“Aron Dili Kamo Mahiagom sa Tentasyon”

“Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon.”​—MATEO 26:41.

 GRABE ang kapit-os​—wala pa siya makasinati ug sama niini sukad. Talitapos na ang yutan-ong kinabuhi ni Jesu-Kristo, ang Anak sa Diyos. Si Jesus nahibalo nga sa dili madugay siya dakpon, hukman ug kamatayon, ug ilansang sa estaka sa pagsakit. Siya nahibalo nga ang iyang matag desisyon ug lihok mag-apektar sa ngalan sa iyang Amahan. Si Jesus nahibalo usab nga ang palaaboton sa katawhan nasandig sa iyang himoon. Kay nag-atubang niining tanan nga kapit-os, unsay iyang gihimo?

² Si Jesus miadto sa tanaman sa Getsemane uban sa iyang mga tinun-an. Kini ang paboritong lugar ni Jesus. Didto siya nagpalayo ug gamay gikan sa iyang mga tinun-an. Sa dihang nag-inusara, siya nangayo sa iyang langitnong Amahan ug kusog, nga nagbubo sa iyang kasingkasing diha sa hugot nga pag-ampo​—dili lang kausa kondili tulo ka beses. Bisan ug hingpit, si Jesus wala maghunahuna nga masagubang niya ang kapit-os sa iyang kaugalingon lamang.​—Mateo 26:36-44.

³ Karon, kita usab nailalom sa pagpit-os. Sa unang bahin niini nga brosyur, atong gitagad ang pamatuod nga kita nagkinabuhi na sa kataposang mga adlaw niining daotang sistema. Ang mga tentasyon ug mga pagpit-os sa kalibotan ni Satanas nagkagrabe. Ang mga desisyon ug mga lihok ni bisan kinsa nga nangangkon nga nag-alagad sa matuod nga Diyos may epekto sa iyang ngalan ug dunay dako kaayong epekto sa atong tagsatagsang paglaom sa kinabuhi diha sa iyang bag-ong kalibotan. Gihigugma nato si Jehova. Buot nato nga ‘molahutay hangtod sa kataposan’​—sa kataposan sa atong kinabuhi o sa kataposan niining sistemaha, kon unsa man ugaling ang mauna. (Mateo 24:13) Apan, kay dinalian man ang panahon, sa unsang paagi kita makapabiling alisto ug makapadayon sa pagbantay?

⁴ Kay nahibalo nga ang iyang mga tinun-an​—kaniadto ug karon—​mailalom usab sa pagpit-os, si Jesus nag-awhag: “Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon.” (Mateo 26:41) Unsay kahulogan nianang mga pulonga alang kanato karon? Unsang tentasyon ang imong ginaatubang? Ug sa unsang paagi ka ‘makapadayon sa pagbantay’?

Tentasyon sa Pagbuhat ug Unsa?

⁵ Kitang tanan nag-atubang sa adlaw-adlaw ug tentasyon nga madala sa “lit-ag sa Yawa.” (2 Timoteo 2:26) Ang Bibliya nagpasidaan kanato nga si Satanas nagpuntirya ilabina sa mga magsisimba ni Jehova. (1 Pedro 5:8; Pinadayag 12:​12, 17) Sa unsang katuyoan? Dili aron patyon kita. Dili kadaogan kang Satanas kon mamatay kita nga matinumanon sa Diyos. Nahibalo si Satanas nga sa gitakda nga panahon ni Jehova, wagtangon Niya ang kamatayon pinaagi sa pagkabanhaw.​—Lucas 20:​37, 38.

⁶ Gustong daoton ni Satanas ang butang nga mas bililhon pa kay sa atong kinabuhi karon​—ang atong integridad sa Diyos. Gusto gayod nga pamatud-an ni Satanas nga mapatalikod niya kita gikan kang Jehova. Busa, kon kita mahaylo sa pagkahimong dili-matinumanon​—sa paghunong sa pagsangyaw sa maayong balita o sa pagsalikway sa Kristohanong mga sukdanan​—kadaogan kana alang kang Satanas! (Efeso 6:11-13) Busa  “ang Maninental” nagbutang ug mga tentasyon sa atong atubangan.​—Mateo 4:3.

