Satanas nga Yawa

Kahubitan: Ang espiritung persona nga mao ang pangulong kaaway ni Jehova nga Diyos ug sa tanang nagasimba sa matuod nga Diyos. Ang ngalang Satanas gingalan kaniya tungod sa iyang pagkahimong magsusupak kang Jehova. Si Satanas nailhan usab ingong ang Yawa, sanglit kay siya man ang kinaunhang tigpanamastamas sa Diyos. Gihulagway si Satanas ingong ang orihinal nga serpente, tungod gayod sa iyang paggamit sa bitin didto sa Eden aron sa paglimbong kang Eva, ug tungod niining rasona nga ang “serpente” nagkahulogang “maglilimbong.” Sa basahon sa Pinadayag, ang simbolismo sa matukbanong dragon gipadapat usab kang Satanas.

 Unsaon ta man sa pagkasayod kon ang maong espiritung persona nagalungtad gayod?

Ang Bibliya mao ang dakong tinubdan sa pamatuod. Dinha siya sublisubling gipunting sa ngalan (Satanas 52 ka panahon, Yawa 33 ka higayon). Gitala usab dinha ang pamatuod sa nakakita gayod bahin sa kalungtaran ni Satanas. Kinsa man ang nakakita gayod? Si Jesu-Kristo, kinsa nagpuyo sa langit sa wala pa moanhi sa yuta, sublisubling naghisgot nianang usa nga daotan pinaagig ngalan.—Luc. 22:31; 10:18; Mat. 25:41.

Ang ginaingon sa Bibliya bahin kang Satanas nga Yawa adunay kahulogan. Ang pagkadaotan nga ginasugamak sa katawhan hilabihan na kaayo ngadto sa kadaot sa mga tawo nga nalangkit. Ang pagpatin-aw sa Bibliya sa sinugdanan ni Satanas ug sa iyang mga buhat nagabutyag gayod kon ngano, bisan pa sa tinguha sa kadaghanan sa pagpuyo diha sa kalinaw, ang katawhan ginahampak sa pagdumot, kabangis, ug gubat sa mga linibo ka katuigan ug kon ngano nga kini miabot sa maong kahimtang nga karon nagahulga sa paglaglag sa tibuok katawhan.

Kon wala gayoy Yawa, ang pagdawat sa ginaingon sa Bibliya bahin kaniya dili magpatunghag dumalayong mga kaayohan ngadto sa usa ka tawo. Sa daghang hitabo, hinuon, ang mga tawo kinsa sa miaging panahon nagduladula sa okulto o sakop sa mga grupo nga nagbansay sa espiritismo nagtaho nga sila niadtong panahona gisamok ug maayo tungod sa pagkadungog sa “mga tingog” gikan sa dili makita, nga “gipuy-an” sa labaw-tawhanong mga linalang, ubp. Nahuptan ang tinuod nga kahupayan sa nakat-onan nila ang giingon sa Bibliya bahin kang Satanas ug sa iyang mga demonyo, gipadapat ang tambag sa Bibliya sa paglikay sa espiritistikong mga buhat, ug nagpatabang kang Jehova diha sa pag-ampo.—Tan-awang mga panid 167-172, ubos sa ulohang “Espiritismo.”

Ang pagtuo nga si Satanas nagalungtad wala magkahulogan sa pagdawat sa ideya nga siya adunay mga sungay, talinis nga ikog, ug usa ka karas ug nga iyang ginaasal ang mga tawo diha sa impiyernong kalayo. Walay gibutyag ang Bibliya sa maong paghulagway kang Satanas. Kana maoy bunga sa mga hunahuna sa mga artista niadtong edad medya kinsa naimpluwensiyahan sa mga hulagway sa mitolohikal Gregong diyos nga si Pan ug sa Inferno nga gisulat sa Italyanong magbabalak nga si Dante Alighieri. Inay kay sa pagtudlo ug impiyernong kalayo, ang Bibliya tin-aw nga nagaingon nga “ang mga patay . . . dili mahibalo sa bisan unsa.”—Eccl. 9:5.

Si Satanas kaha mao lamay pagkadaotan nga anaa sa sulod sa mga tawo?

Ang Job 1:6-12 ug Job 2:1-7 naghisgot bahin sa mga panaghisgot tali kang Jehova nga Diyos ug kang Satanas. Kon si Satanas maoy  pagkadaotan sulod sa usa ka tawo, ang pagkadaotan niining kahimtanga maoy sa sulod ni Jehova. Apan kana bug-os nga dili uyon sa gitug-an kanato sa Bibliya bahin kang Jehova ingong Usa nga “diha kaniya walay pagkadimatarong.” (Sal. 92:15; Pin. 4:8) Pagamatikdan nga ang Hebreong teksto naggamit sa pulong has·Sa·tanʹ (ang Satanas) diha sa kasaysayan ni Job, nga nagpakita nga gipunting ang usa kinsa mao ang magsusupak gayod sa Diyos.—Tan-awa usab ang Zacarias 3:1, 2, footnote diha sa NW Reference edition.

