[Ang Akong Amahan Maoy Hari].

Usa ka personal nga ngalan o kaha usa ka opisyal nga titulo sa pipila ka Filistehanong mga hari, tingali sama sa titulong Paraon sa mga Ehiptohanon ug Cesar sa mga Romano.

1. Ang hari sa siyudad sa Gerar, diin temporaryong nanimuyo si Abraham ug Sara niadtong mga 1919 W.K.P. Kay naghunahuna nga ang magtiayon maoy managsoon, gikuha niya si Sara aron mahimong iyang asawa apan, tungod sa pagbuot sa Diyos, wala niya siya hilabti. Kay gipasidan-an ni Jehova pinaagi sa damgo, si Sara giuli sa hari ngadto kang Abraham uban ang bayad nga kahayopan ug mga ulipon, ug dugang pa, usa ka libong siklo nga plata (mga $2,200) ingong garantiya nga si Sara wala unsaa. Sa ulahi kini nga hari naghimog pakigsaad sa pakigdait ug pagsalig uban kang Abraham didto sa Beer-seba.​—Gen 20:1-18; 21:22-34.

2. Lagmit nga lain pang hari sa Gerar sa dihang si Isaac miadto didto tungod sa usa ka gutom. Kadto maoy human mamatay si Abraham niadtong 1843 W.K.P. Si Isaac, sama sa iyang amahang si Abraham, misulay sa pagpatuo nga si Rebeca iyang igsoon, apan sa dihang ang hari, nga wala tuyoa, nakadiskitar nga siya asawa diay ni Isaac, siya nagpagula ug sugo sa publiko nga naghatag kanila ug proteksiyon. Apan, ang hinatag-sa-Diyos nga kauswagan ni Isaac nahimong hinungdan sa kasina, ug busa ang hari mihangyo kang Isaac nga siya mobalhin. Sa ulahi kini nga hari sa Gerar naghimog pakigsaad sa pakigdait uban kang Isaac sama sa pakigsaad nga gihimo uban kang Abraham niadtong hari nga nauna pa kaniya.​—Gen 26:1-31.

3. Ang Filistehanong hari sa siyudad sa Gat sa adlaw ni David.​—Sal 34:Sup; tan-awa ang AKIS.

4. Anak nga lalaki ni Maghuhukom Gideon nga gipanganak sa iyang puyopuyo sa Sekem. Human mamatay ang iyang amahan, si Abimelek mapangahasong nagtinguha sa paghimo sa iyang kaugalingon nga hari. Sa malinglahong paagi, siya midangop sa mga tag-iyag yuta sa Sekem pinaagi sa impluwensiyadong banay sa iyang inahan. Sa dihang nabatonan na ang ilang pinansiyal nga tabang siya nagsuhol ug mga bugoy, nga miadto sa balay sa iyang amahan sa Opra, ug didto gipamatay ang iyang mga igsoon-sa-amahan ibabaw sa usa ka bato. Sa 70 ka igsoon-sa-amahan, si Jotam lamang nga kamanghoran ang nakaikyas sa maong pagpamatay.

Unya si Abimelek giproklamar nga hari, apan si Jehova nagtugot nga motungha ang usa ka daotang espiritu tali sa mga Sekemnon ug sa ilang  bag-ong “hari,” aron mapanimaslan ang pagkasad-an sa dugo niadtong tanan nga nalangkit sa panagkunsabo. Ang pag-alsa giorganisar ni Gaal. Dihadiha gisumpo kini ni Abimelek, giilog ug gilaglag ang siyudad sa Sekem, ug gisabwagan kini ug asin. Unya iyang gisulong ang inarkong lawak nga tagoanan sa balay o sangtuwaryo ni El-berit ug gisunog kini sa kalayo, ug sa maong pagsunog mga usa ka libo sa iyang kanhing mga kakunsabo, ang mga tag-iyag yuta sa torre sa Sekem nga midangop didto, ang nangasunog hangtod nga namatay. Gisundan dayon ni Abimelek kini nga kalamposan pinaagi sa pag-atake sa Tebes sa A, apan ang usa ka babaye nga didto sa ibabaw sa torre sa siyudad naghulog ug pang-ibabaw nga bato sa galingan nganha sa iyang ulo. Ang tulo-ka-tuig nga “paghari” ni Abimelek natapos sa dihang ang iyang tigdala sa armadura, agig pagsunod sa iyang hangyo sa dihang siya himalatyon na, nagdunggab kaniya sa espada, aron dili ingnon nga usa ka babaye ang nakapatay kaniya.​—Huk 8:​30, 31; 9:1-57; 2Sa 11:21.

5. Sa Masoretikong teksto, nga gisundog sa King James Version, mabasa ang “Abimelek” sa 1 Cronicas 18:16. Sa Gregong Septuagint, Latin nga Vulgate, Syriac nga Peshitta, ug sa 12 ka Hebreohanong mga manuskrito mabasa ang “Ahimelek,” nga uyon sa 2 Samuel 8:17.