Pagpalig-on

Kahubitan: Kanang nagahatag ug kaisog o nagabutyag ug paglaom. Ang tanan nagakinahanglan ug pagpalig-on. Ang paghatag niini hayan nagakinahanglan ug paghimog personal nga tabang o pagsultig apresasyon. Sagad kini nagalangkit sa pagbulig sa usa kon sa unsang paagi mabuntog ang malisod nga situwasyon o hisgotan ang mga katarongan sa pagsalig diha sa mas maayong kaugmaon. Ang Bibliya nagatagana ug labing maayong pasukaranan alang sa maong pagdasig, ug ang mga teksto nga gikutlo sa ubos mahimong mapuslanon nga ikahatag kini ngadto sa mga tawong nakasugamak sa lainlaing mga hitabo. May mga panahon nga dako ang malampos pinaagig pagpakita lamang ug maluloy-ong tinamdan.—Roma 12:15.

Alang kanilang nakasugamak ug mga pagsulay tungod sa SAKIT—

Pin. 21:4, 5: “‘Pagapahiran sa [Diyos] ang tanang luha gikan sa ilang mga mata, ug ang kamatayon mawala na, ni aduna pay pagbalata ni paghilak ni kasakit pa man. Ang unang mga butang nangagi na.’ Ug Siya nga naglingkod sa trono miingon: ‘Tan-awa! Akong ginabag-o ang tanang butang.’ Usab, siya miingon: ‘Isulat, kay kining mga pulonga kasaligan ug matuod.’”

Mat. 9:35: “Ang tanang siyudad ug mga balangay gisuroy ni Jesus, nga nagpanudlo . . . ug nagwali sa maayong balita sa  gingharian ug nag-ayo sa tanang sakit ug kaluyahon.” (Pinaagig paglambigit sa maong pagpanambal uban sa iyang pagpangwali sa Gingharian, gitagana ni Jesus ang kahibulongang palaaboton kon unsay iyang pagabuhaton alang sa katawhan sulod sa iyang Milenyo nga Pagmando.)

2 Cor. 4:13, 16: “Kami usab nagatuo . . . Busa kami dili mourong, bisan pa kon ang among pagkatawo nga makita sa gawas [among unodnong lawas] nagakahugo, tino nga ang among pagkatawo sa kinasuloran ginabag-o [o nahatagan ug lunhawng kusog] sa adlaw-adlaw.” (Mahimong magakahugo kita sa lawasnong kahulogan. Pero sa espirituwal kita ginabag-o samtang kita magpadayon sa pagkaon sa bililhong mga saad sa Diyos.)

Tan-awa usab ang Lucas 7:20-23.

Alang sa mga tawo nga nawad-an ug mga hinigugma diha sa KAMATAYON—

Isa. 25:8, 9: “Iyang lamoyon ang kamatayon sa walay kataposan, ug ang Soberanong Ginoong Jehova mopahid gayod sa mga luha gikan sa tanang nawong. . . . Ug niadtong adlawa aduna gayoy magaingon: ‘Tan-awa! Kini mao ang atong Diyos. Kita naglaom diha kaniya, ug siya magaluwas kanato. Kini mao si Jehova. Kita naglaom diha kaniya. Tugoting mangalipay kita ug managmaya diha sa kaluwasan pinaagi kaniya.’”

Juan 5:28, 29: “Ayawg kahibulong niini, kay ang takna moabot nga silang tanan nga anaa sa handomanang mga lubnganan makadungog sa iyang tingog ug manggula, silang nagbuhat ug maayong mga butang ngadto sa pagkabanhaw sa kinabuhi, silang nagbuhat ug daotang mga butang ngadto sa pagkabanhaw sa paghukom.”

Juan 11:25, 26: “Si Jesus miingon kaniya: ‘Ako mao ang pagkabanhaw ug ang kinabuhi. Siya nga nagabaton ug pagtuo kanako, bisan siya mamatay, mabuhi ra; ug ang tanan nga buhi ug nagabaton ug pagtuo kanako dili na gayod mamatay. Motuo ba ikaw niini?’”

Sal. 146:5, 9: “Malipayon siya . . . kansang paglaom anaa kang Jehova nga iyang Diyos. . . . Siya nagasapnay sa ilo batang lalaki ug sa balong babaye.” (Sa pagkakaron ang Diyos aduna nianang maong pagtagad alang sa mga namatyan.)

Tan-awa usab ang Lucas 7:11-16; 8:49-56.

Alang sa mga tawong nagaatubang ug PAGLUTOS tungod sa pagbuhat sa kabubut-on sa Diyos—

Sal. 27:10: “Kon ugaling pagabiyaan ako sa akong kaugalingong  amahan ug akong kaugalingong inahan, gani si Jehova mismo magadawat kanako.”

1 Ped. 4:16: “Kon siya magaantos ingong Kristohanon, dili niya kini pag-ikaulaw, kondili magpadayon siya sa paghimaya sa Diyos tungod niining ngalana.”

Prov. 27:11: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.” (Pinaagig pagkamatinumanon atong gitagana ang tubag ngadto sa bakakong sumbong ni Satanas nga walay tawong nagaantos sa dakong kalisdanan ang makapadayon sa pag-alagad sa Diyos.)

Mat. 5:10-12: “Malipayon silang mga ginalutos tungod sa pagkamatarong, kay ila ang gingharian sa mga langit. Malipayon kamo sa dihang ang mga tawo magapakaulaw kaninyo ug magalutos kaninyo ug pagabutangbutangan kamo sa tanang matang sa kadaotan tungod kanako. Managmaya ug managkalipay kamo, kay dako ang inyong balos didto sa mga langit; kay sa ingon niana nga paagi ilang gilutos ang mga propeta nga naghiuna kaninyo.”

