Asa Nagpadulong ang Imong Kinabuhi?

• Daghang tawo ang nalinga kaayo sa mga kalihokan sa adlaw-adlawng kinabuhi busa wala na sila maghunahuna kon asa sila nagpadulong.

• Ang Bibliya nagsulti kanato bahin sa kahibulongang mga hitabo sa unahan. Nagpasidaan usab kini sa nagsingabot nga dakong kausaban nga mahitabo sa tawhanong mga institusyon sa tibuok kalibotan. Aron kita makabaton ug kaayohan ug makalikay sa kalamidad, kita kinahanglang molihok dayon.

• Dunay mga tawo nga nahibalo kon unsay giingon sa Bibliya ug naningkamot sa pagpadapat niini apan nalinga tungod sa mga kabalaka sa kinabuhi.

• Malipayon ka ba sa direksiyon karon sa imong kinabuhi? Sa dihang magplano ka ug mga kalihokan, naghunahuna ka ba kon sa unsang paagi kini makaapektar sa imong malungtarong mga tumong sa kinabuhi?

[Kahon/Mga hulagway sa panid 9]

Unsay Labing Hinungdanon Kanimo?

Unsay bili alang kanimo sa mosunod? Numerohi kini.

Daghan niini dunay hustong dapit sa kinabuhi, apan kon papilion ka, unsay una? ikaduha? ug uban pa.

․․․ Kalingawan/lulinghayaw

․․․ Akong trabaho o karera

․․․ Akong panglawas

․․․ Akong kalipay

․․․ Akong kapikas

․․․ Akong mga ginikanan

․․․ Akong mga anak

․․․ Nindot nga balay, matahom nga mga besti

․․․ Pagkahimong labing maayo sa bisan unsa nga akong buhaton

․․․ Pagsimba sa Diyos

 [Kahon sa panid 10, 11]

Ang Imo Bang Gipili Nag-agak Kanimo Ngadto sa Gusto Nimong Padulngan?

TAGDA KINING MGA PANGUTANAHA

KALINGAWAN/LULINGHAYAW: Ang ako bang gipili nga kalingawan nagpalagsik kanako? Naglakip ba kini ug mga paukyab nga makapameligro sa akong panglawas o makapainutil pa gani kanako sa tibuok nakong kinabuhi? Kini ba usa ka matang sa “paglipaylipay” nga makapaukyab sa pipila lang ka oras apan magdulot ug dumalayon nga kaguol? Bisan ug maayo nga kalingawan ang akong gipili, ako ba naggugol ug daghan kaayong panahon niini busa wala na akoy panahon sa mas hinungdanong mga butang?

AKONG TRABAHO O KARERA: Kini ba nagsilbi aron makasustento nako, o naulipon gayod ako niini? Kini ba makahurot ug dakong panahon ug kusog nga nagpameligro sa akong panglawas? Mas gusto ba akong mag-obertaym sa trabaho o mas gusto nga makig-uban sa akong kapikas ug mga anak? Kon hatagan ako sa akong amo ug trabaho nga makahasol sa akong tanlag o makasapaw kanunay sa espirituwal nga mga intereses, buhaton ko ba kini aron dili ko papahawaon sa trabaho?

AKONG PANGLAWAS: Kini ba akong gipasagdan, o kanunay nako kining giampingan? Kanunay ba nako kining hisgotan? Ang paagi nako sa pag-atiman niini nagpakita ba ug kabalaka alang sa akong pamilya?

AKONG KALIPAY: Kini ba ang akong gihatagan ug pangunang pagtagad? Giuna ko ba kini kay sa kalipay sa akong kapikas o sa akong pamilya? Ang paagi ba sa akong pagkab-ot niini mohaom sa akong pagkamagsisimba sa matuod nga Diyos?

AKONG KAPIKAS: Giisip ko ba ang akong kapikas ingong akong kauban sumala ra sa akong gusto? Nagpasidungog ba ako sa akong kapikas, ingong usa nga takos hatagan ug dignidad? Ang pagtuo ba sa Diyos nag-impluwensiya sa akong panglantaw sa akong kapikas?

AKONG MGA GINIKANAN: Kon menor de edad, masinugtanon ba ako sa akong mga ginikanan​—motubag nga matinahoron, mohimo sa gihatag nga mga trabaho, mopauli sa oras nga ilang gitakda, molikay sa mga kauban ug mga kalihokan nga ilang gipasidaan nga likayan? Kon hamtong, matinahoron ba akong mamati sa akong mga ginikanan, nga motabang kanila kon gikinahanglan kini? Ang ako bang paagi sa pagpakiglabot kanila nag-agad sa kon unsay kombenyente kanako o kon unsay tambag sa Pulong sa Diyos?

