Rapture (Pagbayaw sa Himaya)

Kahubitan: Ang pagtuo nga ang matinumanong mga Kristohanon lawasnong pagabayawon gikan sa yuta, nga kalit sakgawon gikan sa kalibotan, aron mahiusa sa Ginoo “sa kahanginan.” Ang pulong “rapture” (pagbayaw sa himaya) gisabot sa pipila ka tawo, apan dili sa tanan, nga mao ang kahulogan sa 1 Tesalonica 4:17. Ang pulong “rapture” dili makita sa inspirado nga Kasulatan.

Sa miingon si apostol Pablo nga ang mga Kristohanon “pagabayawon” aron mahiusa sa Ginoo, unsang ulohana ang gihisgotan?

1 Tes. 4:13-18, RS: “Dili namo buot nga kamo dili mahibalo, mga igsoon, mahitungod kanila nga nangatulog [“kanila nga nangatulog sa kamatayon,” NE; “kanilang nangamatay,” TEV, JB], aron dili kamo managsubo ingon sa uban nga walay paglaom. Kay sanglit kita nagtuo nga si Jesus namatay ug nabanhaw, sa mao nga paagi, pinaagi ni Jesus, silang nangatulog sa kamatayon pagadad-on sa Diyos uban kaniya. Kay kini among igapahayag kaninyo pinaagi sa pulong sa Ginoo, nga kitang mga buhi, nga nagapabilin pa hangtod sa pag-abot sa Ginoo, dili mag-una kanilang nangatulog. Kay ang Ginoo mismo manaog gikan sa langit uban sa usa ka singgit sa pagsugo, uban sa tawag sa arkanghel, ug sa tingog sa trompeta sa Diyos. Ug ang mga nangamatay diha kang Kristo mouna sa pagbangon; dayon kitang buhi, nga nangabilin, pagabayawon uban kanila sa mga panganod sa pagsugat sa Ginoo sa kahanginan; ug sa ingon niana kita mahauban na sa Ginoo sa tanang panahon. Busa paglipayay kamo sa usag usa niining mga pulonga.” (Dayag nga namatay na ang pipila ka sakop sa Kristohanong kongregasyon sa Tesalonica. Gidasig sila ni Pablo nga maglipayay sa usag usa sa paglaom sa pagkabanhaw. Iyang gipahinumdoman sila nga si Jesus nabanhaw tapos sa iyang pagkamatay; busa, usab, sa pag-abot sa Ginoo, kadtong matinumanong mga Kristohanon sa ilang taliwala nga namatay pagabanhawon aron mahauban kang Kristo.)

 Kinsa ba kadtong ‘pagabayawon sa mga panganod,’ sumala sa gipahayag sa 1 Tesalonica 4:17?

Ang 1Te 4 bersikulo 15 nagapatin-aw nga sila maoy mga matinumanon “nga nagapabilin hangtod sa pag-abot sa Ginoo,” nga mao, sila buhi pa sa panahon sa pag-abot ni Kristo. Mamatay pa ba sila? Sumala sa Roma 6:3-5 ug 1 Corinto 15:35, 36, 44 (nga gikutlo sa mga  panid 349, 350), kinahanglang sila mamatay sa dili pa sila makabatog langitnong kinabuhi. Apan dili kinahanglang sila magapabilin diha sa namatay nga kahimtang nga nagapaabot sa pagbalik ni Kristo. Sila dihadiha “pagabayawon,” “sa pagpilok sa mata,” aron mahauban sa Ginoo.—1 Cor. 15:51, 52, RS; usab ang Pinadayag 14:13.

Si Kristo mopakita ba sa panganod ug dayon kuhaon ang matinumanong mga Kristohanon ngadto sa mga langit samtang motan-aw ang kalibotan?

Si Jesus miingon ba nga ang kalibotan makakita kaniya pag-usab pinaagi sa ilang literal nga mga mata?

