“Wala Sila Magtagad”

ANG pagbalewala sa mga pasidaan posibleng moresulta ug katalagman.

Nagkamulo sa pagpangandam ang Darwin, Australia, alang sa kasadyaan niadtong 1974 sa dihang milanog ang sirena agig pasidaan sa nagsingabot nga kusog kaayong bagyo. Apan ang Darwin wala maagii sukad ug kadaot sa bagyo sa mga 30 na ka tuig. Karon na hinuon? Ang kadaghanang molupyo wala maghunahuna nga dako gayod ang kapeligrohan hangtod nga ang kusog kaayong hangin nagsugod paglangkat sa mga atop ug paglaksi sa mga bungbong sa balay diin nagtapok ang mga tawo. Pagkasunod buntag, ang siyudad napayhag na.

Mibuto ang usa ka bolkan sa Colombia niadtong Nobyembre 1985. Ang natunaw nga niyebe ug yelo nagpatunghag baha nga lapok nga naglubong sa kapin sa 20,000 ka molupyo sa lungsod sa Armero. Wala bay gihatag nga pasidaan? Ang bukid nagsige nag uyog sa daghang bulan. Apan, kay naanad na sa pagpuyo tapad sa bolkan, ang kadaghanan sa mga tawo sa Armero wala magtagad. Ang mga opisyales nakadawat ug pasidaan nga dunay katalagman nga nagsingabot, apan halos wala silay gihimo sa pagpasidaan sa mga tawo. Dihay mga pahibalo nga gisibya sa radyo sa pagpaningkamot nga dili malisang ang mga molupyo. Ang trompa sa simbahan gigamit aron sa pag-awhag sa mga tawo sa pagpabiling kalmado. Sa pagkagabii, dihay duha ka kusog kaayong pagbuto. Kon didto ka pa, imo bang biyaan ang imong mga kabtangan ug mokalagiw? Pipila lang ka tawo ang naningkamot sa pagkalagiw apan ulahi na ang tanan.

Kasagaran ang mga geologo tukma nga makatagna kon asa mahitabo ang mga linog. Apan sila panagsa rang makatagna sa eksaktong panahon nga kini mahitabo. Sa 1999, ang mga linog sa tibuok kalibotan nakakalas ug halos 20,000 ka kinabuhi. Daghan niadtong nangamatay nagtuo nga dili gayod kini mahitabo kanila.

Unsay Imong Reaksiyon sa mga Pasidaan nga Gikan Mismo sa Diyos?

Ang Bibliya tin-awng nagbatbat kaniadto pa sa mga hitabo nga magtimaan sa kataposang mga adlaw. Maylabot niana, kini nag-awhag kanato sa pagpalandong sa “mga adlaw ni Noe.” “Niadtong mga adlawa sa wala pa ang baha,” ang mga tawo puliki sa naandang mga kalihokan  sa kinabuhi, bisan pag sa walay duhaduha nabalaka sila sa pagdagsang sa kapintasan. Kon bahin sa pasidaan nga gihatag sa Diyos pinaagi sa iyang alagad nga si Noe, “wala sila magtagad hangtod nga miabot ang baha ug gibanlas silang tanan.” (Mateo 24:37-39) Kon nabuhi ka pa kaniadto, mamati ka kaha sa pasidaan? Mamati ka kaha karon?

Komosta kon pananglitan nagpuyo ka sa Sodoma, duol sa Patayng Dagat, sa mga adlaw ni Lot nga pag-umangkon ni Abraham? Ang kabanikahan nahisamag paraiso. Ang siyudad mauswagon. Ang mga tawo walay kabalaka. Sa mga adlaw ni Lot, “sila nanagpangaon, sila nanag-inom, sila nanagpamalit, sila nanagbaligya, sila nanagtanom, sila nanagpanukod.” Ang katilingban nga ilang gikinabuhian imoral usab kaayo. Mamati ka kaha sa pasidaan sa dihang gisaway ni Lot ang daotang mga buhat? Mamati ka kaha sa dihang giingnan ka niya nga ang Diyos nakahukom sa paglaglag sa Sodoma? O lantawon mo ba kini nga tiawtiaw lang, sama sa paglantaw niini sa mga umagarong lalaki ni Lot? Dili ba kaha nagsugod ka na sa pagkalagiw apan sa ulahi milingi, sama sa gihimo sa asawa ni Lot? Bisan tuod ang uban wala motuo sa pasidaan, sa adlaw nga migula si Lot sa Sodoma, “miulan ug kalayo ug asupre gikan sa langit ug gilaglag silang tanan.”​—Lucas 17:​28, 29.

Ang kadaghanang tawo sa atong adlaw wala magtagad. Apan kining maong mga pananglitan gipreserbar diha sa Pulong sa Diyos ingong pasidaan kanato, sa pagdasig kanato nga MAGPADAYON SA PAGBANTAY!

[Kahon/Hulagway sa panid 22]

Diha ba Gayoy Tibuok-Yutang Lunop?

Daghang kritiko nag-ingong Wala. Apan ang Bibliya nag-ingong Oo.

Si Jesu-Kristo mismo naghisgot bahin niini, ug buhi siya sa dihang nahitabo kini, nga nagtan-aw niini gikan sa langit.

[Kahon/Hulagway sa panid 23]

Nalaglag ba Gayod ang Sodoma ug Gomora?

Ang arkeolohiya nagpamatuod niining hitaboa.

Ang sekular nga kasaysayan naghisgot bahin niini.

Si Jesu-Kristo nagpamatuod sa maong hitabo, ug gihisgotan kini diha sa 14 ka lainlaing mga basahon sa Bibliya.