Pagsugid (Pangumpisal)

Kahubitan: Usa ka kapahayagan o pag-ila, sa dayag man o sa pribado, (1) kon unsa ang gituohan sa usa ka tawo o (2) maylabot sa iyang mga sala.

Kasulatanhon ba ang rituwal sa kapasig-ulian, apil ang pagsugid sa igdulongog (personal nga pagkumpisal nganha sa dalunggan sa pari), ingon sa gitudlo sa Katolikong Iglesya?

Ang paagi diha sa pagtawag sa pari

Ang tradisyonal nga pormula, nga sagad gihapong gigamit, mao: “Bendisyoni ako, Padre, kay nakasala ako. Sukad niadtong akong Pagkumpisal sa [gidugayon sa panahon].”—U.S. Catholic nga magasin, Oktubre 1982, p. 6.

Mat. 23:1, 9, JB: “Si Jesus miingon, . . . ‘Dili gayod kamo magtawag kang bisan kinsa nga inyong amahan ibabaw sa yuta, kay aduna kamoy usa ra ka Amahan, ug siya atua sa langit.’”

Mga sala nga mahimong pasayloon

“Ang Iglesya kanunayng nagtudlo nga ang kada sala, bisan unsa kana ka grabe, mapasaylo man.”—The Catholic Encyclopedia (nagdala sa nihil obstat ug sa imprimatur), ni R. C. Broderick (Nashville, Tenn.; 1976), p. 554.

Heb. 10:26, JB: “Kon, human kita mahatagig kahibalo sa kamatuoran, kita gayod sa tinuyo nagahimog bisan unsang mga sala, nan wala nay bisan unsa pang halad alang niana.”

Mar. 3:29, JB: “Ang bisan kinsa nga magpasipala batok sa Balaang Espiritu ug siya dili na gayod makabaton ug kapasayloan: siya sad-an sa dumalayong sala.”

Kon sa unsang paagi ikapakita ang penitensiya

Sagad ang tagpakumpisal magmando nga ang nagapenitensiya mangadye ug tinong gidaghanon sa mga “Amahan Namo” ug mga “Maghimaya ka Maria.”

 Mat. 6:7, JB: “Sa inyong mga pag-ampo ayaw pagyamyam [nga mao, nagayamyam nga balikbalik nga walay kapuslanan] ingon sa gibuhat sa mga pagano, kay sila nagahunahuna nga pinaagig paggamit ug daghang pulong sila sa ilang kaugalingon pagadunggon.”

Mat. 6:9-12, JB: “Kinahanglang mag-ampo kamo sama niini: ‘Amahan namo nga anaa sa langit . . . pasayloa kami sa among mga utang.’” (Wala diha sa Bibliya nga kita gisugo sa pag-ampo ngadto o pinaagi kang Maria. Tan-awa usab ang Filipos 4:6, usab ang mga panid 254, 255, ubos sa “Maria.”)

Roma 12:9, JB: “Ayawg himoang salingkapaw ang inyong gugma, apan sa tim-os pilia ang maayo kay sa daotan.”

Wala ba si Jesus magtugyan ug gahom sa iyang mga apostol aron sa pagpasaylo sa mga sala?

Juan 20:21-23, JB: “‘Maingon nga gipadala ako sa Amahan, mao man usab igapadala ko kamo.’ Human siya nakasulti niini gihuypan niya sila sa iyang gininhawa ug miingon: ‘Dawata ninyo ang Balaang Espiritu. Kay kinsa ganing mga sala nga inyong pasayloon, kini pagapasayloon; kay kinsa ganing mga sala nga inyong pagahawiran, kini pagahawiran.’”