Juan 14:19, RS: “Apan sa dili na madugay, ug ang kalibotan dili na makakita kanako, apan kamo [matinumanon niyang mga tinun-an] makakita kanako; tungod kay ako buhi, ug kamo mangabuhi usab.” (Italiko gidugang.) (Itandi ang 1 Timoteo 6:16.)

Unsa ang kahulogan sa ang Ginoo ‘manaog gikan sa langit’?

Ang Ginoo ba “manaog gikan sa langit,” sumala sa gipahayag sa 1 Tesalonica 4:16, nga dili makita sa literal nga mga mata? Sa mga adlaw sa karaang Sodoma ug Gomora, si Jehova miingon nga siya “manaog aron tan-awon” kon unsay gibuhat sa katawhan. (Gen. 18:21, RS) Apan sa gihimo ni Jehova ang maong pagsusi, walay tawong nakakita kaniya, bisan tuod ilang nakita ang manulondang mga hawas nga iyang gisugo. (Juan 1:18) Sa samang paagi, nga dili kinahanglang mobalik sa unod, si Jesus makatumong sa iyang pagtagad ngadto sa iyang matinumanong mga sumusunod sa yuta sa pagganti kanila.

Nan, sa unsang kahulogan ang mga tawo “makakita” sa Ginoo nga “moabot diha sa panganod”?

Si Jesus mitagna: “Unya ilang makita ang Anak sa tawo [si Jesu-Kristo] nga moabot diha sa panganod uban ang gahom ug dakong himaya.” (Luc. 21:27, RS) Kini o ang susamang mga pahayag sa ubang teksto wala magsupak sa giingon ni Jesus sumala sa nahitala sa Juan 14:19. Palandonga: Sa Bukid Sinai, unsay nahitabo sa dihang ang Diyos ‘mianha sa katawhan diha sa mabagang panganod,’ sumala sa giingon sa Exodo 19:9? (RS) Ang Diyos  presente niadto nga dili makita; ang katawhan sa Israel nakakitag dayag nga ebidensiya sa iyang presensiya, apan walay usa kanila ang tinuod nakakita sa Diyos pinaagi sa ilang mga mata. Mao man, usab, sa miingon si Jesus nga siya moabot “diha sa panganod,” gipasabot gayod niya nga siya dili makita sa mga mata sa tawo apan ang mga tawo mahibalo sa iyang presensiya. Ilang “makita” siya pinaagi sa ilang mga mata sa hunahuna, nga makasabot nga siya presente. (Alang sa dugang mga komento, tan-awa ang lintunganayng ulohang “Pagbalik ni Kristo.”)

 Mahimo bang dad-on sa langit ang mga Kristohanon uban sa ilang unodnong mga lawas?

1 Cor. 15:50, RS: “Magaingon ako niini kaninyo, mga igsoon: ang unod ug dugo dili makapanunod sa gingharian sa Diyos, ni ang madunoton magapanunod sa pagkadili-madunoton.”

Ang kasinatian ba ni propeta Elias mosumpaki niini? Dili gayod. Kinahanglang sabton kini sa kahayag sa tin-aw nga pahayag ni Jesus kasiglohan sa ulahi: “Walay misaka sa langit kondili siya nga nanaog gikan sa langit, ang Anak sa tawo.” (Juan 3:13, RS) Bisan tuod si Elias nakita samtang “siya mikayab ngadto sa langit pinaagi sa alimpulos,” kini wala magpasabot nga siya miadto sa kalibotan sa espiritu. Nganong wala man? Kay siya sa ulahi gitahong nagpadalag sulat sa pagbadlong ngadto sa hari sa Juda. (2 Hari 2:11, RS; 2 Cron. 21:1, 12-15) Sa wala pa maimbento sa mga tawo ang mga ayroplano, gigamit didto ni Jehova ang kaugalingon niyang paagi (usa ka kalayonhong karro ug alimpulos) sa pagpakayab kang Elias ngadto sa langit diin nagalupad ang kalanggaman ug pagdala kaniya ngadto sa laing dapit.—Itandi ang Genesis 1:6-8, 20.

