Sa wala pa mailog sa Roma niadtong 146 W.K.P., ang Acaya nagtumong lamang sa usa ka gamayng rehiyon sa Peloponnesus, nga miabot hangtod sa habagatang kabaybayonan sa Gulpo sa Corinto, diha sa lokasyon nga susama sa nahimutangan karong adlawa sa dapit nga may samang ngalan.

Sa mga balak ni Homer ang mga Grego sa katibuk-an gitawag ug mga Acayanhon. Tungod sa pagkailado sa Acayanhong Liga nga usa ka panag-abin sa mga siyudad, ug sanglit kini ang labing gamhanan nga partido sa politika sa Gresya sa panahong nailog kini, ang mga Romano human niadto sagad nagtawag sa tibuok Gresya ingong Acaya.

Niadtong 27 W.K.P., sa dihang giorganisar pag-usab ni Cesar Agusto ang duha ka lalawigan sa Gresya, ang Macedonia ug Acaya, ang ngalang Acaya human niadto gipadapat sa tibuok Peloponnesus ug sa usa ka bahin sa kontinente sa Gresya. Ang lalawigan sa Acaya nailalom sa pagdumala sa Romanhong Senado ug gimandoan sa usa ka prokonsul gikan sa kaulohan niini, ang Corinto. (2Co 1:1) Ang ubang mga siyudad sa lalawigan sa Acaya nga gihisgotan diha sa Kristohanon Gregong Kasulatan mao ang Atenas ug Cencrea. Ang Acaya ug ang silingang lalawigan niini dapit sa A, ang Macedonia, sagad nga kaubang gihisgotan diha sa naandang paggamit.​—Buh 18:​1, 18; 19:21; Rom 15:26; 16:1; 1Te 1:​7, 8.

Sa tuig 15 K.P., agig sanong sa mga reklamo tungod sa kadako sa buluhisan, gipailalom ni Tiberio ang Acaya ug Macedonia sa pagmando sa imperyo, nga pagamandoan gikan sa lalawigan sa Moesia. Nagpadayon kini hangtod sa 44 K.P. sa dihang gipasig-uli ni Emperador Claudio ang mga lalawigan ngadto sa pagmando sa senado, sa ingon usa ka prokonsul na usab ang nagmando sa Corinto. Tungod kay wala masayod niini, ang pipila ka kritiko kaniadto misupak sa paghisgot sa Bibliya kang Galio ingong ang “prokonsul sa Acaya,” nga atubangan kaniya gidala si Pablo. (Buh 18:12) Apan, ang pagkadiskobre sa usa ka inskripsiyon didto sa Delphi nagpadayag nga diha gayoy usa ka prokonsul sa Acaya nga ginganlan ug Galio sa dihang gihubit kini sa historyador nga si Lucas, ang magsusulat sa Mga Buhat.​—Tan-awa ang GALIO.

Sa Roma 15:26 gihisgotan ni apostol Pablo ang pagkamahinatagon sa mga Kristohanon sa lalawigan sa Acaya sa pagtaganag tabang alang sa ilang kabos nga mga igsoon sa Jerusalem. Sa panahon sa ikaduha ug ikatulo nga misyonaryong mga panaw ni Pablo, ang dakong bahin sa iyang panahon iyang gigugol didto sa Acaya, ug iyang gipahayag ang iyang dakong gugma sa mga igsoon sa maong rehiyon.​—2Co 11:10.