila si Moises ug Aaron miatubang kang Paraon sa Ehipto aron sa paghangyo nga tugotan ang Israel sa pag-adto sa kamingawan sa paghalad ug mga halad ngadto kang Jehova. Ingong pamatuod sa balaang pagpaluyo, gimandoan ni Moises si Aaron sa pag-itsa sa iyang sungkod ug kadto nahimong dakong halas. Ang maong milagro nahimo pinaagig gahom sa Diyos. Apan ang salamangkerong mga saserdote sa Ehipto mibalibag sa ilang mga sungkod ug kini, usab, nahimong dagkong mga halas. (Ex. 7:8-12) Pinaagi kang kinsang gahom nga sila mipatungha sa ilang milagro?—Itandi ang Deuteronomio 18:10-12.

Sa ika-20 nga siglo ang pipila ka pag-ayog sakit pinaagig pagtuo ginabuhat diha sa mga serbisyo nga gidumala sa kaklerohan sa Kakristiyanohan. Apil sa di-Kristohanong mga relihiyon mao ang voodoo nga mga pari, mga abat-mananambal, mga tawalan, ug uban pa nga nagapanambal; sagad mogamit silag salamangka ug pagpanagna. Ang pipila sa “kalagnong mga mananambal” nagaingon nga ang ilang pagpangayo walay kalabotan sa relihiyon. Niining tanang mga hitaboa, ang gahom ba sa pag-ayo nagagikan sa matuod nga Diyos?

Mat. 24:24: “Motungha ang mini nga mga Kristo ug mini nga mga propeta ug magpakitag dagkong mga ilhanan [“mga milagro,” TEV] ug sa mga katingalahan aron sa pagpasalaag, kon mahimo, bisan pa sa mga pinili.”

Mat. 7:15-23: “Magbantay kamo sa mini nga mga propeta . . . Daghan ang magaingon kanako niadtong adlawa, ‘Ginoo, Ginoo, dili ba naghimo man kamig tagna diha sa imong ngalan, ug naghingilin sa mga demonyo diha sa imong ngalan, ug naghimog daghang katingalahang mga buhat [“mga milagro,” JB, NE, TEV] diha sa imong ngalan?’ Ug unya ako magaingon ngadto kanila:  Wala ko gayod kamo igkaila! Pahawa kanako, kamong mga mamumuhat sa daotan.”

Ang makapapugwat nga mga pag-ayog sakit sa atong adlaw gihimo ba sa samang paagi sa milagrosong mga pag-ayo ni Jesus ug sa iyang unang mga tinun-an?

Bayad sa serbisyo: “Ayoha ninyo ang mga masakiton, banhawa ninyo ang mga tawong patay, hinloi ang mga sanlahon, hinginli ang mga demonyo. Nakadawat kamo nga walay bayad, ihatag nga walay bayad.” (Mat. 10:8) (Nagabuhat ba niana ang mga mananambal karon—nagahatag nga walay bayad, ingon sa gisugo ni Jesus?)

Matang sa kalamposan: “Ang tibuok panon sa katawhan naninguha sa paghikap kaniya [Jesus], kay gikan kaniya may gahom nga migula ug nag-ayo kanilang tanan.” (Luc. 6:19) “Ila ganing gipangdala ang mga masakiton ngadto sa kadalanan, ug gibutang sila sa mga lantay ug mga higdaanan, aron nga, sa inig-agi ni Pedro, basin na lang aduna kanilay mahilandongan sa iyang anino. Labot pa, ang mga panon sa mga tawo gikan sa kasiyudaran nga kasikbit sa Jerusalem padayong nanugok, nga nagdala sa mga tawong masakiton ug sa mga gisakit sa mahugaw nga mga espiritu, ug silang tanan nangaayo.” (Buh. 5:15, 16) (Sa atong adlaw, ang tanan ba nga nagaadto sa relihiyosong mga mananambal o nagaampo sa relihiyosong mga ampoanan nga naninguhang maulian nangaayo?)

Ang sumbanan sa kinabuhi sa mga membro nianang mga organisasyon nga ang “mga mananambal” maoy bahin (sakop) nagapamatuod ba nga sila nakahupot sa espiritu sa Diyos?

Ingong grupo sila ba nagapadayag gayod sa maong mga bunga sa espiritu sama sa gugma, taas-pailob, kalumo, ug pugong-kaugalingon?—Gal. 5:22, 23.

Sila ba gayod “dili bahin sa kalibotan,” nga nagalikay sa pagkalambigit diha sa politikanhong mga kalihokan sa kalibotan? Sila ba nagpabiling mahinlo sa pagkasad-an sa dugo sa panahon sa gubat? Aduna ba silay maayong kadungganan tungod sa paglikay sa mahugaw o daotang kagawian sa kalibotan?—Juan 17:16; Isa. 2:4; 1 Tes. 4:3-8.

