[Sapa sa Balay ni Maaca].

Usa ka kinutaang siyudad sa Neptali sa amihanang Palestina nga lagmit mga 7 km (4 mi) sa KAK sa Dan, nga gituohang mao ang Tell Abil (Tel Avel Bet Maʽakha). Maayo ang pagkahimutang niini sa daplin sa dalan gikan sa Hazor paamihanan sa kinasang-an sa S-K nga ruta gikan sa Damasco paingon sa Tiro.

Ang mga tawo ni David ubos sa pagpangulo ni Joab milikos sa siyudad sa dihang ang rebeldeng si Sheba mikalagiw didto. Tungod niini, ang usa ka maalamong babaye, nga namulong alang sa “mga makigdaiton ug mga matinumanon sa Israel,” nangamuyo kang Joab nga dili laglagon ang Abel, kay sukad pa sa kakaraanan kining dapita maoy gipakisayran alang sa maalamong mga paghukom, busa “usa ka inahan sa Israel”; lagmit nagkahulogan usab nga usa kini ka kaulohang siyudad o siyudad nga adunay sakop nga mga lungsod. Kay mipatuo sa tambag sa babaye, ang mga molupyo nag-itsa sa ulo ni Sheba ngadto sa ibabaw sa paril, ug ang siyudad wala laglaga.​—2Sa 20:14-22.

Kay gisibahan ni Asa sa Juda, gihampak sa Siryanhon nga si Ben-hadad I ang Abel-bet-maaca aron mapugngan si Baasa sa Israel sa pagtukod sa Rama. (1Ha 15:20; tan-awa ang RAMA Num. 1.) Ang Abel sa Bet-maaca nailog ni Tiglat-pileser III sa Asirya panahon sa paghari ni Peka, ug gidestiyero ang mga molupyo niini. (2Ha 15:29) Kining siyudara, nga gitawag sa Asiryanhong mga teksto nga Abilakka, makita sa mga inskripsiyon ni Tiglat-pileser III diha sa talaan sa mga siyudad nga iyang gisakop. Ang naglibot nga tabunok, maayong pagkatubig nga mga kaumahan naghatag ug lain pang haom nga ngalan nga Abel-maim (nagkahulogang “Agosanan sa mga Tubig”). Tungod sa nahimutangan niini kini nahimong usa ka maayong dapit nga tipiganan.​—2Cr 16:4.