Sekso

Kahubitan: Ang mga kinaiya sa yutan-ong mga linalang nga nagasilbeng paagi sa pagsanay pinaagig duha ka nagaluon nga mga ginikanan. Ang kalainan tali sa lalaki ug babayeng mga sekso adunay dako kaayong mga epekto sa tawhanong kinabuhi. Sanglit kay ang Diyos mismo mao ang Tinubdan sa kinabuhi ug tungod kay ang mga tawo kinahanglan mang magsumbaliksilaw sa iyang mga hiyas, ang katakos sa paghatag ug kinabuhi pinaagig seksuwal nga mga relasyon kinahanglang tagdon uban ang dakong pagtahod.

Nagatudlo ba ang Bibliya nga ang seksuwal nga mga relasyon masalaypon o sala?

Gen. 1:28: “Ang Diyos nagpanalangin kanila [Adan ug Eva] ug miingon ang Diyos kanila: ‘Sumanay ug dumaghan kamo ug pun-on ang yuta.’” (Ang pagtuman niining balaang sugo nagakinahanglan nga aduna silay mga relasyon sa sekso, di ba mao? Ang pagbuhat niana dili sala kondili maoy uyon sa katuyoan sa Diyos sa pagpuno sa yuta. Ang ubang mga tawo naghunahuna nga ang ‘gidiling bunga’ didto sa Eden basin usa ka simbolikong pagtumong sa balaang restriksiyon o pagdili gani sa seksuwal nga mga relasyon sa bahin ni Adan ug Eva. Pero kana mosumpaki sa balaang sugo nga gikutlo sa itaas. Mosumpaki usab kana sa kamatuoran nga, bisan tuod si Adan ug Eva mikaon sa gidiling bunga sa Eden, ang unang paghisgot sa ilang paghimog seksuwal nga panagluon nahitabo human sila gipalagpot gikan didto.—Gen. 2:17; 3:17, 23; 4:1.)

 Gen. 9:1: “Ang Diyos mipadayon sa pagpanalangin kang Noe ug sa iyang mga anak nga lalaki ug miingon kanila: ‘Sumanay ug dumaghan kamo ug pun-on ang yuta.’” (Kining dugang panalangin, uban sa pagbungat pag-usab sa balaang sugo sa pagsanay, gihatag human sa globonhong Lunop sa adlaw ni Noe. Ang panghunahuna sa Diyos maylabot sa uyon sa balaod nga seksuwal nga mga relasyon wala mausab.)

1 Cor. 7:2-5: “Tungod sa pagkadagsang sa pakighilawas, tugoting ang matag lalaki magbaton sa iyang kaugalingong asawa ug ang matag babaye magbaton sa iyang kaugalingong bana. Ang bana magahatag ngadto sa iyang asawa sa angay kaniya; apan ang asawa mohatag usab niana ngadto sa iyang bana. . . . Ayawg hikawi ang matag usa niana, gawas kon pinaagi sa panagsabot alang sa tinudlong panahon, . . . aron si Satanas dili padayong magtental kaninyo tungod sa kakulang sa pagpugong-kaugalingon.” (Ang gipakita diay nga sala mao ang pakighilawas, dili ang husto seksuwal nga mga relasyon tali sa bana ug asawa.)

Sala ba ang seksuwal nga mga relasyon antes sa kaminyoon?

1 Tes. 4:3-8: “Mao kini ang pagbuot sa Diyos . . . nga kamo maglikay sa pakighilawas; nga ang matag usa kaninyo kinahanglang mahibalo kon unsaon sa paghupot sa iyang kaugalingong sudlanan diha sa pagkabalaan ug kadungganan, dili sa kaulag ingon sa ginabuhat sa mga nasod nga wala makaila sa Diyos; nga walay bisan kinsa nga magdaot ug manghilabot sa mga katungod sa iyang igsoon niining butanga, kay si Jehova mao ang mopahamtang ug silot niining tanang mga butanga, maingon nga kami nagpasidaan na kaninyo ug naghatag usab kaninyo sa bug-os nga pamatuod. Kay ang Diyos nagtawag kanato, dili sa pagtugot sa kahugawan, kondili sa pagkabalaan. Busa, diay, ang tawo nga dili motagad nagasalikway, dili sa tawo, kondili sa Diyos, nga nagahatag sa iyang balaang espiritu kaninyo.” (Ang Gregong pulong por·neiʹa, nga gihubad nga “pakighilawas,” nagtumong sa seksuwal nga panagluon tali sa dili minyong mga tawo, maingon man sa gawas-sa-magtiayon nga mga relasyon sa bahin sa minyong mga tawo.)

