[Sapa sa Pagsayaw].

Ang pinuy-anan ni Eliseo, diin si Elias nakakaplag kaniya nga nagdaro ug nagdihog kaniya ingong manununod nga manalagna.​—1Ha 19:16-19.

Sa mas naunang yugto ang Abel-mehola gilakip diha sa asoy sa dihang gipildi ang mga Midianhon sa gamayng pundok sa mga manggugubat ni Gideon. Gitaho nga ang mga Midianhon nagkatibuagsa sa pagkalagiw “hangtod sa utlanan sa Abel-mehola duol sa Tabat.”​—Huk 7:22.

Tungod kay ang Tabat nahimutang sa S sa Suba sa Jordan, dihay paningkamot nga gihimo sukad sa 1951 sa pag-establisar sa Abel-mehola ingong mao ang Tell el-Maqlub duol sa Wadi el-Yabis. Ang dugang argumento nga gihatag agig pagpaluyo niini nga pagtuo mao nga si Elias, human mobiya sa Horeb, mihapit sa Abel-mehola aron sa pagdihog kang Eliseo ug nakadawat sa usa pa ka sugo nga mopanaw ngadto sa “kamingawan sa Damasco” aron sa pagdihog kang Hazael ingong hari sa Sirya. (1Ha 19:15) Ang pangunang karaan nga dakong dalan gikan sa Horeb paingon sa Damasco nahimutang sa S sa Jordan, bisan tuod nga usahay kining rutaha gikontrolar sa mga katawhan nga nagbalhinbalhin pagpuyo.

Apan, ang asoy sa paggukod ni Gideon sa mga Midianhon sa pagkatinuod nagpakita nga sila didto sa K (inay nga sa S) sa Jordan diha sa dapit nga gihisgotan sa Maghuhukom 7:22. (Tan-awa ang Huk 7:24.) Ug, bahin sa panaw ni Elias ngadto sa Kamingawan sa Damasco, ang rekord nagpakita nga wala kini himoa dihadiha, hinunoa, kini gihimo sa ulahi sa iyang manununod nga si Eliseo. (1Ha 19:15-19; 2Ha 8:7-13) Tungod niini, ang geograpikanhong mga sinulat nagpadayon sa pagrekomendar sa usa ka dapit sa K sa Jordan inay nga sa S niini. (The Geographical and Topographical Texts of the Old Testament, ni J. Simons, Leiden, 1959; The Geography of the Bible, ni D. Baly, 1957; ug ang Atlas of the Bible, ni L. H. Grollenberg, 1956) Si Jerome ug Eusebius sa unang mga siglo sa Komong Panahon parehong nagtuo nga ang Abel-mehola mao ang usa ka dapit nga 10 ka Romanhong milya (15 km; 9 mi) sa H sa Bet-sean (K sa Jordan). Ang The Land of the Bible, ni Y. Aharoni, nag-ingon: “Sa pagkakaron ang Abel-mehola gituohan nga mao gayod ang Tell Abu Sus sa [kasadpan nga] tampi sa Jordan, 15 km. sa habagatan sa Bet-sean.” (Gihubad ug giedit ni A. Rainey, 1979, p. 313) Ang kasikbit nga kapatagan sa Bet-sean maayo kaayo alang sa dinagkong pagpanguma.​—Itandi ang 1Ha 19:19.

Ang dugang timailhan nga nagpaluyo nga kining dapita nahimutang sa K sa Jordan mao ang kamatuoran nga ang Abel-mehola sa ulahi  nahimong bahin sa ikalimang distrito nga gigamhan ni Solomon ug gitala kini lakip sa ubang mga dapit sa K sa Jordan. (1Ha 4:12) Dayag nga mao kini ang pinuy-anan ni Adriel nga Meholahanon, usa ka umagad nga lalaki ni Saul. (1Sa 18:19; 2Sa 21:8) Tingali ginganlan kini ug Abel-mehola tungod sa masadyang mga pagsayaw panahon sa mga kasaulogan sa pagpangani.