AKONG MGA ANAK: Mibati ba ako nga akong katungdanan ang pagtudlo ug moral nga mga prinsipyo sa akong mga anak, o naglaom nga ang mga tunghaan mao na lay mohimo niana? Mogahin ba ako ug panahon uban sa akong mga anak, o nagtuo nga malingaw ra sila sa mga dulaan, TV, o kompiyuter? Ginadisiplina ba nako ang akong mga anak matag higayon nga supakon nila ang mga pahinumdom sa Diyos, o buhaton ko lang kana kon maglagot ko?

NINDOT NGA BALAY, MATAHOM NGA MGA BESTI: Unsay rason sa akong paghatag ug pagtagad sa akong hitsura ug mga kabtangan​—ang hunahunaon ba sa akong mga silingan? ang kaayohan ba sa akong pamilya? tungod ba kay magsisimba ako sa Diyos?

PAGKAHIMONG LABING MAAYO SA BISAN UNSA NGA AKONG BUHATON: Mibati ba ako nga hinungdanon ang pagbuhat sa mga butang sa maayong paagi? Naningkamot ba ako nga mahimong labing maayo? Matugaw ba ako kon ang ubang tawo mas maayong mobuhat sa usa ka butang kay kanako?

PAGSIMBA SA DIYOS: Mas hinungdanon ba kanako ang pagbaton sa pag-uyon sa Diyos kay sa pag-uyon sa akong kapikas, mga anak, mga ginikanan, o sa akong amo? Aron mamentinar ang usa ka haruhay nga estilo sa kinabuhi, mosugot ba ako nga himoong segundaryo na lang ang pag-alagad sa Diyos?

 TAGDA PAG-AYO ANG TAMBAG SA BIBLIYA

Unsa ka hinungdanon sa imong kinabuhi ang pagsimba sa Diyos?

Ecclesiastes 12:13: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”

PANGUTAN-A ANG IMONG KAUGALINGON: Ang akong kinabuhi nagpakita ba nga ingon niana ang akong panglantaw? Ang paagi ba nako sa pag-atiman sa mga responsibilidad sa balay, trabahoan, o sa tunghaan gitukmod sa pagkamasinugtanon sa mga sugo sa Diyos? O dili kaha ang ubang mga intereses o ang mga pagpit-os sa kinabuhi naglimite sa akong paggahin ug panahon alang sa Diyos?

Unsa ka suod ang imong relasyon sa Diyos?

Proverbio 3:​5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”

Mateo 4:10: “Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.”

PANGUTAN-A ANG IMONG KAUGALINGON: Ingon ba niana ang akong pagbati bahin sa Diyos? Ang akong adlaw-adlaw nga mga kalihokan, maingon man ang akong pagsagubang sa malisod nga mga kahimtang, nagpasundayag ba sa maong pagsalig ug debosyon?

Unsa ka hinungdanon kanimo ang pagbasa ug pagtuon sa Bibliya?

Juan 17:3: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”

PANGUTAN-A ANG IMONG KAUGALINGON: Ang importansiya nga akong gihatag sa pagbasa sa Pulong sa Diyos ug sa pagpamalandong niana nagpakita ba nga nagtuo gayod ako nianang mga pulonga?

Unsa ka hinungdanon kanimo ang pagtambong sa mga tigom sa Kristohanong kongregasyon?

Hebreohanon 10:​24, 25: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, . . . ug ilabina gayod samtang makita ninyo nga ang adlaw nagkaduol na.”

Salmo 122:1: “Nagmaya ako sa pag-ingon nila kanako: ‘Mangadto kita sa balay ni Jehova.’”

PANGUTAN-A ANG IMONG KAUGALINGON: Ang akong paagi sa pagkinabuhi nagpakita ba ug apresasyon alang niini nga pagtultol nga makita diha sa Pulong sa Diyos? Sa miaging bulan, duna bay Kristohanong tigom nga wala nako matambongi tungod kay akong giuna ang ubang mga butang?

Ikaw ba masibotong nakigbahin sa pagsulti ngadto sa uban bahin sa Diyos ug sa iyang katuyoan?

Mateo 24:14: “Kining maayong balita sa gingharian igawali sa tibuok gipuy-ang yuta ingon nga pagpamatuod . . . , ug unya moabot ang kataposan.”

Mateo 28:​19, 20: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”

Salmo 96:2: “Pag-awit kamo kang Jehova, dayega ang iyang ngalan. Sa matag adlaw imantala ang maayong balita sa iyang pagluwas.”

PANGUTAN-A ANG IMONG KAUGALINGON: Gihatagan ba nako ug dakong importansiya kining buluhatona diha sa akong kinabuhi? Ang akong pagpakigbahin niini nagpabanaag ba sa akong pagtuo sa kaseryoso sa mga panahon nga atong gikinabuhian?