Usa ka liwat nga babaye; sa Hebreohanon, kini maoy bath, ug sa Grego, kini maoy thy·gaʹter. (Gen 5:4; Mat 14:6; Buh 21:9) Ang pagkatawo sa mga anak nga babaye diha sa panimalay sa kapanahonan sa Bibliya dili kaayo usa ka dakong okasyon kay sa pagkatawo sa mga anak nga lalaki; ang ilang posisyon dili kaayo dungganon kay nianang sa mga anak nga lalaki, ug ang ilang mga ngalan dili kanunay nga girekord. (1Cr 2:​34, 35) Bisan pa niana, ang kadaghanan sa mga ginikanan nagmahal pag-ayo sa ilang mga anak nga babaye ug nagpanalipod sa ilang mga intereses. Sa dihang nagpakiluoy ang nagmasulub-ong mga ginikanan, giayo ni Jesus ang anak nga babaye sa babayeng Fenicianhon, ug iyang gibangon ang anak nga babaye ni Jairo gikan sa mga patay.​—Mat 15:22-28; Luc 8:​41, 42, 49-56.

Sa katilingban sa mga patriarka, ang mga anak nga babaye may pipila ka katungod, mga kaakohan, ug usab mga limitasyon. Sila gitugyanan ug nagkalainlaing buluhaton. Ang mga anak nga babaye sa mga saserdote mikaon gikan sa mga bahin sa mga halad nga alang sa saserdote. (Gen 24:​16, 19, 20; 29:6-9; Lev 10:14) Ang anak nga babaye maoy propiedad sa iyang amahan hangtod nga  siya paminyoon sa iyang amahan (Jos 15:​16, 17; 1Sa 18:​17, 19, 27), ug siya mahimong gamiton gani ingong garantiya o ibaligya ngadto sa pagkaulipon apan dili ngadto sa usa ka langyaw. (Ex 21:7-10; Neh 5:2-5) Hangtod nga siya magminyo, ang iyang mga panaad mahimong kanselahon sa iyang amahan. (Num 30:3-5) Supak sa balaod nga himoon siya sa iyang amahan ingong usa ka pampam, ug kon siya among-amongan, ang iyang amahan makakuhag mga danyos. (Ex 22:​16, 17; Lev 19:29; Deu 22:​28, 29) Adunay mga higayon nga ang mga amahan nagtanyag sa ilang ulay nga mga anak nga babaye ngadto sa daotan nga magubtanong panon aron maprotektahan lamang ang ilang mga bisita. (Gen 19:6-8; Huk 19:22-24) Ang mga anak nga babaye sagad gihatagan ug panulondon kauban sa ilang mga igsoong lalaki, apan bahin sa lima ka anak nga babaye ni Zelopehad kansang amahan namatay nga walay mga anak nga lalaki, sila nakadawat sa tibuok nga panulondon sa ilang mga katigulangan, ubos sa kondisyon nga sila magminyo lamang taliwala sa mga anak ni Manases aron ang propiedad magpabilin sa samang tribo. (Num 36:1-12; Jos 15:19; Job 42:15) Kon ang anak nga babaye gidiborsiyohan o nabiyuda, siya makabalik sa panimalay sa iyang amahan.​—Gen 38:11; Lev 22:13.

“Anak nga babaye”​—kanunay ba kining nagtumong sa pursosong anak nga babaye?

Ang terminong “anak nga babaye” gipadapat usab sa mga relasyon gawas pa sa pursosong mga anak sa usa ka tawo. Pananglitan, ubos sa pipila ka kahimtang ang termino nagtumong sa usa ka igsoong babaye (Gen 34:​8, 17), sinagop nga anak nga babaye (Est 2:​7, 15), umagad nga babaye (Huk 12:9; Ru 1:11-13), apo nga babaye (1Ha 15:​2, 10, diin ang Hebreohanong pulong alang sa anak nga babaye nga bath gihubad ingong “apo nga babaye” sa Mo, NW; tan-awa ang 2Cr 13:​1, 2), ug sa usa ka kaliwat.​—Gen 27:46; Luc 1:5; 13:16.

Gawas pa niining direktang mga paryente, ang terminong “anak nga babaye” gipadapat ngadto sa mga babaye sa katibuk-an (Gen 6:​2, 4; 30:13; Pr 31:29); mga babaye sa usa ka partikular nga yuta, katawhan o siyudad (Gen 24:37; Huk 11:40; 21:21); ug sa mga babayeng magsisimba sa bakak nga mga diyos (Mal 2:11). Gigamit kini sa kadaghanan ingong usa ka mapinanggaong pagtawag sa usa ka tawong may awtoridad o sa usa ka edarang tawo ngadto sa mas batan-ong babaye. (Ru 3:​10, 11; Mar 5:34) Ang mga porma sa pulong nga bath gigamit usab sa dihang naghisgot sa “mga sanga” sa usa ka kahoy (Gen 49:22) ug sa “mga lungsod nga sakop” sa usa ka mas dakong siyudad. (Num 21:25; Jos 17:11; Jer 49:2) Ang termino alang sa “anak nga babaye” diha sa daghang kahulogan niini makita sa kapin sa 600 ka beses diha sa Bibliya.