Ang matinumanong mga Kristohanon pagadad-on kaha sa langit sa sekreto, nga mawala lamang gikan sa yuta nga dili na mamatay?

Roma 6:3-5, RS: “Wala ba kamo mahibalo nga kitang tanan nga nabawtismohan ngadto kang Kristo Jesus nangabawtismohan ngadto sa iyang kamatayon? . . . Kay kon kita nahiusa kaniya sa kamatayon nga sama sa iya, kita mahiusa gayod kaniya sa pagkabanhaw nga sama sa iya.” (Ang nahitabo sa kahimtang ni Jesus mao ang sumbanan. Ang iyang mga tinun-an ingon man ang uban nasayod nga siya namatay. Siya wala mapasig-uli sa langitnong kinabuhi hangtod nga siya namatay ug nabanhaw.)

1 Cor. 15:35, 36, 44, RS: “May mangutana, ‘Sa unsang paagi ang mga patay pagabanhawon? Uban sa unsang matang sa lawas sila moabot?’ Ikaw nga buangbuang! Ang imong gipugas dili mabuhi gawas nga kini mamatay. Kini gipugas nga usa ka unodnong  lawas, kini pagabanhawon sa lawas nga espirituhanon.” (Busa ang kamatayon mahitabo una sa dili pa dawaton sa usa ang maong lawas nga espirituhanon, dili ba?)

Ang tanan bang matinumanong Kristohanon milagrosong kuhaon sa Ginoo gikan sa yuta sa dili pa ang dakong kasakitan?

Mat. 24:21, 22: “Unya moabot ang dakong kasakitan nga ang ingon wala pa mahitabo sukad sa sinugdan sa kalibotan hangtod karon, wala, ni mahitabo pa kana pag-usab. Sa pagkamatuod, gawas kon pamub-an ang maong mga adlaw, walay unod nga maluwas; apan tungod sa mga pinili ang maong mga adlaw pagapamub-an.” (Kini wala mag-ingong ang “mga pinili” dad-on ngatanan sa langit sa dili pa ang dakong kasakitan, dili ba? Hinunoa, kini nagatanyag kanila, uban sa mga kaubanang anaa sa unod, sa kalaomang maluwas nianang dakong kasakitan sa yuta.)

Pin. 7:9, 10, 14, RS: “Tapos niini mitan-aw ako, ug tan-awa, usa ka dakong panon nga walay tawong makaihap, gikan sa tanang nasod, gikan sa tanang kabanayan ug mga katawhan ug mga pinulongan, nga nagbarog atubangan sa trono ug atubangan sa Kordero, nga sinul-oban sa maputing hatag-as nga besti, nga may dalang mga palwa sa palma sa ilang mga kamot, ug nagsinggit uban ang makusog nga tingog, ‘Ang kaluwasan iya sa among Diyos nga nagalingkod sa trono, ug sa Kordero!’ . . . ‘Kini sila mao ang nanggula sa dakong kasakitan.’” (Aron “mogula” ang usa ka tawo kinahanglang mosulod o anaa sa sulod niana. Busa kining dakong panon maoy mga tawong nakasinati sa dakong kasakitan ug mogula niana ingong mga nangaluwas.) (Mahitungod sa ilang pagkaanaa sa yuta, tan-awa ang mga panid 237, 238.)

Unsa ang panalipod sa matuod nga mga Kristohanon panahon sa dakong kasakitan?

Roma 10:13, RS: “Ang matag usa nga motawag sa ngalan sa Ginoo [“Jehovah,” NW], mamaluwas.”

Sof. 2:3, RS: “Pangitaa ninyo ang GINOO [“Jehovah,” NW, AS, Yg, By], kamong tanang mapaubsanon sa yuta, nga nagatuman sa iyang mga sugo; pangitaa ninyo ang pagkamatarong, pangitaa ang pagkamapaubsanon; tingali kamo pagatagoan sa adlaw sa kapungot sa GINOO.” (Isaias 26:20 usab)

Ang tanang matuod nga Kristohanon dad-on kaha sa langit tapos sa dakong kasakitan?

