[Ang (Akong) Amahan Naghimo sa Iyang Kaugalingon nga Malipayon].

1. Usa ka asawa ni David. Sa sinugdan, siya ang asawa sa adunahang si Nabal nga gikan sa Maon, usa ka siyudad daplin sa Kamingawan sa Juda, sa K sa Patayng Dagat. (1Sa 25:​2, 3; Jos 15:​20, 55) Siya “masinaboton ug matahom ug dagway,” samtang ang iyang bana, kansang ngalan nagkahulogang “Walay Salabotan; Hungog,” maoy “mapig-oton ug daotan sa iyang mga binuhatan.”

Human mamatay ang manalagnang si Samuel, si David ug ang iyang mga tawo mibalhin ngadto sa dapit diin gipasibsib ang panon sa kahayopan nga iya sa bana ni Abigail. Human niadto ang mga tawo ni David nahimong sama ug “paril” nga nagsalipod libot sa mga magbalantay ug sa panon sa kahayopan ni Nabal, adlaw ug gabii. Busa, sa dihang miabot ang panahon sa pagpang-alot, nagpadala si David ug pipila ka batan-ong lalaki sa pagtungas ngadto sa Carmelo aron sultihan si Nabal bahin sa ilang maayong serbisyo ug sa paghangyog pagkaon gikan kaniya. (1Sa 25:4-8, 15, 16) Apan naghinangol, gikasab-an sila ni Nabal ug giinsulto si David nga morag siya walay bili nga tawo, ug silang tanan nga daw ingon ug kagiw nga mga ulipon. (1Sa 25:9-11, 14) Nakapasuko kaayo kini kang David nga tungod niana siya mitakin sa iyang espada ug midalag mga 400 ka tawo paingon sa Carmelo aron patyon si Nabal ug ang mga tawo sa iyang panimalay.​—1Sa 25:​12, 13, 21, 22.

Si Abigail, sa pagkadungog sa panghitabo gikan sa usa ka sulugoong nahadlok, nagpakita sa iyang  maalamong pagsabot pinaagi sa pag-andam dayon ug daghang suplay sa pagkaon ug mga lugas ug gipadala kini nga una kaniya ubos sa pag-atiman sa iyang mga sulugoon, sama sa gihimo ni Jacob sa wala pa makigkita kang Esau. (1Sa 25:14-19; Gen 32:13-20) Nga wala magsaba sa iyang bana, siya miadto aron sa pagsugat kang David, ug pinaagi sa taas ug tim-os nga pangaliyupo, nga nagpadayag sa kaalam ug pagkamakataronganon ug usab pagtahod ug pagpaubos, iyang nakombinsir si David nga ang binuang nga mga pulong sa iyang bana wala magpakamatarong sa daotang pag-ula sa dugo o sa pagkapakyas sa pagsalig kang Jehova sa paghusay sa maong butang sa hustong paagi. (1Sa 25:14-20, 23-31) Si David nagpasalamat sa Diyos tungod sa kaalam ug sa daling aksiyon ni Abigail.​—1Sa 25:32-35; itandi ang Pr 25:​21, 22; 15:​1, 2.

Mibalik sa panimalay, naghulat si Abigail nga ang iyang bana mahuwasan sa kahubog gikan sa kombira ug dayon nagpahibalo kaniya sa iyang gipanghimo. Unya ang “iyang kasingkasing namatay sa sulod niya, ug siya nahisama sa usa ka bato,” ug human sa napulo ka adlaw si Jehova nagpatay kaniya. Sa dihang nabalitaan kini ni David, siya misakna nga makigminyo kang Abigail, nga niini wala magpanuko sa pagdawat si Abigail. Siya nakig-ambit sa pagmahal ni David uban kang Ahinoam, usa ka babayeng Jezreelinhon, kinsa sa miagi gikuha ni David ingong asawa. Ang unang asawa ni David, si Mikal, gihatag na ni Saul nga iyang amahan ngadto sa laing lalaki.​—1Sa 25:36-44.

