Pagkadaotan

Kahubitan: Kanang sa moral daotan kaayo. Sagad kana magbutyag nianang makadaot, daotag tuyo, o sa impluwensiya malaglagon.

Nganong dagsang kaayo ang pagkadaotan?

Ang Diyos dili kapasanginlan. Iyang gihatagan ang tawo ug hingpit nga sinugdanan, apan ang mga tawo mipalabi sa pagpili nga isalikway ang mga tulomanon sa Diyos ug sa paghukom alang sa ilang kaugalingon kon unsa ang maayo ug kon unsa ang daotan. (Deut. 32:4, 5; Eccl. 7:29; Gen. 3:5, 6) Sa pagbuhat niini, sila napailalom sa impluwensiya sa daotan labaw-tawhanong mga puwersa.—Efe. 6:11, 12.

1 Juan 5:19: “Ang tibuok kalibotan anaa sa gahom sa daotan.”

 Pin. 12:7-12: “Nahitabo ang gubat didto sa langit . . . ang dragon ug ang iyang mga manulonda nakiggubat apan gilupig sila, ni may dapit pa alang kanila didto sa langit. Busa gitambog ang dakong dragon, ang orihinal nga serpente, siya nga gitawag nga Yawa ug Satanas, mao ang nagpasalaag sa tibuok pinuy-anang yuta; siya gitambog ngadto sa yuta, ug ang iyang mga manulonda gitambog uban kaniya. . . . ‘Tungod niini managkalipay, kamo nga kalangitan ug kamo nga nagapuyo niini! Alaot ang yuta ug ang dagat, kay diha kaninyo ang Yawa nahilusad, nga adunay dakong kasuko, sanglit nasayod nga hamubo na ang iyang panahon.’” (Kining nag-uswag nga kasakitan sa kalibotan nahitabo sukad si Satanas gitambog gikan sa langit human sa pagkahimugso sa Gingharian. Tan-awang Pin 12 bersikulo 10.)

2 Tim. 3:1-5: “Sabta kini, nga sa kataposang mga adlaw moabot ang makuyaw nga mga panahong sagubangon. Kay ang mga tawo mahimong mga mahigugmaon sa ilang kaugalingon, mga mahigugmaon sa salapi, tigpagawal, hambogero, tampalasan, masukihon sa mga ginikanan, dili mapasalamaton, dili maunongon, walay pagbati nga kinaiyanhon, dili igakasabot, mga tigbutangbutang, mapatuyangon sa kaugalingon, mabangis, walay gugma sa maayo, mga mabudhion, mga gahig ulo, tigpaburot sa garbo, mga mahigugmaon sa kalingawan inay kay mga mahigugmaon sa Diyos, nga nagabaton sa dagway sa diyosnong pagkamahinalaron apan nagapanghimakak sa gahom niini.” (Kini ang bunga sa kasiglohang apostasya gikan sa matuod nga pagsimba. Kining mga kahimtanga naugmad tungod kay ang mga tawo nga nag-angkong relihiyoso mingsalikway sa ginaingon gayod sa Pulong sa Diyos. Sila nagpanghimakak sa gahom alang sa maayo nga ikahatag sa diyosnong pagkamahinalaron diha sa kinabuhi sa usa ka tawo.)

 Nganong ginatugotan kini sa Diyos?

May mga panahon nga nganhi kanato maorag ang labing maayo mao ang yanong pagwagtang sa tanan nga daotan. Kita nagapangandoy sa kataposan sa pagkadaotan, apan atong naagoman kana nga hamubo ra kon itandi sa panahong naglungtad ang pagkadaotan. Unsa man gayod ang pagbati ni Jehova? Sa linibo ka katuigan ang mga tawo nagpasangil kaniya, gitunglo pa gani siya, tungod sa daotang mga kahimtang nga ilang giantos. Apan, kini gipahinabo, dili pinaagi kaniya, kondili pinaagi ni Satanas ug sa daotang mga tawo. Si Jehova aduna ing gahom sa paglaglag sa mga daotan. Dayag nga aduna gayoy maayong mga rason kon ngano nga siya nagmapugnganon. Kon ang paagi ni Jehova sa pagdumala sa kahimtang maoy lahi sa atong igarekomendar,  kana ba gayod magpatingala kanato? Ang iyang kasinatian mas dako kay sa iya sa tawo, ug ang iyang panghunahuna sa situwasyon mas masangkaron kay sa kang bisan kinsang tawo.—Ikomparar ang Isaias 55:8, 9; Ezekiel 33:17.

