[sa Heb., kini kaamgid sa ngalang Akar, nga nagkahulogang “Nagdalag Pagkasinalikway (Kasamok)”].

Ang anak nga lalaki ni Carmi sa panimalay ni Zabdi sa banay ni Zera sa tribo ni Juda; gitawag usab ug Akar.​—1Cr 2:7.

Sa dihang ang mga Israelinhon mitabok sa Jordan, tin-awng nagsugo si Jehova nga ang unang mga bunga sa kadaogan, ang siyudad sa Jerico, “mahimo gayod nga usa ka butang nga gikatugyan sa kalaglagan; . . . kini iya ni Jehova.” Ang plata ug bulawan niini ihatag sa tipiganan sa bahandi ni Jehova. (Jos 6:​17, 19) Apan, sa pagkakita ni Acan sa mahalong besti gikan sa Sinar ug sa 50-ka-siklo  nga baretang bulawan (nagkantidad ug mga $6,400) ug sa 200 ka siklo nga plata ($440), kini iyang gitagoan sa ilalom sa iyang tolda. (Jos 7:21) Sa pagkatinuod siya nangawat sa Diyos! Tungod sa paglapas niining tin-awng mga sugo ni Jehova, sa dihang giatake ang sunod nga siyudad sa Ai, gihikaw ni Jehova ang iyang panalangin, ug ang Israel gipakalagiw. Kinsa ang sad-an? Walay usa nga mitug-an. Dayon ang tibuok Israel gipaatubang sa paghusay. Tribo por tribo, dayon banay por banay sa tribo ni Juda, ug sa kataposan, tawo por tawo sa balay ni Zabdi, sila miagi sa atubangan ni Jehova hangtod nga “napili” si Acan. (Jos 7:4-18) Ayha pa siya miangkon sa iyang sala. Ang silot nga kamatayon gipahamtang dayon human niana. Si Acan, ang iyang banay (nga imposibleng walay kalibotan sa iyang gihimo), ug ang iyang kahayopan gibato una hangtod namatay, ug dayon gisunog sa kalayo, apil ang tanan niyang mga kabtangan, didto sa Walog sa Akor, nga nagkahulogang “Pagkasinalikway; Kasamok.”​—Jos 7:19-26.