[Heb., shu·mimʹ (plural)].

Usa ka bulbo, manggibuhion nga tanom (Allium sativum), nga ang isog nga alimyon, halang nga bulbo niini moabot hangtod sa 20 ka mas gagmayng bulbo o mga lusok. Ang lindog sa bulak sa ahos, nga adunay gagming nga mga bulbo ug walay-binhi nga mga bulak, usahay moabot sa gitas-on nga 0.3 m (1 p) o kapin pa.

Ang mga timailhan nagpakita nga ang ahos lukop nga gitanom sa karaang Ehipto. Sa kamingawan ang nagkasagol nga panon sa katawhan ug ang mga Israelinhon nangandoy sa ahos nga ilang gikaon didto. (Num 11:​4, 5) Ang Gregong historyador nga si Herodotus (II, 125) naghisgot bahin sa usa ka inskripsiyon nga nagtala sa ahos ingong usa sa mga pagkaon nga gitagana alang sa mga trabahante sa usa ka piramide. Ang ahos kaylap gihapon nga gigamit sa mga molupyo sa mga dapit sa Mediteranyo. Sa Mishnah (Nedarim 3:10), gihisgotan sa mga Hudiyo ang ilang kaugalingon ingong mga tigkaon ug ahos. Ang ahos gigamit nga tambal ingong pangpahilis, ingong antibiotiko, ug ingong pang-alibyo sa pagpangurog sa kaunoran.