Nagreport ang Lucas 4:1-13 nga nanlimbasog ang Yawa sa pagtental kang Jesus sa pagbuhat sa iyang tanyag. Ang kasaysayan naghisgot sa mga pulong sa Yawa ug mga tubag ni Jesus. Si Jesus ba gitental didto pinaagig pagkadaotan nga anaa sa sulod sa iyang kaugalingon? Ang maong pangisip dili mahauyon sa paghubit sa Bibliya kang Jesus ingong walay sala. (Heb. 7:26; 1 Ped. 2:22) Bisan tuod sa Juan 6:70 ang Gregong pulong nga di·aʹbo·losʹ gigamit sa paghubit sa daotang hiyas nga naugmad diha kang Judas Iskariote, sa Lucas 4:3 ang pulong ho di·aʹbo·los (ang Yawa) gigamit, busa nagpaila ug tinong persona.

Ang pagpasangil ba sa Yawa maoy paagi lamang nga gigamit aron makalikay sa kaakohan tungod sa daotang mga kahimtang?

Ang ubang mga tawo nagapasangil sa Yawa kon unsa ang ilang ginabuhat mismo. Sa kasukwahi, ang Bibliya nagapakita nga ang mga tawo sagad mao ang kahan-okan gayod sa kadaotan nga ilang nasugamak, diha man sa mga kamot sa ubang mga tawo o ingong resulta sa ilang kaugalingong panggawi. (Eccl. 8:9; Gal. 6:7) Apan, wala kita pasagdi sa Bibliya nga dili masayod sa kalungtaran ug mga paagi sa labaw-tawo nga kaaway nga nagpatunghag dakong kagul-anan sa katawhan. Kana nagapakita sa paagi nga kita makalingkawas sa iyang pagmando.

Diin gikan si Satanas?

Ang tanang buhat ni Jehova maoy hingpit; dili siya ang tagmugna sa pagkadimatarong; mao nga wala siya maglalang ug bisan kinsa nga daotan. (Deut. 32:4; Sal. 5:4) Ang usa nga nahimong Satanas sa sinugdan usa ka hingpit nga espiritung anak sa Diyos. Sa pag-ingon nga ang Yawa “wala mobarog nga malig-on sa kamatuoran,” gipakita ni Jesus nga sa usa ka panahon ang maong usa “diha sa kamatuoran.” (Juan 8:44) Apan, ingong tinuod sa tanang intelihenteng mga linalang sa Diyos, kining maong espiritung anak sa Diyos gihatagan ug kabubut-ong gawas (free will). Iyang giabusohan ang iyang kagawasan sa pagpili, nagtugot sa mga pagbati sa importansiya-kaugalingon nga molambo sa iyang kasingkasing, misugod sa pagpangandoy sa pagsimba nga iya la-  mang sa Diyos, ug busa gitental si Adan ug Eva sa pagpatalinghog kaniya inay kay sa pagsunod sa Diyos. Busa pinaagi sa iyang panggawi siya naghimo sa iyang kaugalingon nga Satanas, nga nagakahulogang “kaaway.”—Sant. 1:14, 15; tan-awa usab ang panid 384, ubos sa ulohang “Sala.”

Nganong wala dayon laglaga sa Diyos si Satanas human sa iyang pagrebelde?

Ang mabug-at nga mga isyu gipatungha ni Satanas: (1) Ang pagkamatarong ug pagkahusto sa pagkamagmamando ni Jehova. Ang katawhan ba gihikawan ni Jehova ug kagawasan nga moamot sa ilang kalipay? Ang katakos ba sa katawhan sa pagdumala sa ilang mga kalihokan magmalamposon ug ang ilang padayong kinabuhi magdepende gayod sa ilang pagsunod sa Diyos? Si Jehova ba naglimbong sa paghatag ug balaod nga nagbutyag nga ang pagkamasupilon mohatod sa ilang kamatayon? (Gen. 2:16, 17; 3:3-5) Busa, si Jehova aduna ba gayoy katungod sa pagmando? (2) Ang integridad sa intelihenteng mga linalang ngadto kang Jehova. Pinaagig pagsimang ni Adan ug Eva ang suliran mitungha: Nagsunod ba gayod ang mga alagad ni Jehova tungod sa gugma o hayan ang tanan kanila mobiya sa Diyos ug mosunod sa pagtultol ni Satanas? Kining ulahing isyu dugang nga giugmad ni Satanas sa mga adlaw ni Job. (Gen. 3:6; Job 1:8-11; 2:3-5; tan-awa usab ang Lucas 22:31.) Kining maong mga suliran dili masulbad pinaagig paglaglag lang sa mga rebelde.

