‘Ang Takna sa Paghukom’ Miabot Na

ANG Pinadayag, ang kataposang basahon sa Bibliya, nagsulti kanato bahin sa usa ka manulonda nga naglupad sa kinatung-an sa langit nga dunay “walay kataposang maayong balita nga ipahayag ingong makapalipay nga balita.” Siya misulti sa makusog nga tingog: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.” (Pinadayag 14:​6, 7) Ang maong ‘takna sa paghukom’ naglakip sa pagpahayag ug pagpahamtang sa paghukom sa Diyos. Medyo mubo nga yugto sa panahon ang “takna.” Ang pagpahamtang sa paghukom moabot ingong kinatayuktokan sa “kataposang mga adlaw,” diin kita nagkinabuhi na karon.​—2 Timoteo 3:1.

‘Ang takna sa paghukom’ maoy maayong balita alang sa mga mahigugmaon sa pagkamatarong. Kini maoy panahon nga ang Diyos maghupay sa iyang mga alagad, nga nag-antos sa mga kamot niining mapintas, walay-gugma nga sistema sa mga butang.

Sa pagkakaron, sa dili pa matapos ‘ang takna sa paghukom’ pinaagi sa pagkalaglag niining presenteng daotan nga sistema sa mga butang, kita giawhag: “Kahadloki ninyo ang Diyos ug ihatag kaniya ang himaya.” Ikaw ba nagahimo niana? Kini naglangkit ug labaw pa kay sa pag-ingon, “Nagtuo ako sa Diyos.” (Mateo 7:21-23; Santiago 2:​19, 20) Kon kita dunay hustong kahadlok sa Diyos, kita angayng magpakitag lalom nga pagtahod kaniya. Kini angayng magpalihok kanato sa pagpalayo gikan sa daotan. (Proverbio 8:13) Kini angayng magtabang kanato sa paghigugma sa maayo ug sa pagdumot sa daotan. (Amos 5:​14, 15) Kon kita nagpasidungog sa Diyos, mamati kita kaniya nga may dakong pagtahod. Dili kita puliki kaayo sa ubang mga butang nga mapasagdan na nato ang makanunayong pagbasa sa iyang Pulong, ang Bibliya. Mosalig kita kaniya sa tanang panahon ug uban sa bug-os natong kasingkasing. (Salmo 62:8; Proverbio 3:​5, 6) Giila niadtong tinuod nga nagpasidungog kaniya nga ingong Maglalalang sa langit ug yuta, siya mao ang Soberano sa Uniberso, ug sila mahigugmaong nagpasakop kaniya ingong Soberano sa ilang kinabuhi. Kon kita makaamgo nga kinahanglan natong hatagan ug dugang pagtagad kining mga butanga, dili kita maglangan sa pagbuhat niini.

Ang panahon sa pagpahamtang sa paghukom nga gihisgotan sa manulonda nailhan usab ingong “ang adlaw ni Jehova.” Ang maong “adlaw” midangat sa karaang Jerusalem sa 607 W.K.P. tungod kay ang mga molupyo niini wala magpatalinghog sa mga pasidaan ni Jehova pinaagi sa iyang mga manalagna. Pinaagi sa pagpalangan sa adlaw ni Jehova diha sa ilang hunahuna, ilang gipameligro ug samot ang ilang kinabuhi. Si Jehova nagpasidaan kanila: “Kini haduol na, ug nagadali sa hilabihan.” (Sofonias 1:14) Ang laing “adlaw ni Jehova” midangat diha sa karaang Babilonya niadtong 539 W.K.P. (Isaias 13:​1, 6) Kay nagsalig sa ilang mga salipdanan ug sa ilang mga diyos, wala panumbalinga sa mga Babilonyanhon ang mga pasidaan nga gihatag sa mga manalagna ni Jehova. Apan sa usa ka gabii, ang gamhanang Babilonya gipukan sa mga Medianhon ug mga Persianhon.

