Pagtuo

Kahubitan: “Ang pagtuo mao ang tinong pagpaabot sa mga butang gilaoman, ang dayag nga pasundayag sa mga kamatuoran bisan pag wala makita.” (Heb. 11:1) Ang matuod nga pagtuo dili pagkadaling motuo, nga mao, ang pagkaandam motuo sa usa ka butang nga walay maayong pamatuod o tungod lamang kay buot sa usa ka tawo nga mao kana. Ang tinuod nga pagtuo nagkinahanglag paninugdan o pundamental nga kahibalo, pagkasinati sa pamatuod, ingon man sa kinasingkasing nga pag-ila sa kon unsay ginapaila sa maong pamatuod. Busa, bisan pag imposible ang pagbatog matuod nga pagtuo nga walay tukmang kahibalo, ang Bibliya nagaingong maoy “pinaagi sa kasingkasing” nga ang usa magtuo.—Roma 10:10.

Nganong daghang tawo ang walay pagtuo?

Ang pagtuo maoy usa ka bunga sa espiritu sa Diyos, ug ang Diyos malipayong magahatag sa iyang espiritu ngadto niadtong nagatinguha niini. (Gal. 5:22; Luc. 11:13) Busa ang mga tawong walay pagtuo wala magtinguha nianang espirituha, o nagatinguha niana sa sayop nga katuyoan o nagasukol sa paglihok niana diha sa ilang mga kinabuhi. Daghang butang nagaimpluwensiya niini:

Kakulang sa tukmang kahibalo sa Bibliya: Ang Bibliya maoy usa ka produkto sa espiritu sa Diyos, nga gidasig sa Diyos. (2 Tim. 3:16, 17; 2 Sam. 23:2) Ang pagkapakyas sa pagtuon niini magapugong sa pagkaugmad sa matuod nga pagtuo. Bisag ang mga membro sa simbahan tingali may mga Bibliya, kon sila gitudloan sa mga ideya sa mga tawo inay kay sa Pulong sa Diyos, makulangan silag matuod nga pagtuo sa Diyos ug sa iyang katuyoan. Sa pagsulbad sa mga suliran sa kinabuhi, makiling sila sa pagsalig sa ilang kaugalingong mga ideya ug sa iya sa ubang tawo.—Itandi ang Mateo 15:3-9.

Pagkawala sa kasibot sa relihiyon: Daghan ang nawad-an sa kasibot tungod sa pagkasalingkapaw sa mga iglesya sa Kakristi-  yanohan, nga nagaangkong nagatudlo sa Pulong sa Diyos apan napakyas sa pagkinabuhing nahiuyon sa ginaingon niini. Ang uban mga sumusunod sa di-Kristohanong relihiyon, apan ilang nakita ang daotang mga bunga gikan sa mga buhat niini o nasayran nilang ang ilang mga pagtuo wala gayod magtabang kanila sa pagsagubang sa mga suliran sa kinabuhi. Kay nakulangan sa tukmang kahibalo sa matuod nga Diyos, ang maong mga tawo nagapahilayo sa tanang maylabot sa relihiyon.—Itandi ang Roma 3:3, 4; Mateo 7:21-23.

Wala makasabot sa pagtugot sa Diyos sa pagkadaotan: Ang daghang tawo dili makasabot kon nganong gitugotan sa Diyos ang pagkadaotan ug busa nagabasol kaniya sa tanang daotang butang nahitabo. Wala sila makaamgo nga ang kiling sa tawo sa pagkadaotan maoy dili tungod sa pagbuot sa Diyos kondili tungod sa sala ni Adan. (Roma 5:12) Tingali sila wala masayod sa paglungtad ni Satanas nga Yawa ug sa iyang impluwensiya diha sa kahikayan sa kalibotan, mao nga ilang ipasangil sa Diyos ang daotang mga butang gibuhat ni Satanas. (1 Juan 5:19; Pin. 12:12) Kon sila may diyutayng kasayoran niining mga butanga, basin ilang gibating ang Diyos hinayang molihok, kay sila wala makasabot nga tin-aw sa isyu sa unibersohanong pagkasoberano ug wala makasabot sa kamatuorang ang pailob sa Diyos hangtod karon nagahatag kanilag dili-takos nga higayon sa kaluwasan. (Roma 2:4; 2 Ped. 3:9) Gawas pa, bug-os wala sila makaamgong ang Diyos may gitakdang panahon nga iyang laglagon sa walay kataposan ang tanang nagabuhat ug daotan.—Pin. 22:10-12; 11:18; Hab. 2:3.

Ang mga kinabuhi gigamhan sa unodnong mga pangibog ug mga punto de bista: Sa malangkobon, ang mga tawong walay pagtuo nga may tinuod nga kahulogan nagdeboto sa ilang kaugalingon ngadto sa pangagpas sa ubang intereses. Ang pipila basin moingong nagtuo silag Bibliya apan wala gayod makatuon niana sa bug-os o napakyas sa pagpalandong nga mapabilhon sa ilang gibasa, sa mga katarongan niana, ug kon sa unsang paagi mapadapat kana sa matag adlawng kinabuhi. (Itandi ang 1 Cronicas 28:9.) Sa pila ka kahimtang, napakyas sila sa pagpalambo sa pagtuo nga ilang nabatonan apan, hinunoa, nagtugot sa pangibog sa dili matarong nga mga butang nga mogahom sa kiling sa ilang kasingkasing mao nga nagpahilayo sila sa Diyos ug sa iyang mga dalan.—Heb. 3:12.

Sa unsang paagi mabatonan sa usa ka tawo ang pagtuo?

