[Akong Amahan si Jehova].

Sa 2 Hari 18:2 makita ang Abi ingong pinamubo niining ngalana. Ang Abiam maoy laing porma niining ngalana nga makaplagan sa Masoretikong teksto sa 1 Hari 14:31; 15:​1, 7, 8. Apan, sa 1 Hari 14:31 mga 12 ka Hebreohanong mga manuskrito ug sa Bomberg nga edisyon sa Hebreohanong Bibliya ni Jacob ben Chayyim (1524-1525) mabasa ang “Abias.”

1. Usa ka apo ni Benjamin nga gitala nga ikapito sa siyam ka anak nga lalaki ni Beker.​—1Cr 7:8.

2. Sumala sa Masoretikong teksto, siya ang asawa ni Hesron nga apo ni Juda pinaagi sa iyang umagad nga babayeng si Tamar. Kini nga Abias lagmit mao ang inahan ni Ashur nga amahan ni Tekoa.​—1Cr 2:​4, 5, 24; tan-awa ang HESRON Num. 2.

3. Ang ikaduhang anak nga lalaki ni manalagnang Samuel, kinsa, duyog sa iyang magulang nga igsoong si Joel, gitudlo sa iyang tigulang nang amahan aron mahimong maghuhukom sa Israel didto sa Beer-seba. Tungod kay sila nagtuis sa paghukom, nagdawat ug mga hiphip, ug nangilkil ug dili-minatarong nga mga ganansiya, gipangayo sa mga ansiyano sa Israel nga si Samuel magtudlo ug usa ka hari ibabaw kanila.​—1Sa 8:1-5; 1Cr 6:28.

4. Usa ka saserdote nga kaliwat ni Aaron, kinsa nailhan sa adlaw ni Haring David ingong pangulo sa usa sa mga balay sa amahan sa Israel. Gibahinbahin ni David ang pagkasaserdote ngadto sa 24 ka dibisyon, nga ang matag dibisyon mag-alagad sa sangtuwaryo sulod sa usa ka semana kada unom ka bulan. Ang balay sa amahan ni Abias napili pinaagig ripa aron mangulo sa ikawalong dibisyon ug human niadto kini nailhan ingong “dibisyon ni Abias.” (1Cr 24:3-10; Luc 1:5) Busa ang saserdoteng si Zacarias, ang amahan ni Juan nga Tigbawtismo, giingong sakop sa “dibisyon ni Abias.”

5. Usa sa 28 ka anak nga lalaki ni Rehoboam, nga gitawag usab ug Abiam, kinsa nahimong ikaduhang hari sa duha-ka-tribo nga gingharian sa Juda ug naghari sukad sa 980 hangtod sa 978 W.K.P. (1Ha 14:31–​15:8) Usa siya ka harianong kaliwat ni David sa linya sa iyang amahan ug inahan, ang ika-16 nga kaliwatan gikan kang Abraham diha sa talaan sa harianong kagikan ni Jesu-Kristo. (1Cr 3:10; Mat 1:7) Sa 18 ka asawa ni Rehoboam ug 60 ka puyopuyo, si Maaca (gitawag ug Micaias sa 2 Cronicas 13:2), ang apong babaye ni Absalom, mao ang iyang labing minahal ug pinalabi kay sa ubang asawa pinaagi sa pagpili sa iyang anak nga lalaking si Abias ingong manununod sa trono, bisag siya dili mao ang panganayng anak nga lalaki ni Rehoboam.​—2Cr 11:20-22.

Sa dihang si Abias milingkod sa trono sa ika-18 nga tuig ni Haring Jeroboam I sa Israel, ang panagbatokay tali sa amihanan ug habagatang mga gingharian nagpadayon na usab, ug ang panaggubat nahitabo human niadto. Ang 800,000 ka manggugubat ni Jeroboam mihan-ay sa pagpakiggubat batok sa piniling kasundalohan sa Juda nga may gidaghanong 400,000 ka gamhanang tawong manggugubat. Wala mahadlok sa maong pagkadili-patas, si Abias mainitong namulong ngadto sa panon ni Jeroboam, nga nagsaway sa ilang idolatrosong pagsimba sa nating baka ug nagpahinumdom kanila nga ang pakigsaad ni Jehova kang David maoy alang sa usa ka walay-kataposang gingharian. “Nag-una uban kanamo ang matuod nga Diyos,” mipahayag si Abias, busa “ayaw pagpakig-away batok kang Jehova . . . kay kamo dili magmalamposon.”​—2Cr 12:16–​13:12.

