“Labaw sa Tanang Butang, Batoni ang Mainit nga Gugma”

“Ang kataposan sa tanang butang haduol na. . . . Labaw sa tanang butang, batoni ang mainit nga gugma alang sa usag usa.”​—1 PEDRO 4:​7, 8.

 NASAYOD si Jesus nga bililhon ang iyang kataposang pipila ka oras uban sa iyang mga apostoles. Nahibalo siya kon unsay mahitabo kanila. Sila daghan kaayog buluhaton, apan sila pagadumtan ug pagalutoson, sama sa nahitabo kaniya. (Juan 15:18-20) Sa kataposang gabii nga sila magkauban, daghang higayon nga iyang gipahinumdoman sila nga sila kinahanglang “maghigugmaay sa usag usa.”​—Juan 13:​34, 35; 15:​12, 13, 17.

² Si apostol Pedro, nga didto niadtong gabhiona, nakasabot nga hinungdanon kana nga pahinumdom. Pipila ka tuig sa ulahi, sa nagsulat sa hapit nang malaglag ang Jerusalem, gipasiugda ni Pedro nga hinungdanon ang gugma. Iyang gitambagan ang mga Kristohanon: “Ang kataposan sa tanang butang haduol na. . . . Labaw sa tanang butang, batoni ang mainit nga gugma alang sa usag usa.” (1 Pedro 4:​7, 8) Ang mga pulong ni Pedro makahuloganon kaayo alang niadtong nagkinabuhi “sa kataposang mga adlaw” niining presenteng sistema sa mga butang. (2 Timoteo 3:1) Unsa ang “mainit nga gugma”? Nganong hinungdanon nga magpasundayag kita niini nga gugma ngadto sa uban? Ug unsaon nato kini pagpasundayag?

“Mainit nga Gugma”​—Unsa Kini?

³ Daghan ang nagtuo nga ang gugma maoy usa ka kinaiyanhon nga pagbati. Apan si Pedro wala maghisgot bahin sa bisan unsa lamang nga matang sa gugma; siya naghisgot bahin sa labing hamili nga matang sa gugma. Ang pulong “gugma” sa 1 Pedro 4:8 maoy hubad sa Gregong pulong nga a·gaʹpe. Kini nga termino nagpasabot ug dili-hakog nga gugma nga gigiyahan o gigamhan sa prinsipyo. Ang usa ka reperensiyang basahon nag-ingon: “Ang gugma nga agape puwedeng mandoan tungod kay dili kini usa ka emosyon kondili desisyon sa hunahuna nga magpalihok sa usa ka tawo.” Tungod sa atong napanunod nga kiling sa kahakog, kita nagkinahanglan ug mga pahinumdom aron magpakita ug gugma sa usag usa sa mga paagi nga gitudlo sa mga prinsipyo sa Diyos.​—Genesis 8:21; Roma 5:12.

⁴ Kini wala magpasabot nga kinahanglang maghigugmaay kita tungod kay obligasyon nato kini. Ang a·gaʹpe tugob sa kainit ug pagbati. Si Pedro nag-ingon nga kita kinahanglang dunay “mainit [sa literal, “mainaton”] nga gugma alang sa usag usa.” a (Kingdom Interlinear) Bisan pa niana, kini nga gugma nagkinahanglan ug paningkamot. Bahin sa Gregong pulong nga gihubad ug “mainit,” ang usa ka eskolar miingon: “Naghulagway kini sa nainat nga kaunoran sa usa ka atleta nga naggamit sa tanan niyang kusog hangtod sa kataposan sa lumba.”

⁵ Nan, ang atong gugma dili angayng pagalimitehan sa paghimo sa kon unsay sayon nga buhaton o pagpakita niini ngadto sa pipila lang ka tawo. Ang Kristohanong gugma nagkinahanglan ug “pag-inat” sa atong kasingkasing, sa pagpakitag gugma bisan ug lisod tingali kining himoon. (2 Corinto 6:11-13) Tin-aw nga kinahanglan natong ugmaron ug pauswagon kining matanga sa gugma, sama nga kinahanglang bansayon ug pauswagon sa usa ka atleta ang iyang mga katakos. Hinungdanon nga aduna kita niining matanga sa gugma alang sa usag usa. Ngano? Tungod sa labing menos tulo ka rason.

 Nganong Kinahanglan Natong Higugmaon ang Usag Usa?

