Ang ngalan sa usa sa pito ka opisyal sa palasyo kinsa nag-alagad sa Persianhong hari nga si Ahasuero, ang bana sa Hudiyo nga si Ester, diha sa iyang palasyo sa Susan nga kanhi kaulohan sa Persia.​—Est 1:10.

Diha sa King James Version, si Abagta giingon nga usa sa pito ka “pangulong opisyal sa panimalay,” ug ang mabasa sa panaplin nag-ingong “mga eunuko.” Bisan tuod ang mga eunuko kanunayng gigamit ingong sinaligang mga alagad sulod sa harianong panimalay sa mga nasod sa Tungang Sidlakan, ang orihinal nga Hebreohanong pulong nga sa·risʹ sa panguna nagkahulogang “opisyal sa palasyo” ug segundaryong kahulogan lamang ang usa ka tawong kinapon. Sanglit kining pito ka opisyal sa palasyo maoy mga tig-alagad sa hari ug lagmit nga wala itudlo ingong mga magbalantay sa kababayen-an (sama kang Hegai, ang eunuko sa hari nga gihisgotan sa Ester 2:3), sila tingali dili mga eunuko sa pisikal nga diwa.