ANG Israel gilibotan sa kaawayng mga nasod nga nagtinguha sa pag-agaw sa panulondon niini. Nabuntog ba ang Israel? Sa dihang nagpabilin nga matinumanon ang Israel, kini nagmadaogon. “Si Jehova mismo nakig-away alang sa Israel.”​—Jos 10:14.

Kini tin-aw nga gipasundayag sa panahon sa pagmando ni Haring Jehosapat (936-​mga 911 W.K.P.). Ang nag-abin nga kasundalohan sa Ammon, Moab, ug sa Bukid sa Seir misulong batok sa Juda. Si Jehosapat nangamuyo kang Jehova: ‘Ania, sila mianhi aron sa pagpapahawa kanamo gikan sa imong kabtangan nga imong gipapanag-iya kanamo. Oh among Diyos, dili ba ikaw magpahamtang ug paghukom nganha kanila?’ Siya magpahamtang gayod! Ang Juda gipasaligan: “Ang gubat dili inyo, kondili iya sa Diyos.” Gipaguliyang ni Jehova ang kaaway, mao nga sila nagpinatyanay sa usag usa.​—2Cr 20:1-23.

Sa kataposan, human sa kasiglohan sa pagpakig-away alang sa Israel, gitugotan ni Jehova ang kaawayng mga nasod sa pagsakop niini. Niadtong 740 W.K.P. gitapos sa mga Asiryanhon ang napulo-ka-tribo nga gingharian “tungod kay ang mga anak sa Israel nakasala batok kang Jehova.” (2Ha 17:7-18) Unya niadtong 607 W.K.P., tungod sa pagkadili-masinugtanon ang duha-ka-tribo nga gingharian gilaglag sa mga Babilonyanhon. (2Ha 21:10-15; 22:​16, 17) Kini nga yugto sa kasaysayan sa Israel nagpasiugda sa kahinungdanon sa pagsugot kang Jehova.