⁶ Una, “tungod kay ang gugma nagagikan sa Diyos.” (1 Juan 4:7) Si Jehova, ang Tuboran niining madanihong kinaiya, una nga naghigugma kanato. Si apostol Juan miingon: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya.” (1 Juan 4:9) Ang Anak sa Diyos “gipadala” aron mahimong usa ka tawo, nga magtuman sa iyang ministeryo, ug mamatay diha sa estaka sa pagsakit​—aron “kita makabaton ug kinabuhi.” Sa unsang paagi angay natong balosan kining kinalabwang pagpasundayag sa gugma sa Diyos? Si Juan miingon: “Kon kita gihigugma sa Diyos niining paagiha, nan kita sa atong kaugalingon nailalom sa obligasyon nga maghigugmaay sa usag usa.” (1 Juan 4:11) Matikdi nga si Juan nagsulat, “Kon kita gihigugma sa Diyos niining paagiha”​—dili lang kay ikaw kondili kita. Tin-aw ang punto: Kon gihigugma sa Diyos ang atong mga isigkamagsisimba, nan angay usab nato silang higugmaon.

⁷ Ikaduha, hinungdanon gayod nga maghigugmaay kita sa usag usa ilabina karon aron makatabang kita sa atong mga igsoon nga nanginahanglan tungod kay “ang kataposan sa tanang butang haduol na.” (1 Pedro 4:7) Kita nagkinabuhi sa “makuyaw nga mga panahong lisod sagubangon.” (2 Timoteo 3:1) Ang mga kahimtang sa kalibotan, kinaiyanhong mga katalagman, ug pagsupak naghatag ug mga kalisdanan kanato. Tungod sa malisod nga mga kahimtang, angay nga mas masuod pa kita sa usag usa. Ang mainit nga gugma lig-ong magpahiusa kanato ug magpalihok kanato sa pagpakitag “pagtagad alang sa usag usa.”​—1 Corinto 12:​25, 26.

⁸ Ikatulo, kinahanglang maghigugmaay kita sa usag usa tungod kay dili nato buot nga “maghatag ug luna sa Yawa” sa pagpahimulos kanato. (Efeso 4:27) Abtik si Satanas sa paggamit sa dili-kahingpitan sa mga isigkamagtutuo​—sa ilang mga kahuyangon, sala, ug mga sayop​—ingong kapangdolan. Mobiya ba kita sa kongregasyon tungod sa ilang masakit nga pulong o dili-malulotong buhat? (Proverbio 12:18) Dili kita mobiya kon kita mainit nga naghigugmaay sa usag usa! Kini nga gugma motabang kanato sa pagpatunhay sa kalinaw ug sa hiniusang pag-alagad sa Diyos “abaga sa abaga.”​—Sofonias 3:9.

Kon Unsaon Pagpasundayag nga Imong Gihigugma ang Uban

⁹ Ang pagpakitag gugma kinahanglang magsugod diha sa pamilya. Si Jesus nag-ingon nga ang iyang tinuod nga mga sumusunod mailhan pinaagi sa ilang gugma sa usag usa. (Juan 13:​34, 35) Ang gugma kinahanglang dayag nga makita dili lamang diha sa kongregasyon kondili diha sa pamilya usab​—tali sa mga magtiayon ug tali sa mga ginikanan ug mga anak. Dili lamang kita angay mobati ug gugma alang sa mga membro sa atong pamilya; angay natong ipasundayag kini sa positibong mga paagi.

¹⁰ Sa unsang paagi ikapakita sa mga magtiayon ang gugma sa usag usa? Ang bana nga tinuod nga nahigugma sa iyang asawa magpakita nga iyang gipangga ang iyang asawa pinaagi sa iyang mga pulong ug mga buhat​—sa publiko ug sa pribado. Siya magtahod sa personal nga dignidad sa iyang asawa ug magpakitag konsiderasyon sa iyang mga hunahuna, panglantaw, ug pagbati. (1 Pedro 3:7) Iyang unahon ang kaayohan sa iyang asawa, ug iyang himoon ang tanan niyang maarangan aron maatiman ang materyal, espirituwal, ug emosyonal nga mga panginahanglan sa iyang asawa. (Efeso 5:​25, 28) Ang asawa nga tinuod nga nahigugma sa iyang bana maghatag ug “halawom nga pagtahod” kaniya, bisan pag may mga panahon nga dili mahimo sa iyang bana ang iyang mga ginapaabot. (Efeso 5:​22, 33) Siya mosuportar sa iyang bana ug magpasakop kaniya, nga dili mangayog dili-makataronganong mga  butang, kondili mokooperar kaniya sa pag-una sa espirituwal nga mga butang.​—Genesis 2:18; Mateo 6:33.

