Pangunang siyudad ug iladong kaulohan sa Ehipto sa panahon ni Jesus ug sa iyang mga apostoles. Ang modernong Alejandria (gitawag nga Al-Iskandariyah sa Arabiko) nahimutang diha sa karaang lugar niini ug maoy usa ka dunggoanan, apan wala na kaayoy makita nga ilhanan sa karaang siyudad.

Ang ngalan sa siyudad gikuha gikan kang Alejandrong Bantogan, nga maoy nagtukod niini niadtong 332 o 331 W.K.P. Sa ulahi kini nahimong pangunang siyudad sa Ehipto, ug ilalom sa pagmando sa mga Ptolemy, ang Helenistikong mga hari sa Ehipto, ang Alejandria gihimong kaulohan sa Ehipto. Kini nagpabiling kaulohan sa dihang ang Roma nagmando niini niadtong 30 W.K.P. ug nahimong sentro sa pagdumala sa Ehipto nga nagpadayon latas sa Romanhon ug Byzantino nga mga panahon hangtod nga gisakop kini sa mga Arabo niadtong ikapitong siglo K.P.

Sa dugayng panahon ang mga Hudiyo naglangkob sa dakong bahin sa populasyon sa Alejandria, nga ang kinadaghanan niini nakaabot tingali ug 500,000 ka tawo. Daghan sa maong mga Hudiyo maoy mga kaliwat sa mga kagiw nga midangop sa Ehipto human mapukan ang Jerusalem niadtong 607 W.K.P. Sa panahon ni Tiberio gikaingon nga sila naglangkob sa mga un-tersiya sa bug-os nga populasyon sa siyudad. Uban sa ilang kaugalingong seksiyon o kuwartel sa AS nga bahin sa siyudad, ang mga Hudiyo gitugotan sa pagkinabuhi sumala sa ilang kaugalingong mga balaod ug nakabaton ug kaugalingong gobernador.

Dinhi sa Alejandria gibuhat ang Gregong Septuagint, ang unang hubad sa Hebreohanong Kasulatan. Gibuhat kini sa mga Hudiyo sa Alejandria, lagmit sa sinugdanan sa paghari ni Ptolemy (II) Philadelphus (285-246 W.K.P.).

Mubo lamang ang paghisgot sa Alejandria diha sa Bibliya. Lakip niadtong nakiglalis kang Esteban sa wala pa ang iyang husay maoy “mga taga-Alejandria,” o mga Hudiyo nga naggikan sa Alejandria. Ang Alejandria mao ang siyudad nga natawhan sa larinong manulti nga si Apolos. Ug ang duha sa mga barko nga gisakyan ni Pablo sa iyang panaw paingon sa Roma ingong binilanggo maoy gikan sa Alejandria, walay duhaduhang dagko nga mga barko nga tigkarga ug mga lugas gikan sa bantog nga panon sa mga barko sa Alejandria nga mitabok sa Dagat Mediteranyo ngadto sa Puteoli, Italya, bisan tuod may mga panahon nga namidpid kini sa mga baybayon paingon sa mga dunggoanan sa Asia Minor.​—Buh 6:9; 18:24; 27:6; 28:11.