[Heb., ʽalu·qahʹ].

Usa ka ulod nga mosupsop ug dugo nga may lapad, naggulotgulot nga lawas nga gamay ang isigkatumoy apan kinalaparan ang dapit sa pangulahiang bahin. Ang mga alimatok mosukod ug kapin sa 1 sm (0.5 pul.) ngadto sa kapin sa 10 sm (4 pul.) ang gitas-on. Kini nga mga linalang adunay sangkap nga igsusupsop diha sa isigkatumoy sa lawas, nga ang usa nga anaa sa tumoy sa ulo adunay samag mga apapangig nga gigamit sa pagpaak.

Daghan kaayong alimatok ang makaplagan sa daghang kasapaan ug kasubaan sa Tungang Sidlakan. Ang mga anak sa usa ka matang niini (Limnatis nilotica), sa dihang maapil sa pag-inom, motapot sa mga lungag sa ilong, tutonlan, o sa epiglottis (usa ka bahin sa tutonlan) sa ilang gitaptan. Kusog kining managko ug lisod nga kuhaon. Ang pagtapot niini sa maong mga bahin sa lawas makabara sa pagginhawa ug kini, ingon man ang pagkahurot sa dugo, makapatay usahay sa biktima.

Gihisgotan lamang ang alimatok (Heb., ʽalu·qahʹ) diha sa Proverbio 30:​15 diin kini nagtumong sa walay katagbawan nga kahakog, nga giingong “ang mga alimatok adunay duha ka anak nga babaye nga nagasinggit: ‘Panghatag! Panghatag!’” Ang Commentary ni F. C. Cook nagsugyot nga ang kahakog sa alimatok gilantaw dinhi ingong “anak nga babaye niini,” nga gihisgotan nga plural agig pagpasiugda. Giisip sa uban nga ang “duha ka anak nga babaye” nagtumong sa duha ka ngabil sa sangkap nga igsusupsop ug dugo. Ang usa ka alimatok mahimong mosuyop ug dugo nga tulo ka pilo sa gibug-aton niini, ug tungod sa isog nga substansiya nga mopugong sa pagbagtok sa dugo nga anaa sa laway niini, padayong moagos ang dugo gikan sa biktima.