[Mga Tabokanang Bahin (Mga Labanganan); Utlanan (Mga Rehiyon sa Unahan Pa)].

Kining ngalana walay duhaduhang nagtumong sa usa ka rehiyon sa S sa Suba sa Jordan ug, ilabina, sa S sa Patayng Dagat. Sa Jeremias 22:20 kini gihisgotan uban sa mga rehiyon sa Lebanon ug Basan.

Sa ubang mga paghisgot niini diha sa rekord sa Bibliya, kini nalangkit sa usa ka kutay o lumbay sa kabukiran. Ang terminong “Abarim,” nga nagtumong sa “mga rehiyon sa unahan pa,” lagmit nagpakita nga ang mga tawo nga gigikanan sa termino nanimuyo sa kasadpan nga bahin sa Jordan; ug posible nga kini nga termino unang gigamit ni Abraham ug padayong gigamit sa mga Israelinhon sa ilang pagbiya sa Ehipto.

Sa hapit nang matapos ang 40-ka-tuig nga pagpanaw sa kamingawan nga ang mga Israelinhon nakaabot niini nga teritoryo ug nagkampo “sa kabukiran sa Abarim.” (Num 33:​47, 48) Dayon sila milugsong sa Kapatagan sa Moab, nga nahimutang sa S sa Jordan sa A nga tumoy sa Patayng Dagat. Dinhi sila mihimo sa ilang kataposang pagkampo una pa motabok sa Suba sa Jordan. Dinhi usab si Jehova miingon kang Moises: “Tungas niining bukira sa Abarim, ang Bukid sa Nebo, nga anaa sa yuta sa Moab, nga nag-atubang sa Jerico, ug tan-awa ang yuta sa Canaan, nga akong ihatag sa mga anak sa Israel ingong panulondon.”​—Deu 32:49; Num 27:12.

Pinasukad niini mopatim-aw nga ang rehiyon sa Abarim, uban sa kabukiran niini, nahimutang sa AK nga bahin sa teritoryo sa Moab. Apan, lagmit nga kini misaylo pa sa kinatibuk-ang kutay sa mga pangpang sa kabukiran nga nahimutang sa tibuok S nga bahin sa Patayng Dagat gikan sa A hangtod sa H. Sa Numeros 21:11 ug 33:44 gihisgotan ang usa ka hunonganan diha sa ruta sa mga Israelinhon nga gitawag ug “Iye-abarim,” ug ang konteksto nagbutang niini sa H sa Moab ug sa H nga tumoy sa Patayng Dagat. Lagmit mao kini ang kinahabagatang tumoy sa rehiyon nga gitawag ug Abarim.​—Tan-awa ang IYE-ABARIM.

Ang Bukid sa Nebo dayag nga usa sa mas habog nga mga bukid sa Abarim.​—Tan-awa ang NEBO Num. 3.