Ang ngalan o titulo nga gigamit dili sa usa lamang ka hari sa mga Amalekanhon.

1. Si Balaam, sa iyang ikatulong matagnaon nga pamulong, mitagna nga ang usa ka hari sa Israel mahimong “labaw pa kay kang Agag, ug ang iyang gingharian pagabayawon.” (Num 24:7) Kining mga pulonga gitagna niadtong mga 1473 W.K.P., ug wala nay misunod nga paghisgot bahin kang Agag hangtod sa paghari ni Haring Saul (1117-1078 W.K.P.). Tungod niini ang pipila ka eskolar nagtuo nga ang “Agag” maoy usa ka titulo nga gigamit sa mga hari sa mga Amalekanhon sama sa titulong Paraon nga gigamit sa mga hari sa Ehipto. Lagmit usab nga kini usa lamang ka sublisubli nga paggamit sa usa ka personal nga ngalan. Bisan pa niana, ang paagi sa paghisgot ni Balaam kang Agag nagpakita nga ang iyang gingharian gamhanan niadtong panahona.​—Num 24:20; tan-awa ang AMALEK, AMALEKANHON.

2. Ang hari sa Amalek nga gipildi ni Haring Saul ingong katumanan sa mando ni Jehova. (Ex 17:14; Deu 25:17-19; 1Sa 15:1-7) Apan, si Saul wala magpatay kang Agag ug nagtugot sa katawhan sa pagtipig sa ubang mga inagaw, ug tungod niini gipahayag ni Samuel nga ang Diyos nagsalikway kang Saul ingong hari. (1Sa 15:8-29) Unya si Agag gipatay ni Samuel, kinsa miingon kaniya: “Ingon nga pinaagi sa imong espada namatyan ug mga anak ang mga babaye, sa ingon usab niana ang imong inahan labaw nga mamatyan ug mga anak taliwala sa mga babaye.”​—1Sa 15:​32, 33; itandi ang Huk 1:5-7.