Unsay Kahulogan Niining Tanan?

SI Jesu-Kristo nag-ingon: Ang ilhanan sa “kataposan sa sistema sa mga butang” mao ang gubat, kanihit sa pagkaon, kamatay, ug mga linog.​—Mateo 24:1-8; Lucas 21:​10, 11.

Sukad sa 1914 ang kinabuhi nadaot gumikan sa panaggubatay sa mga nasod ug sa lumadnong mga grupo, nga kasagarang mahitabo tungod kay ang mga klero mag-apil-apil sa politika ug karon kini nadaot gumikan sa kaylap nga mga pag-atake sa terorista.

Bisan pa sa kauswagan sa siyensiya, ginatos ka milyong tawo sa tibuok kalibotan nag-antos tungod sa nihit kaayong pagkaon. Kada tuig minilyon ang nangamatay tungod sa kanihit sa pagkaon.

Ang kamatay, o kaylap nga epidemya sa makatakod nga sakit, maoy bahin usab sa ilhanan nga gihatag ni Jesus. Human sa Gubat sa Kalibotan I, ang epidemya sa trangkaso nakahunos ug kapin sa 21,000,000 ka kinabuhi. Dili sama sa mga hampak nga nag-apektar kaniadto sa pipila lang ka lugar, naapektohan niini ang mga nasod sa tibuok kalibotan ug ang hilit nga mga isla. Ang AIDS nagkaylap karon sa kalibotan, ug ang mga sakit sama sa TB, malarya, pagkabuta nga ipahinabo sa black fly, ug sa Chagas’ disease naglungtad gihapon diha sa kabos nga mga nasod.

Gikataho nga kada tuig dunay tinagpulo ka libong linog nga lainlain ug gikusgon ang nagakahitabo. Bisan pa sa nabatonang mga kasangkapan ug mas maayong mga paagi sa pagbalita, ang mga katalagman tungod sa mga linog diha sa mga dapit nga baga ug populasyon kanunay nga nabalita.

Ang Bibliya nagtagna usab: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini; ug magpahilayo ka kanila.”​—2 Timoteo 3:1-5.

Dili ka ba mouyon nga nagkinabuhi na kita karon sa “makuyaw nga mga panahong lisod sagubangon”?

Nakamatikod ka ba nga ang mga tawo sobra ka mahigugmaon sa ilang kaugalingon, mahigugmaon sa salapi, ug mapahitas-on?

Kinsay makapangulipas nga ang kalibotan napuno sa mga tawo nga moinsistir sa ilang gusto apan dili mapasalamaton, dili-ikasabot, dili-maunongon?

Nasayod ka ba nga ang pagkadili-masinugtanon ngadto sa mga ginikanan ug ang makapakurat nga kawalay-pagbati kusog kaayong nagdaghan, dili lang diha sa pipila ka dapit kondili sa tibuok kalibotan?

 Walay duhaduha nakaamgo ka nga nagkinabuhi na kita sa usa ka kalibotan nga nahubog sa gugma sa kalipayan apan walay gugma sa pagkamaayo. Mao kanay paghubit sa Bibliya sa mga tinamdan nga maglabi sa “kataposang mga adlaw.”

Nagkinahanglan pa ba kita ug dugang pamatuod aron mahibaloan ang panahon nga atong gipuy-an? Si Jesus nagtagna usab nga niining panahona, ang maayong balita sa Gingharian sa Diyos igawali sa tibuok gipuy-ang yuta. (Mateo 24:14) Ginahimo ba kini karon?

Ang Bantayanang Torre, nga usa ka binase-sa-Bibliya nga basahon nga gigamit sa pagmantala sa maayong balita sa Gingharian ni Jehova, regular nga ginapatik sa mas daghang pinulongan kay sa bisan unsang publikasyon nga regular nga gipatik.

Kada tuig, ang mga Saksi ni Jehova nagagugol ug kapin sa usa ka bilyong oras sa pagsangyaw sa uban bahin sa Gingharian sa Diyos.

 Ang literatura nga nagpatin-aw sa Bibliya ilang gipatik karon diha sa mga 400 ka pinulongan, bisan sa mga pinulongan nga ginabasa sa hilit ug gagmayng mga grupo sa populasyon. Ang mga Saksi ni Jehova nagwali sa maayong balita ngadto sa tanang nasod; nagsangyaw usab sila diha sa daghang gagmay kaayong mga isla ug mga teritoryo nga dili kaayo importante sa politikanhong panglantaw. Diha sa kadaghanang kayutaan, nagdumala sila ug regular nga programa sa edukasyon sa Bibliya.