Giunsa kini sa pagsabot ug pagpadapat sa mga apostol? Walay rekord diha sa Bibliya sa usa ka hitabo nga ang usa ka apostol nagpakumpisal ug pribadong pagkumpisal ug unya mibungat ug kapasayloan. Apan, ang mga kinahanglanon nga pagapasayloon sa Diyos gilatid diha sa Bibliya. Ang mga apostol, ubos sa pagtultol sa balaang espiritu, makaila kon ang mga indibiduwal nakakab-ot ba sa maong mga kinahanglanon ug makaarang pinasukad niini sa pagpahayag nga ang Diyos nagpasaylo kanila o wala magpasaylo kanila. Alang sa mga panig-ingnan, tan-awang Buhat 5:1-11, usab ang 1 Corinto 5:1-5 ug 2 Corinto 2:6-8.

Tan-awa usab ang lintunganayng ulohang “Apostolikong Paghalili.”

Mga panghunahuna sa mga eskolar maylabot sa sinugdanan sa pangumpisal sa igdulongog dili pareho

The Catholic Encyclopedia, ni R. C. Broderick, nag-ingon: “Sukad sa ikaupat nga siglo ang pangumpisal sa igdulongog mao ang dinawat nga paagi.”—P. 58.

Ang New Catholic Encyclopedia nag-ingon: “Daghang katalirongan nga mga historyano, Katoliko man ug Protestante, nagsubay sa pribadong mga sinugdanan sa pribadong penitensiya  ingong normal nga disiplina gikan sa mga iglesya sa Ireland, Wales, ug Britanya, diin ang mga Sakramento, apil ang Penitensiya, sagad ginapatuman sa abad (pangulo sa mga monghe) sa usa ka monasteryo ug sa iyang mga pari-monghe. Pinaagig monastikong buhat sa pangumpisal ug sa publiko ug pribadong espirituwal nga pagtultol ingong modelo, ang sublisubling pagkumpisal ug pangumpisal sa debosyon daw gihimo alang sa mga ginsakpan. . . . Bisan pa niana, sa midangat na sa ika-11 nga siglo nga ang tinagong mga sala gipasaylo sa panahon sa pagkumpisal ug sa dili pa ang pagtuman sa penitensiya.”—(1967), Tomo XI, p. 75.

Ang historyanong si A. H. Sayce nagtaho: “Ang rituwal nga mga teksto nagpakita nga ang dayag ug pribadong pangumpisal gibuhat didto sa Babilonia. Sa pagkamatuod, ang pribadong pangumpisal maorag mao ang mas karaan ug mas sagad nga paagi.”—The Religions of Ancient Egypt and Babylonia (Edinburgh, 1902), p. 497.

Unsa ang mga pagtuo sa mga Saksi ni Jehova maylabot sa pangumpisal?

Pagsugid sa pagtuo sa usa pinaagig katilingbanong kapahayagan

Roma 10:9, 10: “Kon sa dayag isugid mo kanang ‘pulong sa imong kaugalingong baba,’ nga si Jesus mao ang Ginoo, ug magtuo diha sa imong kasingkasing nga ang Diyos nagbanhaw kaniya gikan sa mga patay, ikaw mamaluwas. Kay ang tawo magatuo diha sa iyang kasingkasing alang sa pagkamatarong, apan pinaagi sa baba siya magasugid sa katilingbanong kapahayagan alang sa kaluwasan.”

Mat. 10:32, 33: “Busa, bisan kinsa nga mopaila nunot kanako [Jesu-Kristo] sa atubangan sa mga tawo, ako usab mopaila nunot kaniya sa atubangan sa akong Amahan nga anaa sa mga langit; apan bisan kinsa nga magsalikway kanako atubangan sa mga tawo, ako usab magsalikway kaniya atubangan sa akong Amahan nga anaa sa mga langit.”

Sa dihang ang tawo magapakasala batok sa Diyos

Mat. 6:6-12: “Sa mag-ampo ka, sumulod ka sa imong kaugalingong lawak ug, sa matakpan na ang imong pultahan, mag-ampo ngadto sa imong Amahan nga kinsa anaa sa tago . . . ‘Amahan namo nga anaa sa mga langit, pagabalaanon unta ang imong ngalan . . . ug pasayloa kami sa among mga utang, maingon nga kami usab nakapasaylo sa mga nakautang kanamo.’”

