Ang kinamub-an nga basahon sa tagna diha sa Hebreohanong Kasulatan. Gisulat ni Abdias (bahin kaniya wala nay laing nahibaloan gawas lamang sa iyang ngalan), kini nga basahon naundan sa usa ka pahayag sa paghukom ni Jehova batok sa Edom, naghatag sa katarongan sa maong paghukom, ug nagpunting sa umaabot nga pagpasig-uli “sa balay ni Jacob.” Ang pagkapuo sa mga Edomhanon ingong usa ka katawhan ug ang pagpasig-uli sa mga Israelinhon ngadto sa ilang yuta nagpamatuod sa tukmang katumanan sa tagna ni Abdias.​—Abd 17, 18; tan-awa ang EDOM, EDOMHANON.

Gihatag ang tagna tungod sa ‘dili-inigsoong’ pagtratar nga gipakita sa mga Edomhanon ngadto “sa mga anak sa Juda” sa dihang ang naulahi nakaagom ug kapildihan. Ang mga Edomhanon, pinaagi sa ilang katigulangan nga si Esau, maoy paryente  sa mga Israelinhon. Ang mga Edomhanon nagmaya tungod sa katalagman sa Juda, nakig-ambit sa pagkuhag inagaw gikan sa mga Hudiyo, nagbabag kanila sa pag-ikyas gikan sa ilang yuta, ug gani nagtugyan kanila ngadto sa kaaway. (Abd 12-14) Ingon sa makita sa pagtandi sa tagna ni Abdias ngadto sa mga pulong ni Jeremias (25:15-17, 21, 27-29; 49:7-22) ug Ezequiel (25:12-14; 35:1-15), kini lagmit gayod nga nahitabo maylabot sa kalaglagan sa Jerusalem pinaagi sa Babilonyanhong kasundalohan ug, busa, gituohang gisulat kini nga basahon niadtong mga tuig 607 W.K.P.

Sanglit daghan sa mga butang nga gitagna diha sa tagna ni Abdias gitagna usab diha sa basahon ni Jeremias, kini naghimo sa katumanan sa pulong ni Jehova mahitungod sa Edom nga tino gayod.​—Itandi ang Gen 41:32.

[Kahon sa panid 16]

MGA PANGUNANG PUNTO SA ABDIAS

Ang paghukom ni Jehova batok sa Edom ug ang saad sa pagpasig-uli sa katawhan ni Jehova

Gisulat niadtong mga 607 W.K.P., ang tuig nga gilaglag sa mga Babilonyanhon ang Jerusalem

Ang pakigbahin sa Edom sa gihimong kapintasan ngadto sa mga kaliwat ni Jacob

Sa dihang ang Jerusalem nasakop ug ang katawhan niini nabihag, ang Edom mibarog lamang sa daplin (ber 10, 11)

Siya dili unta angayng magmaya tungod sa katalagman sa Juda, ug makig-ambit sa pagpangagaw sa katawhan sa Diyos ug sa pagtugyan sa mga nakaikyas ngadto sa kaaway (ber 12-14)

Ang katalagman modangat sa Edom

Gitawag ni Jehova ang kanasoran aron sa pagpakiggubat sa Edom (ber 1)

Bisan pa sa daw hilwas nga kahimtang niini, ang Edom ipaubos (ber 2-4)

Ang mga kawatan o mga mag-aani mokuha lamang sa kon unsay ilang gikinahanglan ug adunay ilang ibilin; sa dihang mapukan ang Edom, siya bug-os nga pagaagawan; siya limbongan niadtong iyang gipakigsaaran, ug ang iyang maalamon ug gamhanang mga tawo makaagom sa kalaglagan (ber 5-9)

Ang balay ni Esau makadawat sa samang pagtratar nga gipakita niini sa Juda; ang balay ni Esau mahanaw (ber 15, 18)

Ang balay ni Jacob ipasig-uli

Ang Zion mahimong balaan; ang balay ni Jacob mao ang kalayo nga magaut-ot sa balay ni Esau sama sa dagami (ber 17, 18)

Ang napasig-uling katawhan ni Jehova manag-iya sa “mga butang nga ilang panag-iyahon,” lakip ang “bukirong rehiyon ni Esau” (ber 19, 20)

Ang pagkahari maiya ni Jehova (ber 21)