Mat. 5:5, RS: “Bulahan ang mga maaghop, kay sila magapanunod sa yuta.”

 Sal. 37:29, RS: “Ang mga matarong magapanunod sa yuta [“yuta,” Ro, NW], ug magapuyo niana sa walay kataposan.” (Mga Sal 37 bersikulo 10, 11, 34 usab)

1 Cor. 15:50, RS: “Ang unod ug dugo dili makapanunod sa gingharian sa Diyos.”

Tan-awa usab ang lintunganayng ulohang “Langit.”

Nganong ang pipila ka Kristohanon dad-on man sa langit aron mahauban kang Kristo?

Pin. 20:6, RS: “Sila mahimong mga saserdote sa Diyos ug ni Kristo, ug sila magahari uban kaniya sa usa ka libo ka tuig.” (Sanglit sila magahari uban kang Kristo, kinahanglang may katawhan nga ilang pagaharian. Kinsa ba sila? Tan-awa ang Mateo 5:5 ug Salmo 37:29.)

Tan-awa usab ang lintunganayng ulohang “Pagkainanak Pag-usab.”

Kadto bang moadto sa langit sa ulahi mobalik sa yuta aron mopuyo dinhi sa Paraiso?

Prov. 2:21, RS: “Ang mga matarong magapuyo sa yuta [“magapuyo ibabaw sa yuta,” NE], ug ang mga tawo sa katarong magapabilin diha niana.” (Matikding ang teksto wala mag-ingon nga ang maong matarong nga katawhan mobalik sa yuta apan nga sila magapabilin dinha.)

1 Tes. 4:17, RS: “Ug sa ingon niana kita [mga Kristohanong gibayaw ngadto sa langit] mahauban na sa Ginoo sa tanang panahon.”

Kon Adunay Moingon—

‘Nagatuo ka ba sa pagbayaw sa himaya o rapture?’

Mahimong tubagon mo: ‘Sa hunahuna ko dili ang tanan adunay samang ideya niana kon unsay kahulogan sa rapture. Makapangutana ko kon unsay imong panghunahuna bahin niana? . . . Sa bisan unsang butang, makaayo nga itandi ang atong mga panghunahuna sa ginaingon mismo sa Bibliya. (Gamitang mga bahin sa materyal sa itaas nga mapadapat.)’

O ikaw makaingon: ‘Ang pagbayaw sa himaya (rapture) gikapatin-aw kanako ingong plano sa pag-ikyas alang sa mga Kristohanon. Daghan ang nagabati nga mao kini ang paagi nga sila makaikyas sa umaabot nga dakong kasakitan. Mao ba kana ang imong pagbati?’ Dayon tingali modugang: (1) ‘Piho nga gusto  nato ang panalipod sa Diyos sa maong panahon, ug nakaplagan ko nga makapalig-on kaayo ang pipila ka teksto nga nagapakita sa paagi nga kita makabenepisyo gikan niana. (Sof. 2:3)’ (2) ‘Nga makapainteres, ang Bibliya nagapakita nga panalipdan sa Diyos ang ubang mga matinumanon dinhi mismo sa yuta. (Prov. 2:21, 22) Kana nahauyon sa katuyoan sa Diyos sa gilalang niya sa sinugdan si Adan ug gibutang siya sa Paraiso, di ba mao?’

Laing posibilidad: ‘Sa rapture nga imong gipasabot mao nga ang mga Kristohanon nga buhi sa kataposan sa sistema sa mga butang pagadad-on sa langit, di ba mao na? . . . Gipalandong ba gayod nimo kon unsay ilang buhaton sa dihang sila mahalangit na? . . . Matikdi ang giingon sa Pinadayag 20:6 (ug Pin 5:9, 10). . . . Apan ibabaw kang kinsa nga sila magamando? (Sal. 37:10, 11, 29)’