[Heb., ʼal·gum·mimʹ (2Cr 2:8; 9:​10, 11); ʼal·mug·gimʹ (1Ha 10:​11, 12)].

Usa ka kahoy nga gilakip ni Solomon sa iyang gihangyo nga mga kahoy kang Hiram sa Tiro aron gamiton sa pagtukod sa templo ug sa paghimog mga hagdanan, mga tukod, ingon man mga alpa ug kinuldasang mga tulonggon.

 Ang kahoyng algum niini nga asoy dili gayod matino. Gituohan sa kadaghanan nga kini mao ang pulang sandalwood (Pterocarpus santalinus) nga karon makaplagan sa India ug Sri Lanka, bisan tuod nga mas gipaboran sa uban nga kini mao ang puting sandalwood (Santalum album), tingali tungod sa giingon ni Josephus nga kini pution ug bulok. (Jewish Antiquities, VIII, 177 [vii, 1]) Ang pulang sandalwood modako sa gitas-ong mga 7.5 hangtod sa 9 m (25 hangtod sa 30 p) ug may gahi, pinog-grano, pulahon-kape nga kahoy nga mahimong pasinawon pag-ayo. Gisugyot nga maayo kining himoon nga mga instrumento sa musika ilabina sa matang sa mga instrumento nga gihisgotan diha sa asoy sa Bibliya. Ang kahoy adunay humot nga alimyon ug dili daling bukbokon.

Ang pulang sandalwood wala na motubo sa Lebanon sa presenteng panahon. Apan, ang rekord dili tino kon ang mga kahoyng “algum” maoy lumad ba o dili sa Lebanon. Bisan pa niana, nakita ni Hiram sa ulahi nga angayng kuhaon kini gikan sa Opir, ug dinhi na usab ang mga kahoy mahimong giimportar bisan sa Opir, sanglit kini mao ang sentro sa negosyo nga nakiglabot sa India, Ehipto, ug sa ubang mga dapit sa Aprika. (1Ha 10:​11, 22) Ang kanihit ug kabililhon sa kahoy nga gidala ni Hiram gipakita sa mga pulong nga “walay ingon niini nga mga kahoyng algum nga miabot ni nakita hangtod niining adlawa.”​—1Ha 10:12.