[gikan sa Gr. nga lintunganayng pulong nga nagkahulogang “tawo; lalaki”; lagmit, Kusganon].

Igsoong lalaki ni Simon Pedro ug anak ni Jonas (Juan). (Mat 4:18; 16:17) Bisan tuod ang siyudad sa Betsaida mao ang yutang-natawhan ni Andres, siya ug si Simon magkaubang nagpuyo sa Capernaum sa dihang gitawag sila ni Jesus aron mahimong “mga mangingisda ug mga tawo.” (Mar 1:​16, 17, 21, 29; Ju 1:44) Ang duha ka siyudad nahimutang sa A nga baybayon sa Dagat sa Galilea, diin ang duha ka magsoon maoy mga kasosyo ni Santiago ug Juan sa pagpangisda.​—Mat 4:18; Mar 1:16; Luc 5:10.

Sa una si Andres maoy tinun-an ni Juan nga Tigbawtismo. (Ju 1:​35, 40) Sa tinghunlak sa 29 K.P., siya didto sa Betania sa S nga bahin sa Suba sa Jordan ug nakadungog kang Juan nga Tigbawtismo nga nagpailaila kang Jesus ingong “ang Kordero sa Diyos.” (Ju 1:29) Siya, kauban ang lain pang tinun-an (lagmit si Juan), misunod kang Jesus ngadto sa iyang pinuy-anan ug nakombinsir dayon nga iyang nakaplagan ang Mesiyas. Dayon iyang nakaplagan ug gipahibalo ang iyang igsoon nga si Simon ug gidala siya ngadto kang Jesus. (Ju 1:36-41) Ang duha ka magsoon mibalik sa ilang pagpangisda, apan tali sa unom ka bulan hangtod sa usa ka tuig sa ulahi, human sa pagdakop kang Juan nga Tigbawtismo, sila, kauban ni Santiago ug Juan, gidapit ni Jesus aron mahimong “mga mangingisda ug mga tawo.” Dihadiha ilang gibiyaan ang ilang mga pukot ug misugod sa pag-uban kang Jesus. (Mat 4:18-20; Mar 1:​14, 16-20) Sa ngadtongadto kining upat nahimong mga apostoles, ug mamatikdan nga si Andres kanunayng gitala nga lakip sa unang upat diha sa tanang talaan sa mga apostoles.​—Mat 10:2; Mar 3:18; Luc 6:14.

Human niana si Andres lakbit na lang nga gihisgotan. Siya ug si Felipe nakighisgot kang Jesus labot sa suliran sa pagpakaon sa usa ka panon nga  may mga 5,000 ka lalaki, ug si Andres mihatag ug sugyot bahin sa pipila ka mabatonang pagkaon nga bisan siya mismo naghunahuna nga gamay rag ikatabang. (Ju 6:​8, 9) Sa panahon sa kataposang pista sa Paskuwa nga ilang gisaulog, si Felipe miadto kang Andres aron mangayog tambag labot sa hangyo sa pipila ka Grego nga buot makakita kang Jesus, ug dayon ang duha miduol kang Jesus labot niining butanga. (Ju 12:20-22) Usa siya sa upat nga didto sa Bukid sa mga Olibo nga nangutana kang Jesus bahin sa ilhanan nga magtimaan sa kataposan sa naglungtad nga sistema sa mga butang. (Mar 13:3) Ang ngalan ni Andres kataposang gihisgotan wala madugay human sa pagkayab ni Jesus.​—Buh 1:13.