Tagna

Kahubitan: Usa ka dinasig nga mensahe; usa ka kapadayganan sa balaang kabubut-on ug katuyoan. Ang propesiya mahimong usa ka tagna bahin sa umaabot, inspirado moral nga pagtulon-an, o usa ka pahayag sa balaang sugo o paghukom.

Unsang mga tagna nga natala sa Bibliya nga natuman na?

Para sa pipila ka panig-ingnan, tan-awang lintunganayng mga ulohang “Bibliya,” “Kataposang mga Adlaw,” ug “Petsa,” usab ang basahong “All Scripture Is Inspired of God and Beneficial,” mga panid 343-346.

Unsa ang pipila sa talagsaong mga tagna sa Bibliya nga pagatumanon pa?

1 Tes. 5:3: “Sa diha nga sila mag-ingon: ‘Kalinaw ug kasegurohan!’ dayon sa hinanali moabot kanila ang kalit nga kalaglagan maingon sa pagbati sa kasakit diha sa babayeng talianak; ug sila dili gayod makaikyas.”

Pin. 17:16: “Ang napulo ka sungay nga imong nakita, ug ang mapintas nga mananap, kini sila magdumot sa babayeng bigaon [Babilonya nga Bantogan] ug siya laglagon ug huboan, ug pagakan-on ang iyang mga unod ug sa bug-os sunogon siya sa kalayo.”

Ezek. 38:14-19: “Kinahanglang moingon ka kang Gog, ‘Mao kini ang giingon sa Soberanong Ginoong Jehova: “Dili ba niadtong adlawa ikaw mahibalo niana sa dihang ang akong katawhan [espirituwal] nga Israel magapuyo sa kasegurohan? Ug ikaw gayod moabot gikan sa imong dapit, gikan sa kinatumyang mga bahin sa amihanan, ikaw ug daghang katawhan uban kanimo . . . ” “Ug mahitabo gayod niadtong adlawa, sa adlaw sa dihang si Gog mosulong batok sa yuta sa Israel,” nagaingon ang Soberanong Ginoong Jehova, “nga ang akong kasuko magautbo sa akong ilong. Ug diha sa akong pangabugho, sa kalayo sa akong kaaligutgot, ako kinahanglang mamulong.”’”

 Dan. 2:44: “Ang gingharian [tinukod sa Diyos] . . . magadugmok ug magaut-ot sa tanan niining [tawhanon] mga ginghariana, ug kana mismo ang magpabilin sa mga panahong walay katinoan.”

Ezek. 38:23: “Ako magapadako gayod sa akong kaugalingon ug magabalaan sa akong kaugalingon ug magapaila sa akong kaugalingon atubangan sa mga mata sa daghang kanasoran; ug sila makaila gayod nga ako mao si Jehova.”

Pin. 20:1-3: “Akong nakita ang usa ka manulonda nga nanaog gikan sa langit nga may dalang yawi sa bung-aw sa kahiladman ug usa ka dakong talikala diha sa iyang kamot. Ug iyang gidakop ang dragon, ang karaang serpente, kinsa mao ang Yawa ug Satanas, ug gigapos siya sa usa ka libo ka tuig. Ug iyang gitambog siya ngadto sa bung-aw sa kahiladman ug gisirhan ug gitimrihan kana ibabaw kaniya, aron dili na siya makapahisalaag sa kanasoran hangtod matapos ang usa ka libo ka tuig. Human niining mga butanga kinahanglan siyang buhian sa makadiyot.”

Juan 5:28, 29: “Ayawg kahibulong niini, kay ang takna moabot nga silang tanan nga anaa sa handomanang mga lubnganan makadungog sa iyang tingog ug manggula, silang nagbuhat ug maayong mga butang ngadto sa pagkabanhaw sa kinabuhi, silang nagbuhat ug daotang mga butang ngadto sa pagkabanhaw sa paghukom.”

Pin. 21:3, 4: “Nadungog ko ang usa ka dakong tingog gikan sa trono nga nag-ingon: ‘Tan-awa! Ang balongbalong sa Diyos uban sa katawhan, ug siya magapuyo ipon kanila, ug sila mahimong iyang mga katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni aduna pay pagbalata ni paghilak ni kasakit pa man. Ang unang mga butang nangagi na.’”