Buh. 5:41, 42: “Busa, [ang mga apostol] namahawa gikan sa Sanhedrin, nga malipayon sanglit sila giisip nga angayan diayng pakaulawan tungod sa iyang ngalan. Ug sa matag adlaw didto sa templo ug sa kabalayan sila wala mag-undang sa pagpanudlo ug sa pagwali sa maayong balita bahin kang Kristo, Jesus.”

Filip. 1:27-29: “Mao lamang nga ang inyong paggawi mangintakos sa maayong balita bahin kang Kristo . . . ug sa bisan unsa dili kamo palisang pinaagi sa inyong mga kaaway. Kini gayong butanga maoy pamatuod sa ilang pagkalaglag, apan sa kaluwasan alang kaninyo; ug kining maong timailhan gikan sa Diyos, kay nganha kaninyo ang pribilehiyo gihatag tungod kang Kristo, dili lamang aron kamo motuo kaniya, kondili usab aron kamo mag-antos tungod kaniya.”

Alang kanilang nangaluya tungod sa INHUSTISYA—

Sal. 37:10, 11: “Kay sa dili na gayod madugay, ug ang mga daotan mangawala; ug sa tino pagasusihon mo ang iyang dapit, ug siya mawala na diha. Apan ang mga maaghop sa ilang kaugalingon magapanunod sa yuta, ug sila gayod makakaplag sa ilang bug-os nga kalipay diha sa kadagaya sa pakigdait.”

Isa. 9:6, 7: “Alang kanato ang usa ka bata natawo, alang kanato ang usa ka anak nga lalaki gihatag; ug ang prinsipenhong pagmando igatungtong sa iyang abaga. Ug ang iyang ngalan pagatawgong Kahibulongang Magtatambag, Diyos nga Gamhanan, Amahan nga Walay Kataposan, Prinsipe sa Pakigdait. Sa  kauswagan sa iyang prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron sa pagtukod niini nga malig-on ug sa pagtuboy niini pinaagig hustisya ug pinaagig pagkamatarong, sukad karon hangtod sa panahong walay katinoan. Ang kakugi mismo ni Jehova sa mga panon maoy magahimo niini.”

Dan. 2:44: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian dili igapasa ngadto sa laing katawhan. Kini magadugmok ug magaut-ot sa tanan niining mga ginghariana, ug kana mismo mao ang magpabilin sa mga panahong walay katinoan.”

Tan-awa usab ang Isaias 32:1, 2; 2 Pedro 3:13.

Alang kanilang nagkalisodlisod sa EKONOMIKANHONG MGA PROBLEMA—

Isa. 65:21, 22: “Sila gayod magatukod ug mga balay ug magapuyo niini; ug sila gayod magatanom ug mga kaparasan ug makakaon sa bunga niini. Sila dili magatukod ug unya lain ang magapuyo; sila dili magatanom ug unya lain ang magakaon. . . . Ang akong mga pinili magapahimulos pag-ayo sa buhat sa ilang mga kamot.”

Sal. 72:8, 16: “Siya [ang Mesiyanikong Hari] adunay mga ginsakpan gikan sa dagat ngadto sa laing dagat ug gikan sa Suba ngadto sa mga kinatumyan sa yuta. Aduna unyay daghang trigo ibabaw sa yuta; sa ibabaw sa kabukiran adunay pag-awas.”

Mat. 6:33: “Nan, padayong pangitaa pag-una ang gingharian ug ang iyang pagkamatarong, ug ang tanan niining mga butanga [materyal nga mga panginahanglan sa kinabuhi] igadugang ra kaninyo.”

Roma 8:35, 38, 39: “Kinsa ba ang makapahimulag kanato gikan sa gugma ni Kristo? Ang pag-antos ba o kasakitan o paglutos o gutom o kahubo o katalagman o espada? Kay masaligon ako nga walay kamatayon o kinabuhi o mga manulonda ni mga punoan ni mga butang karon dinhi ni sa mga butang umaabot ni mga gahom ni kahabogon ni giladmon ni bisan unsa sa ubang kalalangan nga arang makapahimulag kanato gikan sa gugma sa Diyos nga anaa kang Kristo Jesus nga atong Ginoo.”

Tan-awa usab ang Hebreohanon 13:5, 6.

Alang sa mga tawo nga nangaluya tungod sa ilang kaugalingong KASAL-ANAN—

Sal. 34:18: “Si Jehova haduol niadtong mga dugmok ug kasingkasing;  ug nagaluwas siya niadtong mahinulsolon sa espiritu.”

Sal. 103:13, 14: “Sama sa usa ka amahan nga naluoy sa iyang mga anak, si Jehova nagpakita ug kaluoy kanilang nahadlok kaniya. Kay siya mismo nahibalo kaayo sa atong kahimtang, nahinumdom nga kita mga abog lamang.”

Neh. 9:17: “Ikaw usa ka Diyos nga andam sa pagpasaylo, hupong sa grasya ug maluloy-on, mahinay sa kasuko ug madagayaon sa mahigugmaong-kalulot.”

2 Ped. 3:9, 15: “Bahin sa iyang saad si Jehova dili langaylangayan, nianang paglangaylangay nga maoy pagsabot sa uban, apan siya mapailobon kaninyo sanglit kay siya wala magtinguha nga adunay si bisan kinsa nga malaglag kondili nagatinguha nga ang tanan makadangat sa paghinulsol. Dugang pa, isipa ninyong kaluwasan ang pagkamainantoson sa atong Ginoo.”