[Malimbongong Dapit].

Ang ngalan sa duha ka siyudad.

1. Usa ka siyudad sa habagatang bahin sa Yutang Saad diha sa teritoryo sa Juda. (Jos 15:44) Gituohan nga mao ra kini ang “Chezib” (Gen 38:​5, KJ), ang dapit nga natawhan sa anak nga lalaki ni Juda nga si Sela. Gipakita sa Josue 15:33 nga kini anaa sa kabungtoran sa Sepela, ug gituohan nga lagmit mao kini ang Tell el-Beida (Horvat Lavnin) nga 5 km (3 mi) sa KHK sa Adulam. Ang Lakis, Moreset-gat, ug Maresah (gihisgotan uban sa Akzib diha sa Miq 1:13-15) anaa tanan sa maong dapit. Ang Cozeba sa 1 Cronicas 4:​22 giisip sa kadaghanan nga mao ra ang Akzib.

2. Usa ka siyudad daplin sa baybayon sa Fenicia diha sa teritoryo sa tribo ni Aser. (Jos 19:29) Apan, si Aser wala gayod molampos sa pagsakop niini, ni sa mas iladong siyudad sa Aco (Acre) sa H, tingali tungod sa pagbabag sa mga barkong iggugubat sa Fenicia. (Huk 1:​31, 32) Si Senakerib sa Asirya nagparot niini sa panahon ni Haring Ezequias ug naghisgot niini diha sa iyang mga talaan sa kasaysayan ubos sa ngalang Akzibi. Sa Grego ug Romanhon nga kapanahonan kini gitawag nga Ecdippa. Gituohan nga mao kini ang ez-Zib (Tel Akhziv), mga 14 km (9 mi) sa A sa Aco sa bokana sa Wadi Qarn (Nahal Keziv).