⁷ Lainlain ang “malimbongong mga taktika” ni Satanas. (Efeso 6:​11, Jewish New Testament) Tingali tentalon niya kita pinaagig materyalismo, kahadlok, pagduhaduha, o pagpangitag kalipayan. Apan ang usa sa iyang labing epektibo nga mga paagi naglangkit sa pagkaluya sa buot. Ingong malipoton nga oportunista, nahibalo siya nga moluya ang atong buot kon kita mawad-an ug paglaom, nga tungod niana kita dali nga matental. (Proverbio 24:10) Busa ilabina kon kita “nahugno” sa emosyon, siya motental kanato sa pag-undang sa pag-alagad.​—Salmo 38:8.

⁸ Samtang nagkaduol na kita sa sangkoanan sa kataposang mga adlaw, morag nagkadaghan ang hinungdan sa pagkaluya sa buot, ug apektado kita niini. (Tan-awa ang kahong “Pipila ka Hinungdan sa Pagkaluya sa Buot.”) Bisag unsa pay hinungdan, ang pagkaluya sa buot makapawala sa atong kusog. Ang ‘pagpalit sa nahiangay nga panahon’ alang sa espirituwal nga mga obligasyon​—lakip ang pagtuon sa Bibliya, pagtambong sa Kristohanong mga tigom, ug pagpakigbahin sa ministeryo​—malisod gayod kon ikaw gikapoy na sa pisikal, mental, ug emosyonal. (Efeso 5:​15, 16) Hinumdomi nga gusto sa Maninental nga mohunong ka. Apan dili kini panahon sa paghinayhinay o sa pagbati nga dili gayod dinalian ang panahon karon! (Lucas 21:34-36) Sa unsang paagi makasukol ka sa tentasyon ug makapadayon sa pagbantay? Tagda ang upat ka sugyot nga makatabang.

“Mag-ampo nga Mapinadayonon”

⁹ Salig kang Jehova pinaagi sa pag-ampo. Hinumdomi ang panig-ingnan ni Jesus sa tanaman sa Getsemane. Sa dihang gibati ang grabeng kapit-os sa emosyon, unsay iyang gihimo? Siya nangayo ug tabang kang Jehova, nga kinasingkasing nga nag-ampo mao nga ang “iyang singot nahimong sama sa mga tinulo sa dugo nga nangatagak sa yuta.” (Lucas 22:44) Hunahunaa kini. Si Jesus nakaila pag-ayo kang Satanas. Nakita ni Jesus gikan sa langit ang tanang tentasyon nga gigamit ni Satanas sa iyang pagpaningkamot sa paglit-ag sa mga alagad sa Diyos. Bisan pa niana, si Jesus wala mobati nga dali ra niyang masagubang ang bisan unsang tentasyon nga ibutang tingali sa Maninental sa iyang atubangan. Kon ang hingpit nga Anak sa Diyos mibati nga kinahanglan nga mag-ampo alang sa tabang ug kusog sa Diyos, labaw na ta!​—1 Pedro 2:21.

¹⁰ Hinumdomi usab nga human sa pag-awhag sa iyang mga tinun-an sa ‘pag-ampo nga mapinadayonon,’ si Jesus miingon: “Hinuon, maikagon ang espiritu, apan maluya ang unod.” (Mateo 26:41) Kang kinsang lawas ang gipasabot ni Jesus? Siyempre dili ang iyaha; walay kaluyahon ang iyang hingpit nga tawhanong lawas. (1 Pedro 2:22) Apan lahi ang kahimtang sa iyang mga tinun-an. Tungod sa napanunod nga pagkadili-hingpit ug makasasala nga mga hilig, sila nagkinahanglan gayod ug tabang aron makasukol sa  tentasyon. (Roma 7:21-24) Mao kana kon nganong iyang giawhag sila​—ug ang tanang tinuod nga mga Kristohanon sa ulahi​—sa pag-ampo sa pagpangayog tabang aron makasagubang sa mga tentasyon. (Mateo 6:13) Si Jehova motubag sa maong mga pag-ampo. (Salmo 65:2) Sa unsang paagi? Sa labing menos duha ka paagi.