Efe. 5:5: “Walay makighilawason o mahugaw nga tawo o dalo nga tawo—nga nagakahulogang tigsimbag diyosdiyos—nga may bisan unsang panulondon sa gingharian ni Kristo ug sa Diyos.” (Kini wala magpasabot nga ang bisan kinsa sa miaging panahon nga nagpakighilawas dili makapahimulos sa mga panalangin sa Gingharian sa Diyos, apan gikinahanglan niya nga mohunong na nianang pagkinabuhia aron makabaton sa pag-uyon sa Diyos. Tan-awang 1 Corinto 6:9-11.)

  Nagauyon ba ang Bibliya sa pagtipon ingong bana ug asawa nga dili legal nga pagkaminyo?

Tan-awang mga panid 108-110, ubos sa ulohang “Kaminyoon.”

Unsa ang ginaingon sa Bibliya bahin sa homoseksuwalidad?

Roma 1:24-27: “Ang Diyos, sumala sa mga pangibog sa ilang mga kasingkasing, nagtugyan kanila ngadto sa kahugawan, aron magpakaulaw sila sa ilang mga lawas sa taliwala kanila . . . Gitugyan sila sa Diyos ngadto sa seksuwal nga mga pangibog nga makauulaw, kay ang ilang kababayen-an nanag-usab sa kagamitan nga tiunay sa ilang pagkababaye ngadto sa kagamitan nga supak sa kinaiya; ug mao usab gani ang mga lalaki nanagbiya sa ilang kinaiyang paggamit sa mga babaye ug nangaut-ot diha sa ilang pangibog alang sa usag usa, mga lalaki sa mga masigkalalaki, nanagbuhat sa malaw-ay ug nanagpakaagom sa ilang kaugalingon sa bug-os nga balos, nga angay sa ilang pagkadaotan.”

1 Tim. 1:9-11: “Ang kasugoan gihimo, dili alang sa tawong matarong, kondili alang sa mga tawong malinapason, dili diyosnon ug mga makasasala, . . . mga makighilawason, sa mga lalaki nga nakigluon sa mga isigkalalaki, . . . ug bisan unsang butang nga supak sa maayong pagtulon-an sumala sa mahimayaong maayong balita sa malipayong Diyos.” (Itanding Levitico 20:13.)

Jud. 7: “Ang Sodoma ug Gomora ug silingang mga siyudad, human sila . . . nagpatuyang sa unod sa dili kinaiyang paggamit, gipahimutang sa atong atubangan ingong pasidaang panig-ingnan pinaagi sa paghiagom sa hudisyal nga silot sa walay kataposang kalayo.” (Ang ngalang Sodoma nahimong pasukaranan sa pulong “sodomiya,” nga sagad nagapaila sa homoseksuwal nga buhat. Itanding Genesis 19:4, 5, 24, 25.)

Unsa ang tinamdan sa matuod nga mga Kristohanon ngadto kanilang adunay kasaysayan sa homoseksuwalidad?

1 Cor. 6:9-11: “Ni ang mga makighilawason, ni ang tigsimbag mga diyosdiyos, ni mga mananapaw, ni mga bayot . . . ang makapanunod sa gingharian sa Diyos. Ug ngani ang uban kaninyo mga ingon niini kaniadto. Apan kamo gihinloan na, apan kamo gibalaan na, apan kamo gimatarong na diha sa ngalan sa atong Ginoong Jesu-Kristo ug uban sa espiritu sa atong Diyos.” (Nga walay pagsapayan sa maong kagikan, kon biyaan karon sa mga tawo ang ilang kanhing daotang mga buhat, igapadapat ang matarong nga mga sukdanan ni Jehova, ug maghupot ug pagtuo sa iyang tagana  alang sa kapasayloan sa mga sala pinaagi ni Kristo, sila makatagamtam ug mahinlong pagbarog atubangan sa Diyos. Human makarepormar, sila mahimong dawaton diha sa Kristohanong kongregasyon.)