Ang matuod nga mga Kristohanon karon mailhan ba pinaagig katakos sa paghimog milagrosong pag-ayog sakit?

Juan 13:35: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Kini  mao ang gisulti ni Jesus. Kon kita gayod nagatuo kaniya, atong pangitaon ang gugma, dili ang milagrosong pag-ayog sakit, ingong ebidensiya sa matuod nga Kristiyanidad.)

Buh. 1:8: “Kamo magadawat ug gahom sa dihang kakunsaran na kamo sa balaang espiritu, ug kamo mahimong akong mga saksi . . . ngadto sa kinatumyang bahin sa yuta.” (Sa hapit na siyang mobiya sa iyang mga apostol aron mobalik ngadto sa langit, si Jesus mipahayag kanila nga kini, dili ang pag-ayog sakit, mao ang hinungdanong buluhatong buhaton nila. Tan-awa usab ang Mateo 24:14; 28:19, 20.)

1 Cor. 12:28-30: “Gipahimutang sa Diyos ang tagsatagsa diha sa kongregasyon, una, mga apostol; ikaduha, mga propeta; ikatulo, mga magtutudlo; unya ang mga milagro; dayon mga hiyas sa pag-ayog mga sakit; mga pagtabang, mga katakos sa pagdumala, nagkalainlaing mga pinulongan. Dili ang tanan mga apostol, sila ba? Dili ang tanan mga propeta, sila ba? Dili ang tanan mga magtutudlo, sila ba? Dili ang tanan nagahimog mga milagro, sila ba? Dili ang tanan adunay mga hiyas sa pag-ayog mga sakit, sila ba?” (Busa, tin-aw nga gipakita sa Bibliya nga dili ang tanang matuod nga mga Kristohanon makahupot sa hiyas sa pag-ayog mga sakit.)

Dili ba ang Marcos 16:17, 18 nagapakita nga ang katakos sa pag-ayo sa masakiton usa ka ilhanan nga magpaila sa mga magtutuo?

Mar. 16:17, 18, KJ: “Kining maong mga ilhanan maganunot kanila nga nagatuo; diha sa akong ngalan ilang pagulaon ang mga yawa; magasulti silag bag-ong mga sinultihan; makakupot silag mga serpente, ug kon makainom silag bisan unsang makahilo, dili sila mangadaot niana; ang mga masakiton ilang pagapandongan sa ilang mga kamot, ug sila mangaayo.”

Kining mga bersikuloha makita diha sa pipila ka manuskrito ug mga hubad sa Bibliya sa ikalima ug ikaunom ka siglo K.P. Pero dili kana makita diha sa daandaang mga manuskritong Grego, ang Sinaiticus ug Vatican MS. 1209 sa ikaupat nga siglo. Si Dr. B. F. Westcott, usa ka awtoridad sa mga manuskrito sa Bibliya, nag-ingon nga “ang mga bersikulo . . . dili bahin sa orihinal nga asoy kondili usa ka pakapin.” (An Introduction to the Study of the Gospels, London, 1881, p. 338) Ang taghubad sa Bibliyang si Jerome, sa ikalimang siglo, miingon nga “hapit ang tanang daang Gregong mga manuskrito sa Kasulatan (codices) wala niining bahina.” (The Last Twelve Verses of the Gospel According to S. Mark, London, 1871, ni J. W. Burgon, p. 53) Ang New Catholic Encyclopedia (1967) nag-ingon: “Ang bokabularyo ug estilo niana lahi kaayo gikan sa ubang mga bahin sa Ebanghelyo nga maorag  dili gayod posible nga si Marcos mismo ang mihan-ay niana [nga mao, mga Mar 16 bersikulo 9-20].” (Tomo IX, p. 240) Walay rekord nga ang unang mga Kristohanon miinom ug hilo o mikupot ug mga serpente sa pagpamatuod nga sila mga magtutuo.

Ngano ang maong mga hiyas sama sa katakos sa paghimog milagrosong pag-ayog sakit gihatag ngadto sa una-siglong mga Kristohanon?

Heb. 2:3, 4: “Unsaon man nato sa pagpakaikyas kon dili kita manumbaling sa maong dakong kaluwasan nga kini sa sinugdan gipamulong pinaagi sa atong Ginoo ug gipanghimatuod alang kanato pinaagi kanilang nakadungog kaniya, samtang ang Diyos miduyog sa pagpamatuod pinaagig mga ilhanan ug mga katingalahan ug nagkalainlaing mga milagro ug pinaagig pag-apod-apod sa balaang espiritu sumala sa iyang kabubut-on?” (Ania ang makapakombensir nga ebidensiya, sa pagkamatuod, nga ang Kristohanong kongregasyon, nga niadtong panahona bag-o pa, iya gayod sa Diyos. Pero sa dihang kadto nalig-on na pag-ayo, gikinahanglan pa ba nga padayon kanang pamatud-an?)

