Sa dihang, ingong resulta sa iyang pag-apelar kang Cesar, si apostol Pablo gipadala sa Roma, siya gitugyan ngadto sa usa ka opisyal sa kasundalohan (senturyon) nga ginganlag Julio sa “pundok ni Agusto.” (Buh 27:1) Ang pagbalhin kang Pablo ug sa ubang mga binilanggo ngadto sa pag-atiman sa opisyal sa kasundalohan nahitabo didto sa Cesarea.​—Buh 25:13; 26:30–​27:1.

Imposibleng mailhan sa tino ang “pundok ni Agusto” nga niana naggikan si Julio. Tungod kay ang pulong nga “Agusto” dinhi maoy hubad sa Gregong pulong nga Se·ba·steʹ, miergo ang pipila nga kini nga pundok naggikan sa Samaria, nga nianang panahona gitawag ug Sebaste, ug busa sila nangangkon nga kini maoy usa ka pundok sa mga sundalo nga girekluta gikan sa Samaria. Si Josephus naghisgot sa “usa ka tropa sa mga mangangabayo nga nailhang ‘mga Sebasteniano.’” (The Jewish War, II, 236 [xii, 5]) Apan, walay igong katarongan nga gamiton ang maong ngalan alang niini nga termino ingon sa paggamit sa magsusulat sa Mga Buhat.

Ang lain nga panglantaw mao nga kining pundok ni Agusto nagtumong sa frumentarii, usa ka linain nga pundok sa mga opisyal sa imperyo nga nag-alagad ingong tigpataliwala nga ahensiya sa mga mensahero tali sa emperador ug sa mga hugpong sa kasundalohan sa mga lalawigan, ug kansang mga membro giingon nga maoy tighatod sa mga binilanggo. Kini nga panglantaw, nga sa usa ka bahin gipaluyohan sa hubad sa King James Version sa Buhat 28:​16, naglakip sa kaduhaduhaang bahin nga nag-ingon nga “ang senturyon naghatod sa mga binilanggo ngadto sa kapitan sa mga guwardiya.” Kadtong nagduso niini nga panglantaw naghunahuna nga kining “kapitan sa mga guwardiya” mao ang pangulo sa mga frumentarii.  Apan, kini nga prase dili makita diha sa labing modernong mga hubad sa maong bersikulo.

Ang Revised Standard Version nagtawag niini nga pundok ingong “Dibisyon ni Agusto,” sama sa pagtawag niini sa daghang ubang mga hubad. Ang Gregong pulong nga speiʹra (pundok), kon gamiton sa militaryong diwa, sagad nagtumong sa usa ka Romanhong manipulus, usa ka kampo nga katumbas sa duha ka “senturya (1 senturya = 100 ka sundalo).” Hinuon, ang termino gigamit usab alang sa mas dakong hugpong sa mga sundalo ug, sama sa paggamit sa Gregong Kasulatan, gituohan nga naghawas kini sa usa ka Romanhong “dibisyon” (ang ikanapulong bahin sa usa ka lehiyon, nga may mga 400 ngadto sa mga 600 ka sundalo). Gawas pa sa naandang Romanhong mga lehiyon nga gilangkoban sa Romanong mga lungsoranon ug gibahin ngadto sa mga dibisyon, dihay segundaryong mga tropa sa kasundalohan o auxilia nga gilangkoban sa mga dibisyon nga girekluta taliwala sa Romanong mga sakop (dili mga lungsoranon). Kini maoy independenteng mga yunit sa kasundalohan ug sagad nga nag-alagad diha sa mga utlanan sa imperyo. Bisan tuod ang mga dibisyon sa naandang Romanhong mga lehiyon wala hatagig linaing mga ngalan, kining segundaryong mga dibisyon sagad ginganlan. Ang mga inskripsiyon nakaplagan labot sa Cohors I Augusta (Lat.) ug sa Speiʹra Au·gouʹste (Gr.), bisan tuod wala gayod ilangkit sa pundok nga gihisgotan.