Wala untay pagkadaotan kon ang Diyos wala pa mohatag sa intelihenteng mga linalang ug kabubut-ong gawas o free will. Apan ang Diyos naghatag kanato ug katakos sa pagpili aron sa pagsunod kaniya tungod kay kita nahigugma man kaniya o sa pagsupak kaniya. (Deut. 30:19, 20; Jos. 24:15) Gusto ba nato nga dili hatagan ug kabubut-ong gawas? Kon kita mga ginikanan, unsa man ang mas nga magpalipay kanato—sa dihang ang atong mga anak mosunod kanato tungod kay sila nahigugma kanato o sa dihang atong ipugos kana nga tumanon nila? Gipugos ba gayod sa Diyos si Adan sa pagsunod? Kita ba gayod mahimong mas malipayon kon kita nagpuyo sa kalibotan nga gipugos sa pagsunod sa Diyos? Sa dili pa laglagon kining daotang sistema, ang Diyos nagatugot ug higayon alang sa katawhan sa pagpasundayag kon sila ba gayod buot magkinabuhi subay sa iyang matarong mga balaod o dili. Sa iyang tinudlong panahon, siya sa walay pakyas magalaglag sa mga daotan.—2 Tes. 1:9, 10.

Siya sa kamaalamon nagatugot ug panahon sa pagsulbad sa hinungdanong mga suliran: (1) Ang pagkamatarong ug pagkahusto sa pagmando ni Jehova gihagit didto sa Eden. (Gen. 2:16, 17; 3:1-5) (2) Ang integridad sa tanang mga alagad sa Diyos sa langit ug sa yuta gikaduhaduhaan. (Job 1:6-11; 2:1-5; Luc. 22:31) Dihadiha gilaglag na unta sa Diyos ang mga rebelde (Satanas, Adan, ug Eva), pero dili kana magsulbad sa mga gumonhap. Ang gahom dili magpamatuod nga ang katuyoan sa usa husto. Ang mga isyu nga gipatungha maoy moral nga mga suliran. Ang pagtugot sa Diyos ug panahon, dili sa pagpamatuod ug bisan unsang punto alang sa iyang kaugalingon, kondili sa pagtugot sa tanang linalang uban ang kabubut-ong gawas sa pagtan-aw sa ilang kaugalingon sa daotang bunga nga gipatungha sa rebelyon batok sa iyang pagmando, usab sa paghatag kanila ug higayon sa pagpasundayag kon diin sila sa personal nagabarog maylabot niining hinungdanong mga suliran. Sa masulbad na kining mga isyuha, dili na gayod ang bisan kinsa pagatugotan sa pagtugaw sa kalinaw. Ang kahusay, panag-uyon, ug kaayohan sa tibuok uniberso magadepende sa pagbalaan sa ngalan ni Jehova, sa pagtratar kaniya uban ang kinasingkasing nga pasidungog pinaagi sa tanang intelihenteng linalang. (Tan-awa usab ang mga panid 394, 395, ubos sa ulohang “Satanas nga Yawa.”)

Ilustrasyon: Kon adunay magsumbong atubangan sa tibuok katilingban nga ikaw nag-abuso sa imong katungdanan ingong  ulo sa pamilya, nga ang imong mga anak mahimong mas hamugaway kon sila magdesisyon nga kinaugalingon nga bulag kanimo, ug silang tanan nagasugot kanimo, dili tungod sa gugma, kondili tungod sa materyal nga mga benepisyo nga imong gitagana, unsa ang labing maayong paagi sa pagsulbad sa maong gumonhap? Ang pagpusil ba sa bakakong tigsumbong magpawagtang sa mga pasangil diha sa hunahuna sa katilingban? Hinunoa, pagkamaayo gayong tubag kon hatagan mo ang imong mga anak ug higayon nga mahimong imong mga saksi aron ipakita nga ikaw usa ka matarong ug mahigugmaong ulo sa banay ug nga sila nagapuyo uban kanimo sanglit kay sila nahigugma kanimo! Kon ang pipila sa imong mga anak mituo sa imong kaaway, mibiya sa balay, ug nagdaot sa ilang kinabuhi pinaagig pagsagop sa laing estilo-kinabuhi, kana magpaamgo lamang sa mabuot nga mga tigpaniid nga ang maong mga anak mas maayo unta ang kahimtang kon sila nagtuman pa sa imong pagbulot-an.

Kita ba nakabenepisyo sa pagtugot sa Diyos sa pagkadaotan hangtod karong panahona?

