[Kadtong Kang (Iya ni) Anak].

Usa ka rasa sa katawhan nga dagko kaayo nga nagpuyo sa bukirong mga rehiyon sa Canaan ingon man usab sa pipila ka dapit sa kabaybayonan, ilabina sa H niini. Sa usa ka panahon tulo ka prominenteng tawo sa mga Anakim, nga mao, si Ahiman, Sesai, ug Talmai, ang mipuyo sa Hebron. (Num 13:22) Niining dapita unang nakita sa 12 ka Hebreohanong mga espiya ang mga Anakim, ug human niadto ang 10 sa mga espiya mihatag ug makahahadlok nga taho bahin sa maong kasinatian, nga nag-ingong kining mga tawhana maoy mga kaliwat sa mga Nepilim sa wala pa ang Lunop ug kon itandi kanila, ang mga Hebreohanon maoy sama sa “mga apan-apan.” (Num 13:28-33; Deu 1:28) Ang ilang gidak-on naghimo kanilang basehanan sa paghubit bisan sa samag higanteng mga tawo nga Emim ug Repaim. Ang ilang kusog lagmit nakapatungha sa panultihon nga nag-ingon: “Kinsay lig-ong makabarog atubangan sa mga anak ni Anak?”​—Deu 2:​10, 11, 20, 21; 9:1-3.

Sa pagpangharos ni Josue sa tibuok Canaan, siya nakadaog batok sa mga Anakim didto sa bukirong mga rehiyon, nga nagpukan sa ilang mga siyudad, apan ang uban nagpabilin sa Filistehanong mga siyudad sa Gaza, Asdod, ug Gat. Wala hisgoti sa rekord kon ang mga Anakim maoy kadugo sa mga Filistehanon, sumala sa gituohan sa pipila, o sila nakig-uban lamang kanila. (Jos 11:​21, 22) Sa ulahi, gipangayo ni Caleb ang siyudad sa Hebron (Kiriat-arba) ug ang mga teritoryo niini ingon sa gisaad sa Diyos kaniya. (Jos 14:12-15; Num 14:24) Mopatim-aw nga ang mga Anakim nakaestablisar pag-usab niining dapita, tingali samtang si Josue ug ang iyang kasundalohan nagpadayon sa pagpanakop sa amihanang mga bahin sa Canaan, ug busa si Caleb obligado karon sa pagsakop pag-usab sa teritoryo.​—Huk 1:​10, 20.

Ang Ehiptohanong mga teksto sa pagpanghimaraot (gikan sa mga gamit nga kulonon nga niana gisulat ang mga ngalan sa mga kaaway sa paraon ug unya gibuak ingong usa ka tunglo) lagmit nagtumong sa usa ka tribo ni Anak sa Palestina ingong Iy-ʽanaq.