¹¹ Mga ginikanan, sa unsang paagi kamo makapakitag gugma sa inyong mga anak? Ang inyong pagkaandam sa paghago sa pagtagana sa ilang materyal nga panginahanglan maoy pamatuod sa inyong gugma. (1 Timoteo 5:8) Apan labaw pa sa pagkaon, besti, ug puy-anan ang gikinahanglan sa mga bata. Aron modako sila nga nahigugma ug nag-alagad sa matuod nga Diyos, gikinahanglan nila ang espirituwal nga pagbansay. (Proverbio 22:6) Kana nagkahulogan ug pag-eskedyul sa pamilya sa pagtuon sa Bibliya, pagpakigbahin sa ministeryo, ug pagtambong sa Kristohanong mga tigom. (Deuteronomio 6:4-7) Ang regular nga paghimo niining mga kalihokana nagkinahanglan ug dako nga pagsakripisyo, ilabina niining malisod nga mga panahon. Ang inyong kabalaka ug paningkamot sa pag-atiman sa espirituwal nga mga kinahanglanon sa inyong mga anak maoy pagpasundayag sa inyong gugma, tungod kay pinaagi niini inyong gipakita nga interesado gayod kamo sa ilang dumalayong kaayohan.​—Juan 17:3.

¹² Ang mga ginikanan kinahanglang magpakita usab ug gugma pinaagi sa pag-atiman sa emosyonal nga mga panginahanglan sa ilang mga anak. Ang mga bata huyang pa; ang ilang batan-ong mga kasingkasing angay makombinsir nga sila inyong gihigugma. Isulti kanila nga gihigugma ninyo sila, ug kanunayng ipakita kanila nga gimahal gayod ninyo sila, kay kini nga mga pasundayag sa gugma nagpasalig kanila nga sila takos higugmaon ug dunay bili. Hatagi sila ug mapinanggaon ug sinserong komendasyon, kay niining paagiha masayran nila nga inyong nakita ug gipabilhan ang ilang mga paningkamot. Disiplinaha sila nga may gugma, kay kini nga pagtul-id magpakita kanila nga nahingawa kamo sa matang sa ilang pagkatawo inigdako nila. (Efeso 6:4) Kining tanang mapuslanong pagpasundayag ug gugma motabang sa pagtukod ug usa ka malipayon, suod nga pamilya nga mas andam sa pagsukol sa mga pagpit-os niining kataposang mga adlaw.

¹³ Ang gugma magpalihok kanato sa pagpalabay sa kasaypanan sa uban. Hinumdomi nga sa dihang gitambagan niya ang iyang mga magbabasa sa ‘pagbaton ug mainit nga gugma alang sa usag usa,’ gihatag ni Pedro ang rason kon nganong importante kaayo kini: “Kay ang gugma magatabon sa daghang sala.” (1 Pedro 4:8) Ang ‘pagtabon’ sa mga sala wala magpasabot ug pagtago sa grabeng mga sala. Kini angayng itug-an ngadto sa mga may katungdanan sa kongregasyon kinsa maoy mag-atiman niini. (Levitico 5:1; Proverbio 29:24) Dili gayod mahigugmaon​—ug dili Kasulatanhon​—nga tugotan kadtong may bug-at nga mga sala sa pagpadayon sa pagdaot o pagbiktima sa mga inosente.​—1 Corinto 5:9-13.

¹⁴ Kasagaran, dili kaayo seryoso ang mga sayop sa mga isigkamagtutuo. Kitang tanan mapandol usahay sa pulong o sa buhat, nga makapahiubos o makapasakit pa gani sa usag usa. (Santiago 3:2) Ibandilyo ba dayon nato ang mga kasaypanan sa uban? Kini makahatag lang ug kagubot sa kongregasyon. (Efeso 4:1-3) Kon kita dunay gugma, dili nato ‘ibutyag ang sayop’ sa isigkamagsisimba. (Salmo 50:20) Maingon nga ang palitada ug pintal makatabon sa mga daot sa bungbong, sa ingon ang gugma makatabon usab sa dili-kahingpitan sa uban.​—Proverbio 17:9.

¹⁵ Ang gugma magpalihok kanato sa pagtabang niadtong nanginahanglan gayod ug tabang. Samtang ang mga kahimtang sa kataposang mga adlaw padayon nga nagkagrabe, dunay mga panahon nga ang atong mga isigkamagtutuo nagkinahanglan ug materyal o pisikal nga tabang. (1 Juan 3:​17, 18) Pananglitan, duna bay membro sa atong kongregasyon nga naglisod gayod sa pinansiyal o nawad-ag trabaho? Nan tingali makahatag kita ug materyal nga tabang, sumala sa itugot sa atong kahimtang. (Proverbio 3:​27, 28; Santiago 2:14-17) Ayohonon ba ang balay sa usa ka tigulang nga balo nga babaye? Nan tingali makaboluntaryo kita sa pagtabang sa pag-ayo niini.​—Santiago 1:27.