Dili nga ang Diyos nagkinahanglan ug bisan unsa sa pagpamatuod sa iyang kaugalingon. Apan aron nga kining mga isyuha dili na gayod magtugaw sa kalinaw ug sa kaayohan sa uniberso, si Jehova mitugot ug igong panahon alang niini aron sa bug-os nga pagsulbad. Nga si Adan ug Eva namatay human sa pagsupil sa Diyos nahimong dayag sa igong panahon. (Gen. 5:5) Apan dugang pa ang sulbaronon. Mao nga, gitugotan sa Diyos si Satanas ug ang mga tawo sa pagsulay sa matag porma sa gobyerno nga ila mismong hinimo. Walay nakapatungha ug dumalayong kalipay. Gitugotan sa Diyos ang katawhan kutob sa mahimo sa pagtuman sa mga paagi sa kinabuhi nga nagasalindot sa Iyang matarong mga sukdanan. Ang bunga niana maoy nagsulti. Ingon sa giingon gayod sa Bibliya: “Kini wala sa tawo nga molakaw sa pagtultol gani sa iyang lakang.” (Jer. 10:23) Sa samang panahon gihatagan ug higayon sa Diyos ang iyang mga alagad sa pagpamatuod sa ilang pagkamaunongon ngadto kaniya pinaagig ilang mga buhat sa mahigugmaong pagkamasinundanon, ug kini sa atubangan sa mga pagtental ug paglutos nga gipaluyohan ni Satanas. Si Jehova nagatambag sa iyang mga alagad, sa pag-ingon: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.” (Prov. 27:11) Kadtong nagapama-  tuod nga matinumanon magaani ug dakong mga kaayohan karon ug makabaton ug kalaoman sa kinabuhing dayon diha sa kahingpitan. Ilang gamiton ang maong kinabuhi sa pagbuhat sa kabubut-on ni Jehova, kansang personalidad ug mga paagi ila gayong gihigugma.

Unsa ka gamhanan si Satanas diha sa kalibotan karon?

Si Jesu-Kristo mipunting kaniya ingong “ang magmamando sa kalibotan,” nga mao siya ang ginasunod sa katawhan sa kasagaran pinaagig pagtuman sa iyang mga pagdaldal sa pagsalikway sa mga tulomanon sa Diyos. (Juan 14:30; Efe. 2:2) Ang Bibliya nagtawag usab kaniyang “ang diyos niining sistema sa mga butang,” kinsa gipasidunggan pinaagig relihiyosong mga buhat sa katawhan nga nagasunod niining sistema sa mga butang.—2 Cor. 4:4; 1 Cor. 10:20.

Sa dihang nanlimbasog sa pagtental kang Jesu-Kristo, ang Yawa “nagdala kaniya ug gipakitaan siya sa makadiyot sa tanang gingharian sa pinuy-anang yuta; ug ang Yawa miingon kaniya: ‘Ihatag ko kanimo kining tanang kagamhanan ug ang ilang himaya, kay kini gikatugyan man kanako, ug ihatag ko kini kang bisan kinsa nga akong gusto. Busa, kon ikaw mosimba sa akong atubangan, kining tanan maimo.’” (Luc. 4:5-7) Ang Pinadayag 13:1, 2 nagbutyag nga si Satanas nagahatag ug ‘gahom, trono ug dakong pagbulot-an’ ngadto sa globonhong politikal nga sistema sa pagmando. Nagbutyag ang Daniel 10:13, 20 nga si Satanas adunay demonyohanong mga prinsipe ibabaw sa dagkong mga gingharian sa yuta. Nagpunting ang Efeso 6:12 niini kanila ingong nagalangkob sa ‘mga gobyerno, mga pagbulot-an, mga magmamando niini nga kangitngit, daotang mga espiritu diha sa langitnong mga dapit.’

Dili ikatingala nga ang 1 Juan 5:19 nag-ingon: “Ang tibuok kalibotan anaa sa gahom sa daotan.” Apan ang iyang gahom maoy alang lamang sa limitadong yugto sa panahon ug pinaagi lamang sa pagtugot ni Jehova, kinsa mao ang Diyos nga Labing Gamhanan.

Unsang gidugayon nga si Satanas tugotan sa pagpahisalaag sa katawhan?

Alang sa ebidensiya nga kita karon nagapuyo sa kataposang mga adlaw sa daotang sistema sa mga butang ni Satanas, tan-awa ang mga panid 333-336, ubos sa “Mga Petsa,” ug sa lintunganayng ulohang “Kataposang mga Adlaw.”