Unsay giatubang nato karon? Ang lain ug mas lukop nga “adlaw ni Jehova.” (2 Pedro 3:11-14) Ang paghukom sa Diyos gipahayag na batok sa “Dakong Babilonya.” Sumala sa Pinadayag 14:​8, ang usa ka manulonda miingon: “Ang Dakong Babilonya napukan na.” Kana nahitabo na. Dili na niya mapugngan ang mga magsisimba ni Jehova. Ang iyang kahiwian ug pagkalangkit sa gubat kaylap na kaayong nayagyag. Karon ang iyang pangataposang kalaglagan haduol na. Tungod niana, ang Bibliya nag-awhag sa mga tawo sa tanang dapit: “Gumula kamo kaniya [Dakong Babilonya] . . . kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak. Kay ang iyang mga sala nagtipun-og sangko sa langit, ug nahinumdoman sa Diyos ang iyang dili matarong nga mga buhat.”​—Pinadayag 18:​4, 5.

Unsa ang Dakong Babilonya? Kini mao ang tibuok-kalibotang sistema sa relihiyon nga dunay mga kinaiya nga sama sa karaang Babilonya. (Pinadayag, mga kapitulo 17, 18) Tagda ang pipila ka panagsama:

 • Ang mga saserdote sa karaang Babilonya nalambigit pag-ayo sa politikanhong mga kalihokan sa nasod. Ingon niana usab ang kadaghanang relihiyon karon.

• Ang mga saserdote sa Babilonya kasagarang nagpasiugda sa gubat sa maong nasod. Ang modernong-adlaw nga relihiyon sagad maoy nanguna sa pagbendisyon sa mga sundalo sa dihang maggubatay ang mga nasod.

• Ang mga pagtulon-an ug mga binuhatan sa karaang Babilonya nagtultol sa nasod ngadto sa grabeng imoralidad. Kon dili mosunod ang mga lider sa relihiyon sa sukdanan sa Bibliya bahin sa moralidad, ang imoralidad modagsang diha sa mga klero ug ginsakpan. Mamatikdan usab nga tungod sa pagpamampam sa Dakong Babilonya uban sa kalibotan ug sa politikanhong mga sistema niini, ang Pinadayag naghulagway kaniya ingong bigaon.

• Ang Bibliya nag-ingon usab nga ang Dakong Babilonya nagkinabuhi diha sa “makauulaw nga kaluho.” Sa karaang Babilonya, ang organisasyon sa templo nanag-iyag dagkong mga yuta, ug ang mga saserdote nanguna sa mga kalihokan sa negosyo. Karong panahona, dugang pa sa mga dapit sa pagsimba, ang Dakong Babilonya nanag-iya ug daghan kaayong negosyo ug propiedad. Ang iyang mga pagtulon-an ug mga pista opisyal nakapadato kaniya ug sa uban diha sa kalibotan sa negosyo.

• Ang karaang Babilonya kasagarang naggamit ug mga imahen, salamangka, ug pagpamarang, nga sagad gigamit usab diha sa daghang dapit karon. Ang kamatayon giisip nga pagbalhin ngadto sa laing matang sa kinabuhi. Ang Babilonya napuno sa mga templo ug mga kapilya agig pasidungog sa mga diyos niini, apan ang mga magsisimba ni Jehova gisupak sa mga Babilonyanhon. Kini usab nga mga tinuohan ug mga buhat nagpaila sa Dakong Babilonya.

Sa karaang mga panahon, gimaniobra ni Jehova ang gamhanang mga nasod sa politika ug militar sa pagsilot niadtong nagpadayon sa pagsalikway kaniya ug sa iyang kabubut-on. Sa ingon ang Samaria gilaglag sa mga Asiryanhon sa 740 W.K.P. Ang Jerusalem gipayhag sa mga Babilonyanhon sa 607 W.K.P. ug sa mga Romano sa 70 K.P. Ang Babilonya, sa baylo, gipukan sa mga Medianhon ug mga Persianhon sa 539 W.K.P. Sa atong panahon, ang Bibliya nagtagna nga ang politikanhong mga kagamhanan, nga sama sa usa ka mapintas nga mananap, magaatake sa “bigaon” ug magahubo kaniya, nga magayagyag sa iyang tinuod nga pagkatawo. Sila magalaglag kaniya sa bug-os.​—Pinadayag 17:16.

Himoon ba gayod kana sa mga kagamhanan sa kalibotan? Ang Bibliya nag-ingon nga ‘ibutang kini sa Diyos diha sa ilang mga kasingkasing.’ (Pinadayag 17:17) Kini maoy kalit, makapakurat, makapakugang, dili madahom o dili inanay.

