[gikan sa Heb., nga nagkahulogang “Pabor; Puangod”].

1. Inahan sa manalagna nga si Samuel. Si Ana nagpuyo uban sa iyang Levihanong bana nga si  Elkana ug sa laing asawa ni Elkana nga si Penina didto sa Ramataim-zopim sa bukirong rehiyon sa Epraim. Bisan pa sa dugayng pagkaapuli ni Ana, kon itandi kang Penina nga nanganak ug ubay-ubayng mga anak, si Ana mao gihapon ang mas gihigugmang asawa ni Elkana. Gibiaybiay ni Penina si Ana tungod sa iyang pagkaapuli, ilabina sa dihang gidala ni Elkana ang iyang pamilya alang sa ilang tinuig nga pag-adto sa tabernakulo sa Shilo.​—1Sa 1:1-8.

Sa usa ka pag-adto sa Shilo, si Ana nanumpa kang Jehova nga kon siya manganak ug usa ka anak nga lalaki, iyang ihatag siya kang Jehova, sa pag-alagad Kaniya. Sa pagkakita sa iyang mga ngabil nga nagkibotkibot samtang siya hilom nga nag-ampo, ang Hataas nga Saserdoteng si Eli sa sinugdan nagduda nga siya nakainom ug daghang bino ug nahubog. Apan sa pagkahibalo sa iyang kaugdang ug katim-os, iyang gipanghinaot nga ihatag ni Jehova nga Diyos ang iyang gihangyo. Tuod man, sa wala madugay siya nagmabdos. Human manganak kang Samuel, wala siya moadto pag-usab sa Shilo hangtod nga nalutas si Samuel. Dayon iyang gitanyag siya kang Jehova ingon sa iyang gisaad, nga nagdalag halad nga naglakip sa tulo-ka-tuig nga torong baka, usa ka ephah nga harina, ug usa ka tadyaw nga bino. (1Sa 1:9-28) Matag tuig sukad niadto, sa dihang siya moadto sa Shilo, si Ana magdala ug bag-ong kupo nga walay bukton alang sa iyang anak. Gipanalanginan siya pag-usab ni Eli, ug gibuksan pag-usab ni Jehova ang iyang tagoangkan mao nga sa paglabay sa panahon siya nanganak ug tulo ka anak nga lalaki ug duha ka anak nga babaye.​—1Sa 2:18-21.

Makita diha kang Ana ang ubay-ubayng tilinguhaong mga hiyas. Siya mainampoon ug mapainubsanon, ug siya nagtinguha sa pagpahimuot sa iyang bana. Matag tuig siya miuban kaniya aron sa paghalad didto sa tabernakulo. Siya nagsakripisyo gayod, nga nagtugot nga mahilayo ang iyang anak, aron tumanon ang iyang pulong ug ipakita ang pagpabili sa kalulot ni Jehova. Padayon niyang gipakita ang iyang gugma ingong inahan, ingon sa gipadayag sa iyang paghimog usa ka bag-ong kupo nga walay bukton alang kang Samuel matag tuig. Ang mga hunahuna nga gipahayag diha sa iyang awit sa pagpasalamat, sa dihang siya ug si Elkana nagtanyag kang Samuel sa pag-alagad sa templo, maoy sama sa mga hunahuna nga gipatugbaw ni Maria wala madugay human mahibalo nga siya mahimong inahan sa Mesiyas.​—Luc 1:46-55.

2. Usa ka babayeng manalagna nga anak ni Fanuel sa tribo ni Aser.

Si Ana nabiyuda human lamang sa pito ka tuig nga kaminyoon ug sa panahon sa pagpresentar sa batang si Jesus didto sa templo, siya 84 anyos na. Bisan pa niana, siya kanunayng atua sa templo, dayag nga sukad sa panahon sa pag-alagad sa buntag hangtod sa pag-alagad sa gabii ug, ingong resulta, nakapribilehiyo nga makakita sa batang si Jesus ug nagpamatuod bahin kaniya. Ang iyang “mga pagpuasa ug mga pangamuyo” nagpaila sa iyang pagbangotan ug tim-os nga pagpangandoy. Ang siglosiglong gidugayon nga pagkasakop sa mga Hudiyo, inubanan sa nagakadaot nga relihiyosong mga kahimtang nga nakaapektar bisan sa templo ug sa mga saserdote, magpatin-aw gayod niini. Bisan pa niana, bisan tuod wala na siya magdahom nga buhi pa hangtod sa pagdako sa bata, nianang tungora siya malipayong nagpamatuod ngadto sa uban bahin sa kaluwasan nga duol nang matuman pinaagi niining umaabot nga Mesiyas.​—Luc 2:36-38.