2 Ped. 3:9: “Bahin sa iyang saad si Jehova dili langaylangayan, nianang paglangaylangay nga maoy pagsabot sa uban, apan siya mapailobon kaninyo tungod kay dili niya tinguha nga adunay malaglag kondili nagatinguha nga ang tanan makadangat sa paghinulsol.” (Sanglit kay ang iyang pailob nagapadayon hangtod sa atong mga adlaw, kita aduna ing kahigayonan sa pagpasundayag nga kita mahinulsolon ug nga, inay kay maghimog atong kaugalingong mga desisyon maylabot sa maayo ug daotan, buot ta nga magpasakop sa matarong nga pagmando ni Jehova.)

Roma 9:14-24: “Nan, unsa may atong ikasulti? Nga wala ang hustisya diha sa Diyos? Palayo kana! . . . Kon, karon, ang Diyos, bisan maoy magbuot aron ipasundayag ang iyang kapungot ug pagpaila sa iyang gahom, nagtugot uban ang tumang pagkamapailobon sa mga sudlanan nga gikapungtan nga gihimong angay sa kalaglagan [nga mao, siya nagtugot sa paglungtad sa daotang mga tawo sa usa ka panahon], aron iyang ikapaila ang kadagaya sa iyang himaya alang sa mga sudlanan nga ginakaloy-an nga giandam niyang daan aron pagahimayaon [nga mao, iyang gamiton ang panahon sa paglugway ug kaluoy ngadto sa pipila, uyon sa iyang katuyoan], nga mao, kita, nga iyang gitawag dili lang gikan sa taliwala sa mga Hudiyo kondili gikan usab sa kanasoran, nan unsay naa niana?” (Busa wala una laglaga sa Diyos ang mga daotan aron hatagan ug panahon sa pagpili ug mga tawo nga iyang pagahimayaon uban kang Kristo ingong mga membro sa langitnong Gingharian. Ang paghimo ba sa Diyos niana inhustisya  ngadto kang bisan kinsa? Dili; bahin kana sa kahikayan ni Jehova alang sa pagpanalangin sa katawhan sa tanang matang kinsa pagauyonan uban sa kahigayonan nga mabuhing walay kataposan ibabaw sa paraisong yuta. Itanding Salmo 37:10, 11.)

Kon Adunay Moingon—

‘Nganong gitugotan sa Diyos ang maong pagkadaotan?’

Mahimong tubagon mo: ‘Maayo ang imong pangutana. Daghang matinumanong mga alagad sa Diyos nalibog tungod sa pagkadaotan nga nagalibot kanila. (Hab. 1:3, 13)’ Dayon tingali modugang: (1) ‘Dili kay ang Diyos walay pagtagad. Siya nagapasalig kanato nga siya nagtakda ug panahon sa dihang panilngon niya ang mga daotan. (Hab. 2:3)’ (2) ‘Pero unsa man ang gikinahanglan sa atong bahin kon ugaling apil kita sa makalabang-buhi sa moabot na ang maong panahon? (Hab. 2:4b; Sof. 2:3)’

O ikaw makaingon: ‘Nalipay ako nga imong gisukna ang maong pangutana. Kana nakapalibog sa daghan mabuot-kasingkasing nga mga tawo. Aduna akoy pipila ka mapuslanon kaayong impormasyon dinhi nga nagatubag sa maong pangutana. (Dayon duyog nga basahon ang pipila ka impormasyon sa mga  panid 301-304.)’

‘Human niining tanang katuigan, dili ko motuo nga adunay buhaton ang Diyos sa pag-usab sa mga butang’

Mahimong tubagon mo: ‘Nalipay ko sa pagkadungog nga ikaw nagatuo gayod sa Diyos. Tinuod gayod nga adunay dakong pagkadaotan, ug kana nagsugod dugay na kanhi sa atong panahon. Apan imo bang natagad kini . . . ? (Gamita ang puntos sa parapo 3 sa panid 301, bahin sa gidugayon sa panahon nga ang Diyos nagpailob niana.)’

O ikaw makaingon: ‘Segurado ako nga ikaw mouyon kanako sa moingon ako nga ang bisan kinsa nga adunay katakos sa pagtukod ug usa ka balay tino nga may katakos usab sa paghinlo niana. . . . Tungod kay ang Diyos milalang sa yuta, dili malisod nga butang alang kaniya sa paghinlo niana. Ngano nga siya naghulat ug dugay kaayo? Akong nakaplagan ang tubag nga makapatagbaw kaayo. Tug-ani ako kon unsay imong paghunahuna. (Dayon duyog nga basahon ang materyal sa mga panid 301-304.)’