Ang Hebreohanong pulong nga ben ug ang Gregong pulong nga hui·osʹ, nga parehong nagkahulogang “anak” o “anak nga lalaki,” sagad gigamit diha sa mas lapad nga diwa kay sa pagtumong lamang sa usa ka pursosong anak nga lalaki. Ang “anak [nga lalaki]” mahimong magkahulogang sinagop nga anak nga lalaki (Ex 2:10; Ju 1:45), usa ka kaliwat sama sa usa ka apong lalaki o apong lalaki sa tuhod (Ex 1:7; 2Cr 35:14; Jer 35:16; Mat 12:23), o usa ka umagad nga lalaki.​—Itandi ang 1Cr 3:17 ug Luc 3:27 (si Sealtiel dayag nga mao ang anak nga lalaki ni Jeconias ug ang umagad nga lalaki ni Neri); Luc 3:​23, si “Jose, nga anak ni Heli,” dayag nga mao ang umagad nga lalaki (niini nga prase ang hui·osʹ, “anak nga lalaki,” dili makita diha sa Gregong teksto apan masabot na).

Ang mga tawo sagad mailhan o gitawag sa ngalan sa ilang amahan o sa ngalan sa mas layong katigulangan, sama sa (kang David nga) “anak ni Jese.” (1Sa 22:​7, 9) Ang Hebreohanon ug Aramaikong mga pulong nga ben ug bar, “anak nga lalaki,” sagad gigamit ingong mga prefix sa ngalan sa amahan, nga naghatag ug bansagon sa anak nga lalaki, sama sa Bar-Jesus (nagkahulogang “Anak nga Lalaki ni Jesus”). (Buh 13:6) Ang pipila ka bersiyon wala na maghubad sa prefix; ang uban naghubad niini sa kadaghanang kahimtang; ang pipila naghatag sa hubad niini diha sa panaplin. O ang prefix lagmit gilakip sa ngalan tungod sa mga kahimtang nga nahitabo sa dihang gipakatawo ang anak, sama sa Ben-ami, nga nagkahulogang “Anak sa Akong Katawhan [nga mao, mga paryente],” ug dili anak sa mga langyaw; o Ben-oni, nga nagkahulogang “Anak sa Akong Pagbangotan,” ingon sa gingalan kang Benjamin sa iyang himalatyong inahan nga si Raquel.​—Gen 19:38; 35:18.

Dugang pa, ang termino nga “mga anak [nga lalaki]” sagad gigamit aron sa paghulagway, sama sa: mga taga-Sidlakan (sa literal, “mga anak sa Sidlakan” [1Ha 4:30; Job 1:​3, ftn sa Rbi8]); ‘mga dinihogan’ (sa literal, “mga anak sa lana” [Zac 4:​14, ftn sa Rbi8]); mga membro (“mga anak”) sa mga pundok nga gitudlo alang sa usa ka partikular nga buluhaton, sama sa, “mga anak sa mga manalagna” (1Ha 20:35) o, ‘usa ka membro [“anak”] sa mga tigsagol ug pahumot’ (Neh 3:8); namalik nga mga destiyero (“mga anak sa Pagkadestiyero”) (Esd 10:​7, 16, ftn sa Rbi8); mga tawong walay-silbi, mga lampingasan (“mga anak ni belial”) (1Sa 2:​12, ftn sa Rbi8). Kadtong nagbuhat sa usa ka matang sa panggawi o  nagpakita sa usa ka matang sa kinaiya gitawag sa mga ekspresyon sama sa “mga anak sa Labing Hataas,” “mga anak sa kahayag ug mga anak sa adlaw,” “mga anak sa gingharian,” “mga anak sa usa nga daotan,” “anak sa Yawa,” “mga anak sa pagkadili-masinugtanon.” (Luc 6:35; 1Te 5:5; Mat 13:38; Buh 13:10; Efe 2:2) Mao man usab ang paghukom o sangpotanan nga katumbas sa maong kinaiya, sama sa “mahiagom sa Gehenna” (sa literal, usa ka anak sa Gehenna); “anak sa kalaglagan.” (Mat 23:15; Ju 17:12; 2Te 2:3) Si Isaias, kinsa nagtagna sa pagkastigo sa Diyos batok sa Israel nagtawag sa nasod ingong “akong mga giniok ug ang anak sa akong giokanan.”​—Isa 21:10.

Ang mga manulonda nga gilalang sa Diyos maoy mga anak sa Diyos. (Job 1:6; 38:7) Si Adan ingong linalang sa Diyos maoy usa ka anak sa Diyos. (Luc 3:38) Kadtong mga maghuhukom ug mga magmamando sa Israel nga batok kanila midangat ang pulong sa Diyos gitawag nga “mga anak sa Labing Hataas,” sa walay duhaduha tungod kay sila naghupot ug katungdanan sa Israel nga naghawas sa pagmando sa Diyos, bisan pag sila nakahimog kalapasan. (Sal 82:6) Kadtong gipili sa Diyos nga mahimong kaubang mga manununod sa iyang Anak nga si Jesu-Kristo gitawag nga “mga anak sa Diyos.”​—Rom 8:14-17.

Ang Tinguha Alang sa Usa ka Anak nga Lalaki. Sa karaang kapanahonan ang mga magtiayon nagtinguha pag-ayo nga makabaton ug usa ka anak nga lalaki. (Gen 4:​1, 25; 29:32-35) Sumala sa gipahayag sa salmista: “Ang mga anak [nga lalaki] maoy panulondon gikan ni Jehova . . . Malipayon ang tawo nga lig-on ug lawas nga nagpuno sa iyang udyongan kanila.” (Sal 127:3-5) Pinaagi sa mga anak nga lalaki ang linya sa kaliwat matino, ang ngalan sa mga katigulangan mapreserbar taliwala sa mga kaliwat, ug ang yutang panulondon magpabilin diha sa banay. (Num 27:8) Ang mga babayeng Israelinhon nagtinguha nga makabaton ug mga anak nga lalaki, tingali naglaom nga ang usa sa ilang mga anak mahimong mao ang “binhi” nga pinaagi kaniya ang mga panalangin gikan sa Diyos modangat sa katawhan ingon sa gisaad kang Abraham. (Gen 22:18; 1Sa 1:5-11) Sa takdang panahon ang manulonda nga si Gabriel nagpahibalo kang Maria, usa ka ulay sa tribo ni Juda, nga siya maoy “usa nga pinaboran kaayo,” ug nagdugang: “Ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan.”​—Luc 1:​28, 31, 32.