¹¹ Una, ang Diyos motabang kanato sa pag-ila sa mga tentasyon. Ang mga tentasyon ni Satanas nahisamag mga lit-ag nga gisabwag diha sa ngitngit nga dalan. Kon dili nimo kini makita, basin mabitik ka niini. Pinaagi sa Bibliya ug sa binase-sa-Bibliya nga mga publikasyon, giyagyag ni Jehova ang mga lit-ag ni Satanas, aron dili kita matental. Sulod sa daghang tuig, ang pinatik nga literatura ug mga programa sa kombensiyon ug asembliya balikbalik nga nagpasidaan kanato sa mga kapeligrohan sama sa kahadlok sa tawo, seksuwal nga imoralidad, materyalismo, ug ubang mga tentasyon ni Satanas. (Proverbio 29:25; 1 Corinto 10:8-11; 1 Timoteo 6:​9, 10) Dili ba angay kang magpasalamat kang Jehova tungod kay gipasidan-an niya kita batok sa mga laraw ni Satanas? (2 Corinto 2:11) Kining tanang pasidaan maoy usa ka tubag sa imong mga pag-ampo nga tabangan ka sa pagsukol sa tentasyon.

¹² Ikaduha, si Jehova motubag sa atong mga pag-ampo pinaagi sa paghatag kanatog kusog aron dili madaog sa tentasyon. Ang iyang Pulong nag-ingon: ‘Ang Diyos dili motugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.’ (1 Corinto 10:13) Dili gayod itugot sa Diyos nga mahimong lisod kaayo ang usa ka tentasyon nga mawad-an na kitag espirituwal nga kusog sa pagsukol​—kon kita magpadayon sa pagsalig kaniya. Sa unsang paagi siya “magtaganag kalingkawasan” alang kanato? Siya “mohatag ug balaang espiritu niadtong nagapangayo kaniya.” (Lucas 11:13) Ang maong espiritu motabang kanato sa paghinumdom sa mga prinsipyo sa Bibliya nga makapalig-on sa atong determinasyon sa paghimog matarong ug motabang kanato sa paghimog maalamong mga desisyon. (Juan 14:26; Santiago 1:​5, 6) Makatabang kini kanato sa pagpasundayag sa mga kinaiya nga gikinahanglan gayod nato aron mabuntog ang sayop nga mga hilig. (Galacia 5:​22, 23) Ang espiritu sa Diyos magpalihok pa gani sa mga isigkamagtutuo aron ‘mahimong makapalig-on nga tabang kanato.’ (Colosas 4:11) Dili ba angay kang magpasalamat nga si Jehova motubag sa mahigugmaong mga paagi sa imong mga pag-ampo sa pagpangayog tabang?

Magmarealistiko sa Imong mga Pagdahom

¹³ Aron makapadayon sa pagbantay, kinahanglang magmarealistiko kita sa atong mga pagdahom. Tungod sa mga kapit-os sa kinabuhi, kitang tanan maluya usahay. Apan angay natong hinumdoman nga ang Diyos wala magsaad nga ang atong kinabuhi niining daang sistema walay problema. Bisan sa kapanahonan sa Bibliya, ang mga alagad sa Diyos nag-atubang ug mga kalisdanan, lakip na ang paglutos, kakabos, depresyon, ug sakit.​—Buhat 8:1; 2 Corinto 8:​1, 2; 1 Tesalonica 5:14; 1 Timoteo 5:23.