Si Abigail kauban ni David didto sa Gat sa kasadpang daplin sa Sepela ug sa ulahi didto sa AK sa Negeb sa Ziklag. Sa dihang wala si David, ang misulong nga pundok sa mga Amalekanhon gikan sa H nagsunog sa Ziklag ug nagdala sa tanang babaye ug bata, lakip kang Abigail ug Ahinoam. Kay gipasaligan ni Jehova sa kalamposan, si David nanguna sa iyang mga tawo sa paggukod ug, pinaagi sa usa ka kalit nga pag-atake, nagbuntog sa mga Amalekanhon ug nagbawi sa mga binihag ug sa mga kabtangan.​—1Sa 30:​1-19.

Balik sa Ziklag, tulo ka adlaw sa ulahi, nakaabot ang balita bahin sa kamatayon ni Saul. (2Sa 1:​1, 2) Niadtong tungora si Abigail mikuyog sa iyang bana ngadto sa Hebron sa Juda, diin didto si David gidihogan ingong hari. Dinhi siya nanganak ug usa ka anak nga lalaki, si Kileab (2Sa 3:3), gitawag usab ug Daniel sa 1 Cronicas 3:1. Nahimong unom ang asawa ni David didto sa Hebron, ug wala na hisgoti pa si Abigail ni ang iyang anak diha sa asoy.​—2Sa 3:2-5.

2. Usa sa duha ka igsoong babaye ni David. (1Cr 2:13-17) Gituohan sa pipila ka eskolar nga siya igsoon sa inahan lamang ug dili sa amahan. Sa 2 Samuel 17:25 si Abigail gitawag nga “anak nga babaye ni Nahas.” Giingon sa rabbinikong tradisyon nga ang Nahas maoy usa lamang ka laing ngalan ni Jese, nga amahan ni David. Gigamit sa Gregong Septuagint (Lagardian nga edisyon) ang “Jese” inay ang “Nahas” niining bersikuloha. Ingon usab niini ang mabasa sa daghang modernong hubad. (Tan-awa ang AT; JB; NC [Kinatsila].) Hinunoa, angayng matikdan nga ang rekord sa 1 Cronicas 2:13-16 wala magtawag kang Abigail ug kang Zeruia ingong ‘mga anak nga babaye ni Jese’ apan hinuon “mga igsoong babaye” sa mga anak nga lalaki ni Jese, lakip kang David. Kini magtugot sa posibilidad nga ang ilang inahan naminyo una sa usa ka tawo nga ginganlag Nahas, nga kaniya siya nanganak kang Abigail ug Zeruia sa wala pa siya mahimong asawa ni Jese ug inahan sa iyang mga anak nga lalaki. Busa, dili gayod dogmatikong ikaingon nga si Abigail mao ang anak nga babaye ni Jese.​—Tan-awa ang NAHAS Num. 2.

Si Abigail nga igsoong babaye ni David gihisgotan nga nanganak sa usa lamang ka anak nga lalaki, si Amasa. Ang iyang bana gitawag ug Itra nga Israelinhon sa 2 Samuel 17:25 apan sa laing mga teksto gitawag ug Jeter (1Ha 2:​5, 32) ug sa 1 Cronicas 2:17 gihisgotan nga “Jeter nga Ismaelinhon.” (Tan-awa ang JETER Num. 6.) Malagmit nga si Abigail nakigminyo kang Jeter sa panahon nga si Jese ug ang iyang pamilya nagpuyo sa yuta sa Moab. (1Sa 22:​3, 4) Ang iyang anak nga lalaki, si Amasa, wala hatagig pagtagad sa panahon sa paghari ni David hangtod sa pagrebelde ni Absalom. Unya ang ig-agaw ni Amasa nga si Absalom naghimo kaniya nga pangulo sa iyang kasundalohan. Bisan pa niana, human mamatay si Absalom, ang igsoon ni Abigail nga si Haring David nakigsabot sa anak ni Abigail nga si Amasa aron suportahan siya sa iyang pagbalik sa trono, ug human niana naghimo kang Amasa nga pangulo sa kasundalohan puli kang Joab. (2Sa 19:11-14) Kini nga pagtudlo sa wala madugay maoy nakaingon sa kamatayon sa anak nga lalaki ni Abigail diha sa mga kamot sa iyang nayugot nga ig-agawng si Joab.​—2Sa 20:4-10.