1 Cor. 12:29, 30; 13:8, 13: “Dili ang tanan mga apostol, sila ba? . . . Dili ang tanan adunay mga hiyas sa pag-ayog mga sakit, sila ba? . . . Dili ang tanan nagasultig mga pinulongan, sila ba? . . . Ang gugma dili gayod mapakyas. Pero kon aduna may mga gasa sa pagtagna, kini mahanaw ra; kon aduna may pagsultig mga pinulongan, kini pahunongon ra . . . Karon, hinuon, adunay magapabilin ang pagtuo, paglaom, gugma, kining tulo; apan ang labing dako niini mao ang gugma.” (Sa dihang nalampos na ang katuyoan niini, ang maong milagrosong mga gasa natapos na. Apan ang bililhong mga hiyas nga maoy bunga sa espiritu sa Diyos sa gihapon madayag man diha sa kinabuhi sa matuod nga mga Kristohanon.)

Basta ang usa ka tawo maulian sa sakit, hinungdanon ba gayod kon sa unsang paagi giayo kana?

2 Tes. 2:9, 10: “Ang pag-abot sa usa nga masupilon maoy sumala sa paglihok ni Satanas nga inubanan sa tanang gamhanang mga buhat [“tanang matang sa mga milagro,” JB] ug bakak nga mga ilhanan ug mga katingalahan ug inubanan sa tanang daotan nga paglimbong alang kanila nga pagalaglagon, ingon nga silot tungod kay ilang gidumilian ang paghigugma sa kamatuoran aron sila unta mangaluwas.”

Luc. 9:24, 25: “Bisan kinsa nga buot magaluwas sa iyang kalag [“kinabuhi,” RS, JB, TEV] mawad-an niana, pero bisan kinsa nga  mawad-an sa iyang kalag tungod kanako makaluwas niana. Sa pagkamatuod, unsa may kapuslanan alang sa usa ka tawo kon maangkon niya ang tibuok kalibotan apan mawagtang ang iyang kaugalingon o madaot?”

Adunay unsang paglaom sa tinuod nga pagkaayo gikan sa tanang sakit?

Pin. 21:1-4: “Nakita ko ang usa ka bag-ong langit ug usa ka bag-ong yuta; kay ang unang langit ug unang yuta nangahanaw na . . . ‘Ug iyang [Diyos] pagapahiran ang tanang luha gikan sa ilang mga mata, ug ang kamatayon mawala na, wala na ing pagbalata ni paghilak ni kasakit pa man. Ang unang mga butang nangagi na.’”

Isa. 25:8: “Iyang lamoyon ang kamatayon sa walay kataposan, ug ang Soberanong Ginoong Jehova mopahid gayod sa mga luha gikan sa tanang nawong.” (Usab ang Pinadayag 22:1, 2)

Isa. 33:24: “Walay molupyo nga magaingon: ‘Ako masakiton man.’”

Kon Adunay Moingon—

‘Nagatuo ka bag pag-ayog mga sakit?’

Mahimong tubagon mo: ‘Ang bisan kinsa nga dili motuo nga ang Diyos adunay gahom sa pag-ayog sakit wala magatuo sa Bibliya. Apan dili ako makapugong kondili sa pagkahibulong kon husto kaha ang pagtamod sa mga tawo karong mga adlawa niana.’ Dayon tingali modugang: (1) ‘Tugoti akong basahon kanimo ang usa ka teksto, ug tan-awa kon imo bang mamatikdan ang usa ka buhat nga lahi kaayo sa atong adlaw. (Mat. 10:7, 8) . . . Imo ba usab nga namatikdan dinhi ang giingon ni Jesus nga arang mabuhat sa iyang mga tinun-an pero ang mga mananambal karon wala makahimo niana? (Dili sila makabanhaw sa mga patay.)’ (2) ‘Dili kita ang mga maghuhukom sa ubang mga tawo, pero pagamatikdan nga naghisgot ang Mateo 24:24 nianang butang nga kinahanglan kitang magmabinantayon.’

O ikaw makaingon: ‘Ako gayod nagatuo nga tinuod ang giingon sa Bibliya maylabot sa pag-ayog mga sakit. Apan ang bisan unsang pagpang-ayog sakit nga ginahimo niining sistemaha sa mga butang magpatungha lamang ug temporaryong mga kaayohan, di ba mao? Sa kataposan kitang tanan mangamatay ra. Aduna ba gayod ing panahon sa dihang ang tanan nga buhi magapahimulos sa mahimsog nga panglawas ug dili na gayod mamatay? (Pin. 21:3, 4)’