Ang tagana sa kahupayan gikan sa daotang impluwensiya ni Satanas sa mahulagwayon gihubit niining paagiha: “Akong nakita  ang usa ka manulonda nga nanaog gikan sa langit nga may dalang yawi sa bung-aw sa kahiladman ug usa ka dakong talikala diha sa iyang kamot. Ug iyang gidakop ang dragon, ang karaang serpente, kinsa mao ang Yawa ug Satanas, ug gigapos siya sa usa ka libo ka tuig. Ug iyang gitambog siya ngadto sa bung-aw sa kahiladman ug gisirhan ug gitimrihan kana ibabaw kaniya, aron dili na siya makapahisalaag sa kanasoran hangtod matapos ang usa ka libo ka tuig. Human niining mga butanga kinahanglan siyang buhian sa makadiyot.” (Pin. 20:1-3) Dayon unsa? “Ang Yawa nga nagpasalaag kanila gitambog ngadto sa linaw nga kalayo ug asupre.” (Pin. 20:10) Unsay kahulogan niana? Nagatubag ang Pinadayag 21:8: “Kini nagakahulogan sa ikaduhang kamatayon.” Siya mawagtang sa walay kataposan!

 Ang ‘pagtambog sa bung-aw’ kang Satanas nagakahulogan ba nga siya bilanggoon sa awaaw nga yuta nga walay tawo nga iyang pagatentalon sa usa ka libo ka tuig?

Ang ubang mga tawo motumong sa Pinadayag 20:3 (gikutlo sa  panid 396) sa pagsuportar niining ideyaha. Sila nagaingon nga ang “bung-aw,” o “dili matugkad nga gahong” (KJ), nagahulagway sa yuta diha sa kahimtang sa pagkaawaaw. Mao ba kana? Ang Pinadayag 12:7-9, 12 (KJ) nagapakita nga sa pipila ka panahon sa dili pa ang iyang pagkatambog sa bung-aw si Satanas “gitambog” gikan sa langit nganhi sa yuta, nga iyang gipatungha ang nagsamot nga kasakit sa katawhan. Busa, sa dihang ang Pinadayag 20:3 (KJ) nag-ingon nga si Satanas “itambog . . . ngadto sa dili matugkad nga gahong,” dayag nga dili na siya magpabilin sa kanhing dapit—dili makita apan gikutohan diha sa kasikbitan sa yuta. Siya ipahilayo gayod gikan didto, “aron dili na siya makapahisalaag sa kanasoran, hangtod matapos ang usa ka libo ka tuig.” Matikdi nga ang Pinadayag 20:3, nag-ingon nga, sa kataposan sa usa ka libo ka tuig, si Satanas, dili ang mga nasod, ang pagabuhian gikan sa bung-aw. Sa dihang buhian na si Satanas, ang katawhan nga kanhi naglangkob sa maong mga nasod anaa na.

Ang Isaias 24:1-6 ug Jeremias 4:23-29 (KJ) usahay gipunting sa pagsuportar niining pagtuoha. Kini nag-ingon: “Tan-awa, ang yuta himoon sa GINOO nga walay sulod, ug himoon kini nga kamingawan . . . Ang yuta himoong bug-os nga walay sulod, ug bug-os pagalaglagon: kay ang GINOO maoy nagsulti niining pulonga.” “Gitan-aw ko ang yuta, ug, ania karon, kini awaaw, ug walay sulod . . . Gitan-aw ko, ug, ania karon, walay tawo . . . Kay mao kini ang giingon sa GINOO, Ang tibuok yuta mahimong biniyaan . . . Ang tagsatagsa ka siyudad pagabiyaan, ug walay tawo nga mopuyo didto.” Unsay kahulogan niining mga tagnaa? Ang unang katumanan niini nahitabo sa Jerusalem ug sa yuta sa Juda. Sa pagpaham- tang sa balaang paghukom, si Jehova mitugot sa mga Babilonyanhon sa pag-ilog sa yuta. Sa kataposan gibiyaan kana nga awaaw ug walay sulod. (Tan-awang Jeremias 36:29.) Apan sa maong panahon wala pawad-i sa Diyos ug pumoluyo ang interong globo, ni iyang buhaton kana karon. (Tan-awang mga panid 434-437, ubos sa “Yuta,” mao man usab ang lintunganayng ulohang “Langit.”) Apan, iyang bug-os nga wagtangon ang modernong katumbas sa dili matinumanong Jerusalem, ang Kakristiyanohan, nga nagapasipala sa ngalan sa Diyos pinaagig dili balaang kagawian niini, ug ang tanang bahin sa makitang organisasyon ni Satanas.

Inay kay mahimong biniyaang kamingawan, sulod sa Usa ka Libo ka Tuig nga Pagmando ni Kristo, ug samtang si Satanas atua sa bung-aw sa kahiladman, ang tibuok yuta mahimong usa ka paraiso. (Tan-awang “Paraiso.”)