¹⁶ Dili lamang ang mga tawo sa atong palibot ang angay natong pakitaan ug gugma. Usahay, makadungog  kita ug mga report bahin sa mga alagad sa Diyos sa ubang kayutaan nga nabiktima sa grabeng mga bagyo, linog, o kagubot sa katilingban. Basig nagkinahanglan gayod sila ug pagkaon, besti, ug ubang mga butang. Dili hinungdanon kon lain ang ilang rasa o tribo. Atong ‘higugmaon ang tibuok kapunongan sa mga igsoon.’ (1 Pedro 2:17) Busa, sama sa unang-siglong mga kongregasyon, kita maikag sa pagsuportar sa giorganisar nga mga paningkamot sa paghatag ug hinabang. (Buhat 11:27-30; Roma 15:26) Kon kita magpakita ug gugma niining mga paagiha, atong gipalig-on ang bugkos nga nagpahiusa kanato niining kataposang mga adlaw.​—Colosas 3:14.

¹⁷ Ang gugma magpalihok kanato sa pagpaambit ngadto sa uban sa maayong balita sa Gingharian sa Diyos. Tagda ang panig-ingnan ni Jesus. Ngano man nga siya nagsangyaw ug nagpanudlo? Siya “giabot ug kaluoy” sa mga panon sa mga tawo tungod sa ilang makaluluoy nga kahimtang sa espirituwal. (Marcos 6:34) Sila gipasagdan ug gipahisalaag sa mga magbalantay sa bakak nga relihiyon, nga mao untay angay motudlo kanila sa espirituwal nga mga kamatuoran ug mohatag kanila ug paglaom. Busa, kay gipalihok sa lalom, kinasingkasing nga gugma ug kaluoy, gihupay ni Jesus ang mga tawo pinaagi sa “maayong balita sa gingharian sa Diyos.”​—Lucas 4:16-21, 43.

¹⁸ Karon usab, daghang tawo ang napasagdan ug napahisalaag sa espirituwal ug walay paglaom. Kon, sama ni Jesus, kita mahunahunaon sa espirituwal nga mga panginahanglan sa mga tawong wala pa makaila sa matuod nga Diyos, nan ang gugma ug kaluoy maoy magtukmod kanato sa pagpaambit kanila sa maayong balita sa Gingharian sa Diyos. (Mateo 6:​9, 10; 24:14) Tungod kay mubo na lang ang panahon nga nahibilin, dinalian na gayod karon ang pagsangyaw niining makaluwas-ug-kinabuhi nga mensahe.​—1 Timoteo 4:16.

“Ang Kataposan sa Tanang Butang Haduol Na”

¹⁹ Hinumdomi, gisugdan ni Pedro ang iyang tambag nga maghigugmaay kita sa usag usa pinaagi niining mga pulonga: “Ang kataposan sa tanang butang haduol na.” (1 Pedro 4:7) Sa dili madugay kining daotang kalibotan pagapulihan sa matarong nga bag-ong kalibotan sa Diyos. (2 Pedro 3:13) Busa, dili kini panahon nga magparelaks-relaks. Si Jesus nagpasidaan kanato: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag.”​—Lucas 21:​34, 35.

²⁰ Busa, ‘magpadayon gayod kita sa pagbantay,’ nga alisto kon diin na kita sa agos sa panahon. (Mateo 24:42) Magbantay kita batok sa bisan unsang tentasyon ni Satanas nga makalinga kanato. Dili gayod nato tugotan kining dili-mabination, walay-gugma nga kalibotan sa pagpugong kanato sa pagpasundayag sa atong gugma sa uban. Labaw sa tanan, tinguhaon nato nga mas masuod pa sa matuod nga Diyos, si Jehova, kansang Mesiyanikong Gingharian sa dili madugay magatuman sa iyang mahimayaong katuyoan alang niini nga yuta.​—Pinadayag 21:​4, 5.

[Footnote]

MGA PANGUTANA SA PAGTUON

• Unsay panamilit nga tambag ni Jesus alang sa iyang mga tinun-an, ug unsay nagpakita nga nasabtan ni Pedro ang punto? (Parapo 1-2)

• Unsa ang “mainit nga gugma”? (Parapo 3-5)

• Nganong kinahanglan nga kita maghigugmaay sa usag usa? (Parapo 6-8)

• Sa unsang paagi nimo ikapasundayag nga imong gihigugma ang uban? (Parapo 9-18)

• Nganong dili kini panahon nga magparelaks-relaks, ug unsa ang angay natong determinadong himoon? (Parapo 19-20)

[Hulagway sa panid 29]

Ang usa ka suod nga pamilya mas andam sa pagsukol sa mga pagpit-os niining kataposang mga adlaw

[Hulagway sa panid 30]

Ang gugma magpalihok kanato sa pagtabang niadtong nanginahanglan gayod ug tabang

[Hulagway sa panid 31]

Ang pagpaambit sa maayong balita sa Gingharian sa Diyos ngadto sa uban maoy usa ka buhat sa gugma