Sal. 32:5: “Sa kataposan gisugid ko ang akong mga sala nganha kanimo [Diyos], ug wala ko tagoi ang akong kasal-anan. Ako  miingon: ‘Igasugid ko ang akong mga kalapasan ngadto kang Jehova.’ Ug ikaw mismo nagpasaylo sa pagkadaotan sa akong mga sala.”

1 Juan 2:1: “Kon si bisan kinsa makasala gayod, kita adunay magtatabang nga mangatubang sa Amahan, si Jesu-Kristo, nga matarong.”

Sa dihang ang usa ka tawo makabuhat ug kasaypanan sa iyang isigkatawo o siya ang nabuhatan ug sayop

Mat. 5:23, 24: “Nan, kon ikaw magadala sa imong halad ngadto sa halaran ug diha mahinumdom ka nga ang imo diayng igsoon adunay batok kanimo, biyai ang imong halad sa atubangan sa halaran, ug umadto ka; una pakig-uli sa imong igsoon, ug unya, sa mahabalik ka, ihalad ang imong halad.”

Mat. 18:15: “Kon ang imong igsoon makasala batok kanimo, adtoa siya ug tali kanimo ug kaniya lamang padaygi siya sa iyang sayop.”

Luc. 17:3: “Kon ang imong igsoon makasala badlonga siya, ug kon siya maghinulsol pasayloa siya.”

Efe. 4:32: “Magmapuangoron kamo sa usag usa, nga magmaluloton, nga magpinasayloay gayod sa usag usa maingon nga kamo gipasaylo gayod sa Diyos pinaagi ni Kristo.”

Sa dihang ang usa malangkit sa grabeng kasal-anan ug gustog espirituwal nga tabang

Sant. 5:14-16: “Aduna ba kaninyoy [sa espirituwal] nagamasakiton? Ipatawag kaniya ang mga ansiano sa kongregasyon, ug paampoa sila alang kaniya, nga magahaplas kaniya ug lana diha sa ngalan ni Jehova. Ug ang pag-ampong inubanag pagtuo magaayo sa masakiton, ug siya pagabangonon ni Jehova. Usab, kon siya nakahimog mga sala, siya pagapasayloon [sa Diyos]. Busa sa dayag magsinugiray kamo sa inyong kasal-anan sa usag usa ug mag-ampo alang sa usag usa, aron kamo mangaayo.”

Prov. 28:13: “Siya nga nagatabon sa iyang mga kalapasan dili molampos, apan siya nga nagasugid ug nagabiya niana makadawat ug kaluoy.”

Unsa na man kon ang mga tawo nga nanagpakasala dili mangayog tabang?

Gal. 6:1: “Mga igsoon, bisan tuod ang usa ka tawo masayop antes makaalinggat niana, kamong adunay espirituwal nga mga katakos mosulay sa pagpahiuli sa maong tawo diha sa espiritu sa kalumo, samtang ikaw nagabantay sa imong kaugalingon, sa kahadlok nga basin ikaw matental usab.”

 1 Tim. 5:20: “Badlonga atubangan sa tanan [nga mao, sila nga sa personal nahibalo sa maong butang] ang mga tawo nga nanagpadayon sa pagpakasala, aron ang uban magmatngon nga mahadlokon.”

1 Cor. 5:11-13: “Dili kamo magpakigkauban kang bisan kinsa nga nagapakaigsoon nga usa ka makihilawason o tawong dalo o tigsimbag diyosdiyos o tigpasipala o palahubog o tikasan, dili gani magpakigsalo sa pagpangaon uban sa maong tawo. . . . ‘Palagpota gikan sa inyong taliwala ang maong tawong daotan.’”