[Ang Amahan Andam (Hamili; Mahinatagon)].

1. Usa ka molupyo sa siyudad sa Kiriat-jearim sa teritoryo sa Juda nga mga 14 km (8.5 mi) sa KAK sa Jerusalem, ug sa iyang balay gitipigan ang arka sa pakigsaad sulod sa usa ka panahon.

Sa dihang ang sagradong Arka gidala gikan sa Bet-semes human sa makatalagmanong pito-ka-bulan nga pag-estar niini taliwala sa mga Filistehanon, gibutang kini sa balay ni Abinadab, ug ang iyang anak nga lalaking si Eleasar gibalaan aron sa pagbantay niini. Dinhi niini nga balay nagpabilin ang Arka sulod sa mga 70 ka tuig, hangtod nga gihikay ni David nga ibalhin kini sa Jerusalem. Panahon sa pagbalhin, ang laing anak nga lalaki ni Abinadab nga si Uzah, dihadiha namatay sa dihang ang kasuko ni Jehova misilaob batok kaniya tungod sa paghikap niya sa Arka nga wala manumbaling sa sugo sa Numeros 4:15.​—1Sa 6:20–​7:1; 2Sa 6:​1-7; 1Cr 13:6-10.

2. Ang ikaduhang anak nga lalaki ni Jese, ug usa sa tulo ka magulang ni David nga miadto sa pagpakiggubat uban kang Saul batok sa mga Filistehanon.​—1Sa 16:8; 17:13.

3. Usa sa mga anak nga lalaki ni Haring Saul nga gipatay sa mga Filistehanon didto sa Bukid sa Gilboa.​—1Sa 31:2; 1Cr 9:39.

4. Ang amahan sa usa sa 12 ka luyoluyo ni Haring Solomon nga gitugyanan sa pagtaganag mga pagkaon. Kining tinudlong luyoluyo nga “anak nga lalaki ni Abinadab,” kinsa gitawag usab ug Ben-abinadab, naminyo sa anak nga babaye ni Solomon nga si Tapat, ug gitudlo sa pagtaganag pagkaon alang sa panimalay ni Solomon usa ka bulan sulod sa usa ka tuig gikan sa tanang tagaytay sa Dor.​—1Ha 4:​7, 11.