Abi-ezer
[Ang (Akong) Amahan Usa ka Magtatabang].
1. Usa sa “mga anak nga lalaki ni Gilead” nga apo ni Manases, ang panganay ni Jose. Ang pagtandi sa mga asoy sa Numeros 26:28-30 ug Josue 17:1, 2 nagpakita nga siya gitawag usab ug Iezer (Jeezer, KJ), nga maoy pinamubo sa Abi-ezer, nga gitangtang ang “Ab” (amahan).
Si Abi-ezer maoy usa ka pangulo sa banay ug usa ka katigulangan ni Maghuhukom Gideon. (Huk 6:11, 24, 34; 8:2) Mopatim-aw nga human bahinbahina ang yuta alang sa matag tribo sa Israel, ang banay ni Abi-ezer sa sinugdan o kaha sa ulahi nanimuyo sa Opra, sa teritoryo sa Manases sa K sa Jordan.
Ang ngalan gigamit usab sa paghawas sa banay ni Abi-ezer sa katibuk-ang diwa.—Huk 8:2; tan-awa ang ABIEZERANHON.
2. Usa ka anak nga lalaki ni Hamoleket nga igsoong babaye sa apong lalaki ni Manases nga si Gilead. (1Cr 7:18) Gituohan sa pipila ka komentarista nga kini nga Abi-ezer mao ra ang Num. 1.
3. Usa ka Benjaminhon nga taga-Anatot, usa sa 37 ka labing maisog nga manggugubat ni Haring David. (2Sa 23:27, 39) Siya maoy pangulo sa usa ka balay sa amahan ug pangulo sa dibisyon sa 24,000 ka sundalo, nga nag-alagad sa hari sa ikasiyam nga bulan matag tuig. (1Cr 11:28; 27:1, 12) Duyog sa ubang mga Benjaminhon, pinaagi sa iyang kaisog sa pagpakiggubat iyang gituman ang tagna sa Genesis 49:27. Ang iyang lungsod sa Anatot nahimutang nga mga pipila ka milya sa AAS sa Jerusalem, sulod sa teritoryo sa Benjamin.—1Cr 6:60.