Unsay kinahanglan nimong buhaton? Pangutan-a ang imong kaugalingon: ‘Ako ba nakig-anib gihapon sa usa ka relihiyosong organisasyon nga namansahan sa mga pagtulon-an ug mga buhat nga nagpaila niining relihiyona ingong bahin sa Dakong Babilonya?’ Bisan ug dili ka membro, mahimong pangutan-on nimo ang imong kaugalingon: ‘Gitugotan ba nako ang espiritu niini sa pag-impluwensiya kanako?’ Unsang matanga sa espiritu? Espiritu sa pagkamatugoton sa malaw-ayng moral, paghigugma sa materyal nga mga kabtangan ug mga kalingawan inay paghigugma sa Diyos, o tinuyo nga dili-pagtagad (bisan sa daw ginagmayng mga butang) sa Pulong ni Jehova. Hunahunaa pag-ayo ang imong tubag.

Aron atong mabatonan ang pag-uyon ni Jehova, hinungdanon nga pamatud-an nato, sa atong mga lihok ug sa mga tinguha sa atong kasingkasing, nga dili gayod kita bahin sa Dakong Babilonya. Wala nay panahon sa paglanganlangan. Nagpasidaan kanato sa kalit nga pag-abot sa kataposan, ang Bibliya nag-ingon: “Sa ingon niini ka tulin nga pagtambog nga ang dakong siyudad sa Babilonya igatambog, ug siya dili na gayod igkita pa.”​—Pinadayag 18:21.

 Apan duna pay laing mahitabo. Ang laing bahin sa ‘takna sa paghukom’ mao ang paghukom ni Jehova nga Diyos sa politikanhong sistema sa tibuok kalibotan, sa mga magmamando niini, ug sa tanan nga wala manumbaling sa iyang pagkamay-katungod nga pagmando pinaagi sa iyang langitnong Gingharian diha sa mga kamot ni Jesu-Kristo. (Pinadayag 13:​1, 2; 19:19-21) Ang matagnaong panan-awon nga natala sa Daniel 2:20-45 naghulagway sa politikanhong pagmando sukad sa panahon sa karaang Babilonya hangtod sa presenteng panahon ingong usa ka higanteng larawan nga gama sa bulawan, plata, tumbaga, puthaw, ug yutang-kulonon. Maylabot sa atong adlaw, ang tagna nag-ingon: “Ang Diyos sa langit magatukod ug usa ka gingharian nga dili gayod malumpag.” Ug bahin sa himoon pa sa maong Gingharian panahon sa ‘takna sa paghukom’ ni Jehova, ang Bibliya nagpahayag: “Kini magadugmok ug magatapos niining tanang gingharian [nga hinimo sa tawo], ug kini mobarog hangtod sa panahong walay tino.”​—Daniel 2:44.

Ang Bibliya nagpasidaan sa matuod nga mga magsisimba batok sa paghigugma sa “mga butang nga anaa sa kalibotan”​—ang paagi sa pagkinabuhi nga gipasiugda niining kalibotana nga nahimulag sa matuod nga Diyos. (1 Juan 2:15-17) Ang imong mga desisyon ug mga lihok nagpakita ba nga ikaw bug-os nga dapig sa Gingharian sa Diyos? Giuna mo ba gayod kini diha sa imong kinabuhi?​—Mateo 6:33; Juan 17:​16, 17.

[Kahon sa panid 14]

Kanus-a Moabot ang Kataposan?

“Sa takna nga wala ninyo hunahunaa, ang Anak sa tawo moabot.”​—Mateo 24:44.

“Magpadayon sa pagbantay tungod kay wala kamo mahibalo sa adlaw ni sa takna.”​—Mateo 25:13.

“Kini dili maulahi.”​—Habacuc 2:3.

[Kahon sa panid 14]

May Kalainan ba Kon Nahibalo Ka?

Kon nahibalo ka nga dugaydugay pang moabot ang paghukom sa Diyos, makapausab kaha kana sa imong pagkinabuhi? Kon ang kataposan niining daang sistema wala moabot sa panahon nga imong gidahom, naghinayhinay ka ba sa pag-alagad kang Jehova tungod niini?​—Hebreohanon 10:36-38.

