Pagsimba sa Katigulangan

Kahubitan: Ang batasan sa pagpasidungog ug pagdayeg sa patay nang mga katigulangan (pinaagig seremonyas o sa ubang paagi) sa pagtuo nga sila buhi didto sa dili makitang dapit ug makatabang o makapahinabog kadaot ngadto sa mga buhi ug busa kinahanglang pakalmahon. Dili pagtulon-an sa Bibliya.

Ang namatay nang mga katigulangan nahibalo ba sa ginabuhat sa mga buhi ug kini ba silang mga katigulangana makaarang sa pagtabang sa buhing mga tawo?

Eccl. 9:5: “Ang mga buhi nasayod nga sila mangamatay, pero bahin sa mga patay, sila dili mahibalo sa bisan unsa.”

Job 14:10, 21: “Ang yutan-ong tawo mamatay, ug hain na man siya? Ang iyang mga anak mahimong dungganon, apan siya dili mahibalo niana.”

Sal. 49:10, 17-19: “Bisan ang mga makinaadmanon mangamatay, ang buang ingon man ang mananapon mangahanaw, ug ila gayong ibilin sa uban ang ilang bahandi. . . . Sa iyang kamatayon wala siyay madala bisan unsa; ang iyang himaya dili manaog uban kaniya mismo. . . . Ang iyang kalag makadangat lamang sa kaliwatan sa iyang mga amahan. Sila dili na gayod makakita sa kahayag.”

 Dili ba tinuod nga ang pagkaon nga ginabutang diha sa halaran o sa lubnganan nagapabilin nga wala matandog? Wala ba kini magpakita nga ang mga patay dili na makabenepisyo gikan niana?

Tan-awa usab ang lintunganayng ulohang “Espiritismo.”

Aduna ba ing hinungdan nga mahadlok nga ang atong patay nang mga katigulangan magadaot kanato?

Eccl. 9:5, 6: “Mahitungod sa mga patay, . . . ang ilang gugma ug ilang pagdumot ug ilang kasina nawagtang na, ug sila wala nay bahin sa panahong walay katinoan sa bisan unsa nga butang nga ginabuhat ilalom sa adlaw.”

Aduna bay espirituwal nga bahin sa usa ka tawo nga magpadayong buhi sa pagkamatay sa lawas?

Ezek. 18:4: “Tan-awa! Ang tanang kalag—akoa man. Ingon man ang kalag sa amahan mao man usab ang kalag sa anak—akoa man. Ang kalag nga nagapakasala—kini mismo mamatay.” (Usab ang Eze 18 bersikulo 20)

Sal. 146:3, 4: “Ayaw pag-ibutang ang inyong pagsalig sa mga prinsipe, ni sa anak nga lalaki sa yutan-ong tawo . . . Ang iyang espiritu mogula, siya mobalik sa iyang yuta; nianang maong adlaw ang iyang mga hunahuna mahanaw gayod.”

Ang mga siyentipiko ug mga siruhano walay nakita nga ebidensiya sa bisan unsa nga may panimuot, buhi nga mga bahin sa mga tawo nga nagapabiling buhi sa dihang mamatay ang lawas.

Tan-awa usab ang mga panid 103-105, ubos sa ulohang “Kamatayon.”

Palabihon mo ba nga ang imong mga anak ug mga apo magpakitag pagtahod ug gugma kanimo samtang ikaw buhi pa o sila ba maghimog mga rituwal didto sa lubnganan human ikaw mamatay?

Efe. 6:2, 3: “‘Tumahod ka sa imong amahan ug imong inahan’; nga mao ang nahaunang sugo nga may saad: ‘Aron magamauswagon ikaw ug mataas ang imong kinabuhi dinhi sa yuta.’” (Ang mga anak nga gibansay sa mga prinsipyo sa Bibliya magpakita sa maong pasidungog nga mohatag ug kalipay ngadto sa mga kasingkasing sa ilang mga ginikanan samtang sila buhi pa.)

Prov. 23:22: “Pamati sa imong amahan nga nanganak kanimo,  ug ayaw pagtamaya ang imong inahan tungod lang kay siya natigulang na.”

1 Tim. 5:4: “Kon ang babayeng balo adunay mga anak o mga apo, patun-a kini sila una sa pagbuhat sa ilang diyosnong pagkamahinalaron ngadto sa ilang kaugalingong banay ug sa paghatag ug balos ngadto sa ilang mga ginikanan ug mga apohan, kay kini pagakahimut-an sa panan-aw sa Diyos.”

Sa dihang ang espiritung mga medyum mangangkon sa paghatod ug mga mensahe gikan sa mga patay, diin man gayod kini magagikan?

Isa. 8:19: “Sa diha nga sila manag-ingon kaninyo: ‘Mangadto kamo niadtong mga espiritista ug mga salamangkero nga managpiyak ug managyagubyob,’ dili ba unta mangadto ang katawhan sa pagpangita sa ilang Diyos? Tungod sa mga buhi pangitaon ba nila ang mga patay?” (Kita ba pasidan-an sa Diyos batok sa maong buhat kon ugaling tinuod nga atong makontak ang atong mga hinigugma?)

Buh. 16:16: “Sa nagpaingon kami sa dapit nga ampoanan, ang usa ka dalagitang ulipon nga nakabaton sa espiritu, usa ka gidemonyohan sa pagpanagna, misugat kanamo. Siya hingsapian pag-ayo sa iyang mga agalon pinaagi sa iyang pagpanagna.”

Tan-awa usab ang mga panid 167-169, ubos sa “Espiritismo.”

Ngadto kang kinsa nga kinahanglang itumong ang atong pagsimba?

Luc. 4:8: “Si Jesus mitubag kaniya: ‘Nahisulat na, “Si Jehova nga imong Diyos ang kinahanglan mong simbahon, ug ngadto kaniya lamang nga kinahanglang buhaton mo ang balaang pag-alagad.”’”

Juan 4:23, 24: “Ang takna taliabot, ug karon mao na, sa dihang ang matuod nga mga magsisimba magasimba sa Amahan diha sa espiritu ug sa kamatuoran, kay, sa pagkamatuod, ang Amahan nagapangita sa maong mga magsisimba sa pagsimba kaniya. Ang Diyos maoy Espiritu, ug silang magasimba kaniya kinahanglang magasimba diha sa espiritu ug kamatuoran.”

Adunay unsang paglaom alang sa umaabot nga paghiusa sa mga membro sa pamilya, apil na kadtong nangamatay?

Juan 5:28, 29: “Ayaw kamo kahibulong niini, kay ang takna  nagasingabot nga ang tanan nga anaa sa handomanang mga lubnganan makadungog sa iyang tingog ug managpanggula, sila nga nagbuhat sa maayong mga butang ngadto sa pagkabanhaw sa kinabuhi, silang nagbuhat ug daotang mga butang ngadto sa pagkabanhaw sa paghukom.”