1 Cor. 15:24-28: “Unya, ang kataposan, sa dihang itugyan na niya ang gingharian ngadto sa iyang Diyos ug Amahan . . . Apan sa dihang ang tanang butang mahisakop na ilalom kaniya, nan ang Anak mismo magapasakop sa iyang kaugalingon ngadto Kaniya nga nagsakop sa tanang butang, aron ang Diyos mahimong tanang butang ngadto sa tanan.”

Ngano ang mga Kristohanon maidlot nga interesado gayod sa mga tagna sa Bibliya?

Mat. 24:42: “Busa pagtukaw kamo, kay wala kamo mahibalo unsang adlawa moabot ang inyong Ginoo.”

2 Ped. 1:19-21: “Labi pa gayod diay nga nahimatud-an ang matagnaong pulong [ingong resulta sa nahitabo didto sa pagkau-  sab sa panagway ni Jesus]; ug maayo ang inyong mahimo sa pagtagad niini . . . Tungod kay walay tagna sa bisan unsang panahon nga miabot pinaagig kabubut-on sa tawo, kondili ang mga tawo nanagpanulti gikan sa Diyos samtang sila giagak sa balaang espiritu.”

Prov. 4:18: “Ang alagianan sa mga matarong ingon sa banagbanag sa kahayag nga padayong nagakasanag hangtod sa pagkahingpit sa adlaw.”

Mat. 4:4: “Ang tawo kinahanglang mabuhi, dili sa tinapay lamang, kondili sa matag pulong nga magagula pinaagi sa baba ni Jehova.” (Kana nagalakip sa iyang dagkong matagnaong mga saad.)

2 Tim. 3:16: “Ang tibuok Kasulatan dinasig sa Diyos ug mapuslanon alang sa pagpanudlo, alang sa pagbadlong, alang sa pagpanul-id, alang sa pagmatuto sa pagkamatarong.” (Busa ang interong sinulat nga Pulong sa Diyos takos sa atong maikagong pagtuon.)

Kon Adunay Moingon—

‘Inyong gihatagan ug dako kaayong pasiugda ang tagna. Ang gikinahanglan lang gayod mao ang pagdawat kang Kristo ingong imong Manluluwas ug sa pagkinabuhig maayo Kristohanong kinabuhi’

Mahimong tubagon mo: ‘Ang pagpabili sa papel ni Jesu-Kristo tino nga hinungdanon. Apan nahibalo ka ba nga ang usa ka rason kon nganong ang mga Hudiyo sa unang siglo wala modawat kaniya mao nga sila wala maghatag ug igong pagtagad sa tagna?’ Dayon tingali modugang: (1) ‘Ang mga tagna sa Hebreohanong Kasulatan nagtagna kon kanus-a ang Mesiyas (Kristo) motungha ug kon unsa ang iyang buhaton. Pero ang mga Hudiyo sa kasagaran wala magpakabana sa gibutyag sa maong mga tagna. Dihay ilang kaugalingong mga ideya kon unsa gayod ang buhaton sa Mesiyas, ug ingong sangpotanan ilang gisalikway ang Anak sa Diyos. (Tan-awang panid 222, ubos sa “Jesu-Kristo.”)’ (2) ‘Kita karon nagapuyo sa panahon sa dihang si Kristo misugod na sa pagmando ingong langitnong Hari ug nagabahinbahin sa katawhan sa tanang kanasoran, uban sa panglantaw sa kinabuhi o sa kalaglagan. (Mat. 25:31-33, 46) Apan ang kadaghanan sa mga tawo nagapangita ug laing butang.’

O ikaw makaingon: ‘Uyon ako nga ang pagkahimong maayong Kristohanon importante. Apan mahimo ba akong maayong  Kristohanon kon gibuhat ko ang pipila sa mga butang nga gitudlo ni Jesus pero gisalikway ang iyang giingon nga kinahanglang unahon sa kinabuhi? . . . Matikdi ang iyang giingon sumala sa natala dinhi sa Mateo 6:33.’ Dayon tingali modugang: ‘Dili ba tinuod nga si Jesus nagtudlo kanato sa pag-ampo alang sa maong Gingharian, nga unahon gani kana kay sa atong pagpangayo ug kapasayloan tungod sa atong pagtuo kaniya ingong Manluluwas? (Mat. 6:9-12)’