¹⁴ Karon, kita usab dunay mga problema. Tingali makaatubang kita ug mga paglutos, makasinatig problema sa panalapi, makigbisog sa depresyon, magsakit, ug mag-antos sa ubang mga paagi. Kon kita panalipdan ni Jehova sa milagrosong paagi batok sa tanang kadaot, dili ba maghatag kana ug basehanan kang Satanas sa pagtamay kang Jehova? (Proverbio 27:11) Gitugotan ni Jehova nga ang iyang mga alagad pagatentalon ug pagasulayan, usahay bisan hangtod sa punto nga mamatay nga wala sa panahon diha sa mga kamot sa mga magsusupak.​—Juan 16:2.

¹⁵ Nan, unsa man ang gisaad ni Jehova? Sama sa nahisgotan na, siya nagsaad nga siya motabang kanato nga makasukol sa bisan unsang tentasyon nga atong maatubang, basta mosalig kita kaniya sa bug-os. (Proverbio 3:​5, 6) Pinaagi sa iyang Pulong, sa iyang espiritu, ug sa iyang organisasyon, siya mopanalipod kanato sa espirituwal nga paagi, nga motabang kanato sa pag-amping sa atong relasyon uban kaniya. Kay nahuptang lig-on kini nga relasyon, bisag kita mamatay, kita madaogon. Walay bisan unsa​—bisag kamatayon​ —ang makapugong sa Diyos sa paghatag ug ganti sa iyang matinumanong mga alagad. (Hebreohanon 11:6) Ug sa bag-ong kalibotan nga karon haduol na, si Jehova magatuman gayod sa tanan pang nabilin nga matahom nga mga panalangin nga iyang gisaad alang niadtong nahigugma kaniya.​—Salmo 145:16.

Hinumdomi ang mga Isyu

¹⁶ Aron makalahutay hangtod sa kataposan, kinahanglang atong hinumdoman ang hinungdanong mga isyu nga nalangkit sa pagtugot sa Diyos sa pagkadaotan. Kon ang atong mga problema usahay morag lisod kaayo ug matental kita sa paghunong, angay natong pahinumdoman ang atong kaugalingon nga gihagit ni Satanas ang pagkamatarong sa pagkasoberano ni Jehova. Giduhaduhaan usab sa Maglilimbong ang debosyon ug integridad sa mga magsisimba sa Diyos. (Job 1:8-11; 2:​3, 4) Kini nga mga isyu ug ang paagi nga napili ni Jehova sa pagsulbad niini mas hinungdanon kay sa atong kinabuhi mismo. Sa unsang paagi?

¹⁷ Ang temporaryo nga pagtugot sa Diyos sa kalisdanan naghatag ug panahon sa uban sa pagdawat sa kamatuoran. Hunahunaa kini: si Jesus nag-antos aron kita makabaton ug kinabuhi. (Juan 3:16) Dili ba kita mapasalamaton niana? Apan andam ba kitang moantos ug kalisdanan sa gamayng panahon aron may uban pa nga makabaton ug kinabuhi? Aron makalahutay hangtod sa kataposan, kinahanglang ilhon nato nga ang kaalam ni Jehova mas labaw gayod kay sa atong kaalam. (Isaias 55:9) Iyang taposon ang pagkadaotan sa labing maayong panahon sa paghusay sa mga isyu sa dayon ug alang sa atong dumalayong kaayohan. Sa pagkatinuod, aduna pa bay mas maayong paagi sa paghusay niining maong mga isyu? Walay inhustisya sa Diyos!​—Roma 9:14-24.

“Duol sa Diyos”

¹⁸ Aron makapabilin kita nga alisto kay dinalian man ang panahon, kinahanglang magpabilin kita nga suod kang Jehova. Ayaw gayod kalimti nga ginahimo ni Satanas ang tanan niyang maarangan sa pagdaot sa atong maayong relasyon kang Jehova. Gusto kita nga patuohon ni Satanas nga ang kataposan dili na gayod moabot ug nga walay pulos ang pagsangyaw sa maayong balita o ang pagsunod sa mga sukdanan sa Bibliya. Apan siya “bakakon ug ang amahan sa bakak.” (Juan 8:44) Kinahanglang magmadeterminado kita sa ‘pagsukol sa Yawa.’ Dili gayod nato angayng ibalewala ang atong relasyon kang Jehova. Ang Bibliya mahigugmaong nag-awhag kanato: “Duol sa Diyos, ug siya moduol kaninyo.” (Santiago 4:​7, 8) Sa unsang paagi ka mas masuod kang Jehova?