Sa pagkatinuod, ang maayong balita sa Gingharian sa Diyos ginawali sa tibuok gipuy-ang yuta, dili aron sa pagkombertir sa kalibotan, kondili sa paghatag ug pamatuod. Ang mga tawo sa tanang dapit gihatagan ug higayon sa pagpakita kon sila ba may pagtagad sa kon kinsay naglalang sa kalangitan ug sa yuta ug kon sila ba magpakitag pagtahod sa iyang mga balaod ug magpasundayag ug gugma sa ilang isigkatawo.​—Lucas 10:25-27; Pinadayag 4:11.

Sa dili madugay, paphaon sa Gingharian sa Diyos ang tanang daotan gikan sa yuta ug himoon kini nga tibuok-kalibotang paraiso.​—Lucas 23:43.

[Kahon sa panid 6]

Kataposang mga Adlaw sa Unsa?

Dili kini kataposang mga adlaw sa mga tawo. Alang niadtong naghimo sa kabubut-on sa Diyos, ang Bibliya nagtanyag ug paglaom nga kinabuhing walay kataposan.​—Juan 3:​16, 36; 1 Juan 2:17.

Dili kini kataposang mga adlaw sa yuta. Ang Pulong sa Diyos nagsaad nga ang gipuy-ang yuta magpabilin hangtod sa hangtod.​—Salmo 37:29; 104:5; Isaias 45:18.

Hinunoa, kini ang kataposang mga adlaw niining mapintas, walay-gugma nga sistema sa mga butang ug sa mga tawong nagpadayon sa pagsundog sa mga buhat niini.​—Proverbio 2:​21, 22.

[Kahon/Hulagway sa panid 7]

Tinuod ba nga Pulong sa Diyos ang Bibliya?

Ang mga manalagna sa Bibliya sa daghang higayon nagsulat: “Mao kini ang giingon ni Jehova.” (Isaias 43:14; Jeremias 2:2) Bisan si Jesu-Kristo, ang Anak sa Diyos, nagpasiugda nga siya ‘wala magsulti nga gikan sa iya rang kaugalingon.’ (Juan 14:10) Ang Bibliya mismo tin-aw nga nag-ingon: “Ang tibuok Kasulatan inspirado sa Diyos.”​—2 Timoteo 3:16.

Walay laing libro ang napatik diha sa daghang pinulongan​—kapin sa 2,200, sumala sa gitaho sa United Bible Societies. Walay laing libro ang kaylap kaayo ang pagkaapod-apod​—karon kapin na sa upat ka bilyong kopya. Dili ba mao kanay imong madahom sa usa ka mensahe nga gikan sa Diyos alang sa tanang tawo?

Alang sa bug-os nga paghisgot bahin sa mga pamatuod nga ang Bibliya inspirado sa Diyos, tan-awa ang librong Ang Bibliya​—Pulong sa Diyos o sa Tawo?, nga gipatik sa mga Saksi ni Jehova.

Kon imong basahon ang Bibliya ug ilhon kini nga Pulong gayod sa Diyos, ikaw makadawat ug dakong kaayohan.

[Kahon/Mga hulagway sa panid 8]

Unsa ang Gingharian sa Diyos?

Kini mao ang kagamhanan sa langit nga ang pagmando iya sa matuod nga Diyos, si Jehova, ang Maglalalang sa langit ug yuta.​—Jeremias 10:​10, 12.

Ang Bibliya nagpaila kang Jesu-Kristo ingong ang usa nga gihatagan sa Diyos niining maong awtoridad sa pagmando. (Pinadayag 11:15) Sa dinhi pa sa yuta, gipasundayag ni Jesus nga siya may katingalahang awtoridad na gikan sa Diyos​—awtoridad nga nagpaarang kaniya sa pagkontrolar sa hangin ug dagat, pag-ayo sa tanang matang sa mga sakit, ug bisan pagbanhaw sa mga patay. (Mateo 9:2-8; Marcos 4:37-41; Juan 11:11-44) Ang inspiradong tagna sa Bibliya nag-ingon nga ihatag usab sa Diyos kaniya ang “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:​13, 14) Ang maong kagamhanan gitawag ug Gingharian sa langit; ug si Jesu-Kristo nagmando na karon sa langit.

[Mga hulagway sa panid 7]

Pagsangyaw sa maayong balita sa tibuok kalibotan