Sa mapintas nga gubat nga nahitabo human niadto, ang pagbanhig ni Jeroboam gipakyas sa Diyos ug tunga sa milyon sa iyang mga tawo ang namatay, sa ingon nabuntog ang militaryong gahom ni Jeroboam. Bisan ang siyudad sa Bethel nailog, diin gipahimutang ang usa sa dulumtanang bulawan nga mga nating baka ug ang apostatang  mga saserdote. Kini tungod kay si Abias “misalig kang Jehova.” (2Cr 13:13-20) Bisan pa niana, si Abias nagpadayon sa paglakaw diha sa mga sala sa iyang amahan nga si Rehoboam pinaagi sa pagtugot nga ang hatag-as nga mga dapit, ang sagradong mga haligi, ug bisan ang mga lalaking pampam sa templo magpabilin diha sa yuta. “Ang iyang kasingkasing wala mabug-os uban kang Jehova nga iyang Diyos.” (1Ha 14:22-24; 15:3) Sa dihang buhi pa, nakabaton siyag 14 ka asawa ug 38 ka anak, ug sa pagkamatay niya ang iyang anak nga lalaking si Asa mipuli kaniya sa trono.​—2Cr 13:21; 14:1.

6. Ang anak nga lalaki ni Haring Jeroboam I sa Israel nga namatay samtang batan-on pa ingong paghukom gikan kang Jehova. Tungod sa pag-apostata ni Jeroboam, ang kagul-anan mihampak sa iyang balay, lakip na ang walay-kaayohang sakit sa batan-ong si Abias. Busa gisugo ni Jeroboam nga magtakoban ang iyang rayna ug gipaadto siya aron konsultahon ang tigulang ug buta nga manalagnang si Ahias didto sa Shilo. Apan si Jehova dili malimbongan. Pinaagi sa iyang manalagnang si Ahias, gipahayag ni Jehova nga Siya magapuo sa lalaking mga manununod ni Jeroboam “ingon sa usa nga magahinlo sa kinalibang hangtod nga kini mangawala.” (1Ha 14:10; 15:25-30) Bisan pa niana, si Abias lamang ang kaliwat ni Jeroboam nga gilubong sa dungganong paagi “tungod kay may butang nga maayo kang Jehova” nga nakaplagan diha kaniya.​—1Ha 14:1-18.

7. Ang asawa ni Haring Ahaz sa Juda ug ang inahan ni Haring Ezequias. Siya mao ang anak nga babaye ni Zacarias. Sa 2 Hari 18:2 gipamubo ang iyang ngalan ingong Abi.​—2Cr 29:1.

8. Usa sa mga pangulo sa banay sa mga saserdote sa mga adlaw ni Zorobabel ug Jesua human sa pagkadestiyero sa Babilonya. Si Abias gitala lakip sa kapin sa 20 ka “pangulo sa mga saserdote ug sa ilang kaigsoonan” nga namalik sa Jerusalem uban kang Zorobabel. (Neh 12:1-7) Lagmit gayod nga diha siya sa pagpahimutang sa patukoranan sa templo sa ikaduhang tuig sa dihang ang mga buluhaton sa mga saserdote giorganisar pag-usab. (Esd 3:8-10) Human sa usa ka kaliwatan, sa mga adlaw ni Joiakim ug Nehemias, gihawasan ni Zikri ang saserdotehanong banay ni Abias.​—Neh 12:​12, 17, 26.

9. Usa ka saserdote, o ang katigulangan sa usa ka tawo, kinsa, sa mga adlaw ni Nehemias, nakigbahin sa pagtimbre sa “kasaligang kontrata” o resolusyon ngadto kang Jehova. (Neh 9:38–​10:8) Kon mao ra kini nga Abias ang gitala ingong Num.  8, ingon sa gituohan sa pipila, nan posible gayod nga siya kapin na sa 100 ang panuigon.