Usa sa upat ka siyudad nga gitukod ni Nimrod nga naglangkob sa “sinugdan sa iyang gingharian.” (Gen 10:10) Ang Acad (Akad) gituohan nga mao ang karaang siyudad sa Agade. Dili tino ang eksaktong lokasyon niini.

Ang ngalang Akad gigamit usab sa pagtumong sa tibuok amihanang rehiyon sa gitawag sa ulahi nga Babilonya. Mopatim-aw nga ang Akad nailado ingong ang panguna o harianong siyudad sa maong rehiyon ilalom ni Sargon I (dili ang Sargon sa Isa 20:1). Ang habagatang rehiyon sa Mesopotamia nailhan ingong Sumer. Ang Babilonya naggikan niining duha ka dapit, ug diha sa Babilonyanhong mga teksto ang mga magmamando niini gitawag gihapon ug “hari sa Akad” hangtod sa panahon sa pagkapukan sa Babilonya niadtong 539 W.K.P. Diha sa Silindro ni Ciro, ang mananakop sa Babilonya mipuli sa paghupot sa titulong “Hari sa Babilonya, hari sa Sumer ug Akad.”

Ang mga Akadianhon daw nakalabaw sa mga Sumerianhon diha sa maayong pagpangulit ug sa makuting pagtabas sa mga panit sa poka. Ang ngalang Akadianhon (Acadianhon) karong adlawa gigamit sa paghubit sa karaang mga pinulongan sa Asirya ug Babilonya.