Ang matuod nga mga Kristohanon nahibalo nga bisan ang migamot kaayo daotang mga pangibog, apil na kanang adunay genetiko o napanunod nga basihanan o nianang nagalangkit sa lawasnong mga hinungdan o kakulian sa palibot, dili man kay dili mabuntog alang sa mga tawo nga gusto gayong magpahimuot kang Jehova. Sa kinaiya ang ubang mga tawo emosyonal kaayo. Hayan sa miagi sila walay pugongpugong sa pagkasuko; apan ang kahibalo sa kabubut-on sa Diyos, ang tinguha sa pagpahimuot kaniya, ug ang tabang sa iyang espiritu magpaarang kanila sa pag-ugmad sa pugong-kaugalingon. Mahimong ang usa ka tawo nagiyan na sa alkohol, apan, uban sa hustong panukbil, siya makapugong gikan sa pag-inom ug sa ingon makalikay sa pagkahimong palahubog. Mao man usab, ang usa ka tawo basin bation ug hilabihang kaibog sa ubang tawo nga pareho ra ug sekso, apan sa pagtuman sa tambag sa Pulong sa Diyos siya makapabilin mang mahinlo gikan sa homoseksuwal nga mga buhat. (Tan-awang Efeso 4:17-24.) Si Jehova dili magtugot kanato sa paghunahunang mapadayonon nga wala gayoy bale o kalainan ang daotang kagawian; siya maluloton apan malig-ong nagapasidaan kanato sa mga sangpotanan ug nagataganag dagayang tabang alang niadtong buot sa “paghukas sa daang personalidad uban sa mga buhat niana, ug sa pagsul-ob [sa ilang kaugalingon] sa bag-ong personalidad.”—Col. 3:9, 10.

Ang panghunahuna ba sa Bibliya mahitungod sa sekso hayan kinaraan na ug mapugnganon nga wala kinahanglana?

1 Tes. 4:3-8: “Mao kini ang pagbuot sa Diyos . . . nga kamo maglikay sa pakighilawas . . . Busa, diay, ang tawo nga dili motagad nagasalikway, dili sa tawo, kondili sa Diyos, nga nagahatag sa iyang balaang espiritu kaninyo.” (Ang panghunahuna sa Bibliya bahin sa sekso dili kay basta gimugna kana sa pipila ka tawo nga nabuhi sa daghang katuigang miagi. Kini nagagikan sa Maglalalang sa tawo; kini nagapatin-aw kon unsa ang gikinahanglan aron makahupot sa iyang pag-uyon; kini nagatagana usab ug mga giya nga makaamot sa paglig-on sa mga pamilya ug sa makaayo, malipayong mga relasyon nga gawas na sa pamilya. Sila nga nagapadapat niining tambaga nagapanalipod sa ilang kaugalingon batok sa lalom emosyonal nga mga ulat ug dulumtanang mga sakit nga duyog sa imoral nga panggawi. Ang tambag sa Bibliya nunot man  kaayo sa panahon sa pagkab-ot sa mga kinahanglanon niadtong buot ug mahinlong tanlag atubangan sa Diyos ug sa kinabuhi nga nahigawas sa wala kinahanglanang kapakyasan.)

Kon Adunay Moingon—

‘Unsa ang imong tinamdan maylabot sa homoseksuwalidad?’

Mahimong tubagon mo: ‘Mao kini ang panghunahuna nga gibutyag dinhi sa Bibliya. Ako nagatuo nga ang ginaingon niini mas importante kay sa opinyon sa kang bisan kinsang tawo, sanglit kay kini nagahatag kanato sa mga hunahuna sa Maglalalang sa katawhan. (1 Cor. 6:9-11) Imong mamatikdan nga ang pipila kanila nga nahimong mga Kristohanon sa miagi nagbuhat ug homoseksuwalidad. Apan tungod sa ilang gugma sa Diyos, ug uban sa tabang sa iyang espiritu, sila nagbag-o.’

O ikaw makaingon: ‘Sa pagtubag niana, ikaingon ko nga akong namatikdan nga daghan kanilang nagabati nga dili gayod ilambigit ang bisan unsa mang lama o mantsa sa homoseksuwal nga pagkinabuhi wala magatuo nga ang Bibliya maoy Pulong sa Diyos. Makapangutana ko nimo kon unsa ang imong pagtamod sa Bibliya?’ Kon ang tawo nagaangkon gayod nga nagatuo sa Bibliya, hayan ikaw makadugang: ‘Dili bag-ong isyu ang homoseksuwalidad. Ang Bibliya nagahikyad sa dili mausab nga panghunahuna ni Jehova nga Diyos diha sa tin-aw kaayong pagkasulti. (Tingali gamiton ang materyal sa  panid 399.)’ Kon ang tawo nagaduhaduha bahin sa kalungtaran sa Diyos o sa Bibliya, ikaw makadugang man: ‘Kon walay Diyos ugaling, makataronganon nga dili kita manubag kaniya ug busa magkinabuhi kita sumala sa atong gusto. Busa ang tinuod nga pangutana mao, Aduna bay Diyos ug nautang ko ba kaniya ang akong paglungtad [usab, tingali, Ang Bibliya ba inspirado sa Diyos]? (Gamitang mga puntos gikan sa mga panid 141-147 o 74-84.)’