Tungod kay wala man kita mahibalo sa eksaktong panahon, mohatag kini kanato ug higayon sa pagpakita nga kita nag-alagad sa Diyos nga may putli nga motibo. Kadtong nakaila kang Jehova nahibalo nga ang dinalidali nga pagpasundayag ug kadasig dili makapahimuot sa Diyos, kinsa makabasa sa kasingkasing.​—Jeremias 17:10; Hebreohanon 4:13.

Sa mga tawong tinuod nga nahigugma kang Jehova, siya kanunay ang una sa ilang kinabuhi. Sama sa ubang mga tawo, ang matuod nga mga Kristohanon dunay sekular nga trabaho. Apan, dili nila tumong ang pagpadato kondili ang pagbaton ug igong materyal nga mga kinahanglanon ug gamayng sobra nga ikapaambit sa uban. (Efeso 4:28; 1 Timoteo 6:7-12) Maikag usab sila sa paglulinghayaw ug sa pagrelaks, apan ang tuyo nila maoy pagpalagsik, dili kay pagsundog lang sa ginahimo sa uban. (Marcos 6:31; Roma 12:2) Sama ni Jesu-Kristo, malipay sila sa paghimo sa kabubut-on sa Diyos.​—Salmo 37:4; 40:8.

Ang matuod nga mga Kristohanon gustong mabuhi ug mag-alagad kang Jehova hangtod sa hangtod. Kini nga paglaom bililhon gihapon bisag dugaydugay pa silang maghulat sa mga panalangin.

 [Kahon/Hulagway sa panid 15]

Ang Isyu Bahin sa Pagkasoberano

Aron masabtan kon nganong gitugotan sa Diyos ang daghang pag-antos, kinahanglang atong masabtan ang isyu bahin sa pagkasoberano. Unsa ang pagkasoberano? Kini mao ang pagbaton ug labing hataas nga awtoridad.

Tungod kay si Jehova mao ang Maglalalang, may katungod siya sa pagmando sa yuta ug sa tanang nagpuyo niini. Apan, gisaysay sa Bibliya nga sa unang bahin sa kasaysayan sa tawo, ang pagkasoberano ni Jehova gihagit. Si Satanas nga Yawa miingon nga estrikto ra kaayo si Jehova, nga Siya namakak sa atong unang mga ginikanan sa kon unsay mahitabo kon ilang supakon ang balaod sa Diyos ug magkinaugalingon, ug nga mas maayo ang ilang kahimtang kon silay magbuot sa ilang kaugalingon nga dili magdepende sa Diyos.​—Genesis, mga kapitulo 2, 3.

Kon gilaglag dayon sa Diyos ang mga rebelde, mapasundayag unta niini ang iyang gahom, apan dili masulbad niini ang mga isyu nga gipatungha. Imbes laglagon dihadiha ang mga rebelde, gitugotan ni Jehova nga makita sa tanang intelihenteng mga linalang ang sangpotanan sa pagrebelde. Bisan pag naglangkit kini ug pag-antos, naghatag usab kini ug higayon kanato nga matawo.

Dugang pa, sa dakong pagsakripisyo sa kaugalingon, si Jehova mahigugmaong naghimog mga kahikayan aron ang mga tawo nga magmasinugtanon kaniya ug magpasundayag ug pagtuo sa halad lukat sa iyang Anak mapahigawas gikan sa sala ug sa mga sangpotanan niini ug magpuyo sa Paraiso. Kon gikinahanglan, himoon kini pinaagi sa pagkabanhaw gikan sa mga patay.

Ang paglugway ug panahon sa paghusay sa isyu naghatag usab ug higayon sa mga alagad sa Diyos sa pagpasundayag nga sila may katakos sa pagsanong sa gugma sa Diyos ug sa pagpamatuod sa ilang integridad kang Jehova ilalom sa tanang kahimtang. Hinungdanon nga mahusay ang isyu sa pagkasoberano sa Diyos, hasta ang nalangkit nga isyu sa integridad sa tawo, aron mapaneguro nga mapatunhay ang pagtahod sa balaod dinhi sa uniberso. Kon wala kining maong pagtahod sa balaod, imposible gayod nga maangkon ang tinuod nga pakigdait. a

[Footnote]

[Hulagway]

Ang tibuok-kalibotang sistema sa politikanhong pagmando matapos