[Siya Maoy Amahan].

Usa sa upat ka anak nga lalaki ni Aaron pinaagi sa iyang asawang si Eliseba; ang igsoon ni Nadab, Eleasar, ug Itamar. (Ex 6:23; 1Cr 6:3; 24:1) Natawo sa Ehipto, si Abihu, ingong ikaduhang anak nga lalaki ni Aaron, hamtong na panahon sa Pagpanggula, nga niadtong tungora 83 anyos na ang iyang amahan.​—Num 33:39.

Ingong magulang nga mga anak nga lalaki, si Nadab ug Abihu gitugotan ni Jehova nga mouban sa ilang amahan ug sa 70 ka ansiyano sa Israel sa pagtungas sa Bukid sa Sinai aron makita didto gikan sa halayo ang halangdong panan-awon sa himaya sa Diyos. (Ex 24:​1, 9-11) Gipasidunggan ni Jehova ang mga anak ni Aaron, gitudlo sila nga mag-alagad ingong mga saserdote uban sa ilang amahan, ang hataas nga saserdote, ug gimbut-an niya nga gikan sa taliwala kanila moabot ang manununod ni Aaron sa ulahi. Sila magsul-ob ug tag-as nga mga besti sa pagkasaserdote ug mga turong “alang sa himaya ug sa katahom.” Si Moises ‘magdihog kanila ug magpuno sa ilang kamot sa gahom ug magbalaan kanila’ alang sa ilang pag-alagad sa Diyos. (Ex 28:​1, 40-43) Mailaha ang pagkasaserdote “ingong usa ka lagda hangtod sa panahong walay tino.”​—Ex 29:​8, 9.

Human niana sila gilakip kanunay sa mga sugo sa Diyos bahin sa pagkasaserdote ug sa mga buluhaton niini. (Ex 29:10-46; 30:26-38) Labot pa, gipasiugda pag-ayo sa Diyos kanila, maingon man sa tibuok nasod, ang kahinungdanon sa pagtahod sa pagkabalaan sa mga butang nga nalangkit sa iyang pagsimba, apil ang halaran sa insenso ug ang mga kasangkapan alang niini. Ang ilang kinabuhi nagdepende sa ilang pagtahod sa mga regulasyon sa Diyos.

Karon, usa ka tuig human sa pagsugod sa Pagpanggula, miabot ang panahon sa pagtukod sa tabernakulo ug sa pagpahiluna sa katungdanan sa pagkasaserdote (1512 W.K.P.). Ang tibuok nasod nagtigom sa atubangan sa ganghaan sa tolda nga tagboanan alang sa mga seremonyas sa pagpahiluna sa katungdanan ug nakasaksi kang Aaron ug Abihu ug sa iyang mga igsoon nga gihinloan ug gipurongan, gidihogan ingong mga saserdote sa Diyos aron maghawas sa nasod atubangan Kaniya. Human niana ang mga saserdote nga bag-ong napahiluna sa katungdanan nagpabilin diha sa ganghaan sa tolda nga tagboanan sulod sa pito ka adlaw aron matapos ang pagpahiluna sa ilang katungdanan ug, ingon sa gipamulong ni Moises, “‘aron pun-on ang inyong kamot sa gahom.’ . . . Ug gibuhat ni Aaron ug sa iyang mga anak nga lalaki ang tanang butang nga gisugo ni Jehova pinaagi kang Moises.”​—Lev 8:1-3, 13-36.

Sa ikawalo nga adlaw si Aaron misugod sa iyang katungdanan, uban sa tabang ni Abihu ug sa iyang mga igsoong lalaki. (Lev 9:1-24) Ilang nasaksihan ang mahimayaong kapadayagan sa presensiya sa Diyos. Apan, mopatim-aw nga sa wala pa matapos ang adlaw, ang asoy nag-ingon nga “si Nadab ug si Abihu nagkuha ug nagdala sa ilang tagsatagsa ka insensaryo ug nagbutang ug kalayo niini nila ug nagbutang ug insenso diha niana, ug sila naghalad ug ginadili nga kalayo sa atubangan ni Jehova, nga wala niya isugo kanila. Niini usa ka kalayo migula gikan sa atubangan ni Jehova ug miut-ot kanila, mao nga sila namatay sa atubangan ni Jehova.” (Lev 10:​1, 2) Sa sugo ni Moises ang ilang patayng lawas gidala sa mga ig-agaw ni Aaron ngadto sa gawas sa kampo. Ang ilang amahan ug ang nahibiling mga igsoon gipinahan sa Diyos nga dili magbangotan  tungod sa ilang pagkamatay gikan sa kongregasyon.​—Lev 10:4-7.

Dihadiha human niana gipasidan-an sa Diyos si Aaron nga dili siya paimnon ug makahubog nga ilimnon o ang iyang mga anak nga lalaki sa panahon sa ilang pag-alagad sa tabernakulo, “aron dili kamo mamatay.” Nagkomento sa bersikulo 9, ang The Pentateuch and Haftorahs nag-ingon: “Ang mga Rabbi naglangkit sa panghitabo bahin ni Nadab ug Abihu uban niini nga sugo sa dili pag-inom sa makahubog nga mga ilimnon sa dili pa mohimog serbisyo sa Sangtuwaryo.” (Giedit ni J. H. Hertz, London, 1972, p. 446) Busa, ang pagkahubog lagmit nalangkit sa ilang grabeng sala, apan ang tinuod nga hinungdan sa ilang kamatayon mao ang paglapas sa kinahanglanon sa Diyos alang sa putling pagsimba pinaagi sa pagtanyag nila ug “ginadili nga kalayo . . . nga wala niya isugo kanila.”

Napahimuslan ni Abihu ang dakong kadungganan gikan sa Diyos ug ang talagsaong pagkaprominente atubangan sa tibuok nasod sa hamubong panahon; apan, kon tungod ba sa ambisyon, pagkamapahitas-on sa kaugalingon, o tungod sa pagpakamenos sa mga sugo sa Diyos, ang iyang pribilehiyo wala magdugay, ug siya namatay nga walay anak.​—Num 3:2-4; 26:​60, 61; 1Cr 24:​1, 2.