Roma 10:17: “Ang pagtuo nagasunod sa butang nadunggan.” (Itandi ang Buhat 17:11, 12; Juan 4:39-42; 2 Cronicas 9:5-8.  Kinahanglang susihon una sa usa ka tawo kon unsay ginaingon sa Bibliya, ug iyang malig-on ang iyang pagtuo kon iyang susihon kinig maayo aron siya makombinsir sa pagkakasaligan niini.)

Roma 10:10: “Pinaagi sa kasingkasing ang usa magtuo.” (Pinaagi sa pagpalandong sa diyosnong mga butang aron maugmad ang pagpabili alang niana, masilsil kini sa usa ka tawo diha sa iyang masambingayong kasingkasing.)

Ang pagtuo malig-on sa dihang ang usa ka tawo molihok pinasukad sa mga saad sa Diyos ug unya makakita sa pagpanalangin sa Diyos sa iyang gibuhat.—Tan-awa ang Salmo 106:9-12.

Ilustrasyon: Tingali may higala ka nga bahin kaniya ikaw makaingon: ‘Mosalig ako nianang tawhana. Makasalig ako nga iyang tumanon ang iyang pulong; ug ako nasayod nga kon ako may problema, siya motabang kanako.’ Si bisan kinsang bahin kaniya makasulti ka niana dili mahimong usa ka tawo nga gahapon pa nimo nahibalag, dili ba? Kinahanglang kana tawong dugay na nimong gikauban-uban, nga balikbalik nagpamatuod nga siya kasaligan. Susama usab ang relihiyosong pagtuo. Sa pagbaton ug pagtuo, gikinahanglan nimo ang panahon aron makaila kang Jehova ug sa iyang paagi sa pagbuhat sa mga butang.

Pagtuo nga adunay Diyos

Tan-awa ang mga panid 141-147, ubos sa lintunganayng ulohang “Diyos.”

Pagtuo sa palaabotong usa ka matarong bag-ong sistema sa mga butang

Inigkasinati pag-ayo sa usa ka tawo sa talaan sa mga pakiglabot ni Jehova sa iyang mga alagad, mabatonan usab niya ang hunahuna ni Josue, kinsa miingon: “Kamo nahibalo pag-ayo sa bug-os ninyong mga kasingkasing ug sa bug-os ninyong mga kalag nga walay usa ka pulong sa tanang maayong pulong nga gipamulong kaninyo ni Jehova nga inyong Diyos ang nakawang. Silang tanan natuman alang kaninyo. Walay usa ka pulong niana ang nakawang.”—Jos. 23:14.

Ang mga saad sa Bibliya sa kahimsog, pagkabanhaw gikan sa mga patay, ug uban pa, gilig-on sa talaan sa mga milagrong gibuhat ni Jesu-Kristo. Kini sila dili mga kasugiran. Basaha ang mga asoy sa Ebanghelyo ug tan-awa ang ebidensiya nga nabatonan niini nga ang tanan timaan sa makasaysayanhong pagkatinuod. Ginganlan ang mga dapit; gihatag ang mga ngalan sa katalirongang kalibotanon nga mga magmamando; napreserbar ang labaw sa usa ka asoy sa nakakita. Ang pagpalandong niining ebidensiyaha makapalig-on sa imong pagtuo sa mga saad sa Bibliya.

Adto sa mga Kingdom Hall sa mga Saksi ni Jehova ug sa ilang  linangkob nga mga kombensiyon, ug unya imong makita mismo ang ebidensiya nga ang pagpadapat sa tambag sa Bibliya magausab ug mga kinabuhi, nga kana makahimo sa mga tawo nga matinud-anon ug matarong sa moral, nga kana makapaarang sa katawhan sa tanang rasa ug nasyonalidad sa pagkinabuhi ug pagbuhat nga tingob diha sa espiritu sa tinuod nga pagkamanagsoon.

Kinahanglanon ba gayod ang mga buhat kon may pagtuo ang usa ka tawo?

Sant. 2:17, 18, 21, 22, 26: “Ang pagtuo, kon walay mga buhat, patay sa kaugalingon. Bisan pa niana, ang usa ka tawo moingon: ‘Ikaw may pagtuo, ug ako may mga buhat. Ipakita kanako ang imong pagtuo nga walay mga buhat, ug ipakita ko kanimo ang akong pagtuo pinaagi sa akong mga buhat.’ Dili ba si Abraham nga atong amahan gipahayag nga matarong pinaagi sa mga buhat human sa iyang paghalad kang Isaac nga iyang anak sa halaran? Inyong nakita nga ang iyang pagtuo naglihok duyog sa iyang mga buhat ug pinaagi sa iyang mga buhat ang iyang pagtuo nahingpit. Sa pagkamatuod, maingon nga ang lawas nga walay espiritu patay, mao man usab ang pagtuo nga walay mga buhat patay.”

Ilustrasyon: Ang usa ka ulitawo tingali magtinguha sa usa ka dalaga, nga moingong iyang gihigugma siya. Apan kon dili gayod siya mohangyong makigminyo kaniya, ang ulitawo nagapasundayag ba gayod nga bug-os ang iyang gugma? Sa susama, ang mga buhat maoy paagi sa pagpasundayag sa katiunay sa atong pagtuo ug sa atong gugma. Kon dili kita mosugot sa Diyos kita wala gayod mahigugma kaniya o walay pagtuo sa pagkamatarong sa iyang mga dalan. (1 Juan 5:3, 4) Apan kita dili makahago sa pag-angkon sa kaluwasan bisan pag unsang mga buhat ang atong ginabuhat. Ang kinabuhing dayon maoy gasa sa Diyos pinaagi ni Jesu-Kristo, dili bayad sa atong mga buhat.—Efe. 2:8, 9.