[lagmit, Alagad ni Nebo [usa ka Babilonyanhong diyos]]. Ang ngalan nga gingalan kang Azarias, usa sa mga Hudiyong batan-on nga harianon o hamilig kagikan nga gibihag ni Nabucodonosor niadtong 617 W.K.P.​—Dan 1:​3, 4, 7.

Ang pipila ka eskolar nagtuo nga ang “Nego” maoy usa ka tinuyo nga pag-usab sa ngalang Nebo, usa ka Babilonyanhong diyos, aron dili makapasuko kang Azarias. (Tan-awa ang NEBO Num. 4.) Ang ngalang Azarias nagkahulogang “Si Jehova Nagtabang,” ug mopatim-aw nga kining maong mga Hebreohanon, sa taliwala kanila, padayong naggamit sa ilang orihinal nga mga ngalan. (Dan 2:17) Didto sa Babilonya siya, kauban ni Daniel, Hananias, ug Misael, gihatagan ug hataas nga pasidungog kay nakapasar sa tulo-ka-tuig nga kurso sa pagbansay ug sa harianong pagsusi nga gipangunayan mismo ni Nabucodonosor, human nila ipasundayag ang relihiyosong integridad maylabot sa pagkaon ug ilimnon. (Dan 1:​4, 5, 8-20) Sa ulahi, tungod sa hangyo ni Daniel, si Azarias ug ang iyang duha ka kauban gihimo sa hari nga mga tagdumala sa sakop nga distrito sa Babilonya.​—Dan 2:49.

Human niana, si Abednego (Azarias), uban sa iyang duha ka Hebreohanong kauban, gisaway sa pipila ka Caldeanhon atubangan sa hari tungod sa pagdumili sa pagyukbo sa bulawang larawan sa hari agig sanong sa gipatugtog nga musika. (Dan 3:​5, 8, 12) Sa dihang sila gipangutana sa nasukong hari, ang ilang hugot nga pagdumili sa pagsupak sa ilang tanlag ug ang ilang pagpadayag ug pagtuo kang Jehova mao ang hinungdan nga gipatambog sila sa hari ngadto sa usa ka gipainit pag-ayong hudno, diin sila milagrosong giluwas sa hawas nga manulonda sa Diyos. Human sila pagawasa sa nalisang nga hari, ug human makita sa mga membro sa palasyo sa hari nga ang tulo ka lalaki naluwas nga wala maunsa, nahibalik na usab kanila ang pabor sa hari.​—Dan 3:15-30; tan-awa ang MESAK; SADRAK.