¹⁹ Hinungdanon ang mainampoong pagpamalandong. Kon daw dili na maagwanta ang mga kalisod sa kinabuhi, ibubo ang imong kasingkasing ngadto kang Jehova. Kon mas espesipiko ka, mas dali mo nga makita ang iyang tubag sa imong mga hangyo. Ang tubag dili tingali kanunayng sama sa imong gihunahuna, apan kon ang imong tuyo mao ang pagpasidungog kaniya ug paghupot sa integridad, ihatag niya kanimo ang tabang aron makalahutay ka. (1 Juan 5:14) Samtang imong makita ang iyang paggiya sa imong kinabuhi, ikaw mas masuod kaniya. Ang pagbasa ug pagpamalandong bahin sa mga hiyas ug mga dalan ni Jehova, sumala sa gipadayag sa Bibliya, hinungdanon usab. Kini nga pagpamalandong motabang kanimo nga mas makaila pa kaniya; kini magtandog sa imong kasingkasing ug magpalalom sa imong gugma kaniya. (Salmo 19:14) Ug kini nga gugma, labaw sa tanan, magtabang kanimo sa pagsukol sa tentasyon ug sa pagpadayon sa pagbantay.​—1 Juan 5:3.

²⁰ Aron makapabiling suod kang Jehova, hinungdanon usab nga kita magpabiling suod sa atong mga isigkamagtutuo. Hisgotan kini diha sa kataposang bahin niini nga brosyur.

MGA PANGUTANA SA PAGTUON

• Unsay gihimo ni Jesus sa dihang nailalom sa grabeng kapit-os sa nagkaduol na ang iyang kamatayon, ug unsay iyang giawhag sa iyang mga tinun-an nga ilang himoon? (Parapo 1-4)

• Nganong gipuntirya ni Satanas ang mga magsisimba ni Jehova, ug unsay iyang mga paagi sa pagtental kanato? (Parapo 5-8)

• Aron makasukol sa tentasyon, nganong kinahanglan nga magpadayon kita sa pag-ampo (Parapo 9-12), magmarealistiko sa atong mga pagdahom (Parapo 13-15), hinumdoman ang mga isyu (Parapo 16-17), ug ‘moduol sa Diyos’ (Parapo 18-20)?

[Kahon sa panid 25]

Pipila ka Hinungdan sa Pagkaluya sa Buot

Panglawas/edad. Kon kita may sakit o kaha ang atong paglihok limitado tungod kay nagkatigulang na, basin maguol kita kay diyutay na lang ang atong mahimo sa pag-alagad sa Diyos.​—Hebreohanon 6:10.

Kahigawad. Basin maguol kita kon wala kaayoy bunga ang atong mga paningkamot sa pagsangyaw sa Pulong sa Diyos.​—Proverbio 13:12.

Pagbati nga walay pulos. Tungod kay gimaltrato sa daghang tuig, basin magtuo ang usa ka tawo nga siya wala higugmaa, bisan ni Jehova.​—1 Juan 3:​19, 20.

Pagkasilo. Kon ang usa ka tawo nasilo tungod sa nahimo sa isigkamagtutuo, basin mahiubos siya pag-ayo busa matental siya sa paghunong sa pagtambong sa Kristohanong mga tigom o sa pagpakigbahin sa pag-alagad sa kanataran.​—Lucas 17:1.

Paglutos. Ang uban nga dili sama nimo ug tinuohan basin mosupak, molutos, o mobiaybiay kanimo.​—2 Timoteo 3:12; 2 Pedro 3:​3, 4.

[Hulagway sa panid 26]

Si Jesus nag-awhag kanato nga “mag-ampo nga mapinadayonon” aron matabangan kita sa pagbuntog sa tentasyon