[gikan sa Heb., nga nagkahulogang “Pagpakitag Pabor; Mapuangoron”].

Gitudlong hataas nga saserdote sa mga 6 o 7 K.P. ni Quirinio, ang Romanong gobernador sa Sirya, ug nag-alagad hangtod sa mga 15 K.P. (Luc 2:2) Busa si Anas mao ang hataas nga saserdote sa dihang si Jesus, sa edad nga 12, nakapahibulong sa rabbinikong mga magtutudlo didto sa templo. (Luc 2:42-49) Gitangtang ni Prokurador Valerius Gratus si Anas ingong hataas nga saserdote. Bisan tuod wala na siyay opisyal nga titulo, dayag kaayo nga padayon siyang migamit sa iyang dakong gahom ug impluwensiya ingong retiradong hataas nga saserdote ug may labawng tingog sa Hudiyohanong herarkiya. Lima sa iyang mga anak nga lalaki, lakip usab ang iyang umagad nga lalaking si Caifas, tanan nakahupot sa katungdanan ingong hataas nga saserdote. Tungod sa iyang prominenteng posisyon, si Anas haom nga gipaila sa Kasulatan ingong usa sa pangulong mga saserdote. (Mat 26:3; Luc 3:2) Sa dihang gidakop si Jesus, siya unang gidala ngadto kang Anas aron sukitsukiton ug dayon gipadala ngadto kang Caifas aron husayon. (Ju 18:13) Ang ngalan ni Anas nag-una sa talaan sa pangunang mga magsusupak sa mga apostoles ni Jesu-Kristo.​—Buh 4:6.

Ang adunahan ug gamhanang panimalay ni Anas maoy sakop sa tribo ni Levi, ug ang pagpamaligya sa mga halad sulod sa mga nataran sa templo maoy usa sa pangunang mga tinubdan sa ilang kinitaan​—igong hinungdan kon nganong buot nilang patyon si Jesus, kinsa sa duha ka beses naghinlo sa templo nga ilang gihimong “usa ka langob sa mga tulisan.” (Ju 2:13-16; Mat 21:​12, 13; Mar 11:15-17; Luc 19:​45, 46) Ang lain pang hinungdan sa pagdumot ni Anas kang Jesus ug sa iyang mga apostoles lagmit mao ang pagtulon-an  ni Jesus bahin sa pagkabanhaw, diin ang pagbanhaw kang Lazaro maoy buhing pamatuod, ug ang pagsangyaw ug pagpanudlo sa samang doktrina nga gihimo sa mga apostoles, kay kon si Anas ugaling usa ka Saduseo, siya wala motuo sa pagkabanhaw.​—Buh 23:8; itandi ang 5:17.