Usa ka Bag-ong Kalibotan Sumala sa Saad sa Diyos

ANG Bibliya, ang sinulat nga Pulong sa Diyos, naghatag kanatog paglaom sa dihang kini nag-ingon: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.”​—2 Pedro 3:13.

Unsa ang “bag-ong mga langit”? Ang Bibliya naglangkit sa langit ngadto sa pagmando. (Buhat 7:49) Ang “bag-ong mga langit” maoy usa ka bag-ong kagamhanan nga magmando ibabaw sa yuta. Bag-o kini tungod kay pulihan niini ang presenteng sistema sa pagmando; kini maoy bag-ong kaugmaran usab diha sa katumanan sa katuyoan sa Diyos. Mao kini ang Gingharian nga gitudlo kanato ni Jesus nga iampo. (Mateo 6:10) Sanglit ang Diyos maoy Tinubdan niini ug siya nagpuyo sa langit, kini gitawag nga “gingharian sa mga langit.”​—Mateo 7:21.

Unsa ang “bag-ong yuta”? Dili kini bag-ong planeta nga yuta, tungod kay ang Bibliya klarong nag-ingon nga ang yuta puy-an hangtod sa hangtod. Ang “bag-ong yuta” maoy usa ka bag-ong katilingban sa mga tawo. Bag-o kini tungod kay ang mga daotan wad-on na. (Proverbio 2:​21, 22) Ang tanan unya nga buhi magpasidungog ug magmasinugtanon sa Maglalalang ug magkinabuhi uyon sa iyang mga sukdanan. (Salmo 22:27) Ang mga tawo sa tanang kanasoran gidapit sa pagtuon bahin niining maong mga sukdanan ug sa pagpahiuyon sa ilang kinabuhi niini karon. Ginahimo mo ba kini?

Sa bag-ong kalibotan sa Diyos, ang tanan magatahod sa iyang pagmando. Ang gugma alang sa Diyos nagpalihok ba kanimo sa pagtuman kaniya? (1 Juan 5:3) Makita ba kana diha sa imong panimalay? sa trabahoan o sa tunghaan? sa paagi sa paggamit nimo sa imong kinabuhi?

Sa bag-ong kalibotan, ang mga tawo magkahiusa sa pagsimba sa matuod nga Diyos. Ikaw ba nagsimba sa Maglalalang sa langit ug yuta? Ang imong pagsimba nagpahiusa ba gayod kanimo uban sa mga isigkamagsisimba sa tanang nasod, rasa, ug pinulongan?​—Salmo 86:​9, 10; Isaias 2:2-4; Sofonias 3:9.

 [Kahon sa panid 17]

Ang Diyos nga Nagsaad Niining mga Butanga

Siya mao ang Maglalalang sa kalangitan ug sa planetang Yuta. Siya mao ang gipaila ni Jesu-Kristo ingong “ang bugtong matuod nga Diyos.”​—Juan 17:3.

Ang kadaghanan sa mga tawo nagpasidungog sa mga diyos nga silay naggama. Minilyon ang nagyukbo atubangan sa walay kinabuhi nga mga imahen. Ang uban naghimaya sa tawhanong mga institusyon, materyalistikong mga pilosopiya, o sa ilang kaugalingong mga tinguha. Bisan kadtong nag-angkong naggamit sa Bibliya dili tanan nagpasidungog sa ngalan sa usa nga gipaila niini ingong “ang matuod nga Diyos.”​—Deuteronomio 4:35.

Mahitungod sa iyang kaugalingon, ang Maglalalang nag-ingon: “Ako mao si Jehova. Kana ang akong ngalan.” (Isaias 42:​5, 8) Kining ngalana makita sa mga 7,000 ka beses diha sa Bibliya sa orihinal nga mga pinulongan niini. Si Jesu-Kristo nagtudlo sa iyang mga sumusunod sa pag-ampo: “Amahan namo nga anaa sa mga langit, pagabalaanon unta ang imong ngalan.”​—Mateo 6:9.

Unsay personalidad sa matuod nga Diyos? Iyang gihubit ang iyang kaugalingon ingong “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran” ug ang usa nga mosilot gayod niadtong motuyo sa pagsupak sa iyang mga sugo. (Exodo 34:​6, 7) Ang kasaysayan sa iyang pagpakiglabot sa mga tawo nagpamatuod sa pagkatinuod niana nga paghubit.

Ang ngalan ug ang persona nga gihawasan nianang ngalana angayng balaanon, o tagdon nga balaan. Ingong Maglalalang ug Soberano sa Uniberso, siya takos sa atong pagkamasinugtanon ug bug-os nga pagsimba. Ikaw ba masinugtanon ug nagsimba kaniya?

 [Kahon/Hulagway sa panid 18]

Unsang mga Kausaban ang Himoon sa “Bag-ong mga Langit ug Usa ka Bag-ong Yuta”?

Yuta himoong Paraiso Lucas 23:43

Usa ka tibuok-kalibotang Juan 13:35;

katilingban diin ang mga tawo Pinadayag 7:​9, 10

sa tanang nasod, rasa, ug

pinulongan mahiusa sa gugma

Tibuok-kalibotang pakigdait, Salmo 37:​10, 11;

tinuod nga kasegurohan alang Miqueas 4:​3, 4

sa tanan

Makapatagbaw nga trabaho, Isaias 25:6; 65:​17, 21-23

dagayang pagkaon

Sakit, kaguol, kamatayon Isaias 25:8;

mawala na Pinadayag 21:​1, 4

Usa ka kalibotan nga nahiusa Pinadayag 15:​3, 4

sa pagsimba sa matuod nga Diyos

 [Kahon/Mga hulagway sa panid 19]

Usa Ka ba Unya nga Makapahimulos Niini?

Ang Diyos dili mamakak!​—Tito 1:2.

Si Jehova nagpahayag: “Ang akong pulong . . . dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”​—Isaias 55:11.

Si Jehova naglalang na ug “bag-ong mga langit ug usa ka bag-ong yuta.” Ang langitnong kagamhanan nagsugod na sa pagmando. Ang pundasyon alang sa “bag-ong yuta” napahimutang na.

Human sa pag-asoy bahin sa pipila ka kahibulongang mga butang nga himoon unya sa “usa ka bag-ong langit ug usa ka bag-ong yuta” alang sa katawhan, ang Pinadayag nagkutlo sa Diyos mismo, ang Soberano sa Uniberso, nga nag-ingon: “Tan-awa! Ginabag-o ko ang tanang butang.” Dugang pa, siya nag-ingon: “Isulat kini, tungod kay kining mga pulonga kasaligan ug matuod.”​—Pinadayag 21:​1, 5.

Ang hinungdanong pangutana mao, Kita ba naghimo sa gikinahanglang mga kausaban aron maisip nga takos nga mahimong bahin sa “bag-ong yuta” ilalom sa “bag-ong mga langit”?